Kapu 50

Malongi Sambu na Kununga Munyokudi

NA NIMA ya kulonga bantumwa na yandi na yina metala mitindu ya kulanda kisalu ya kusamuna, Yezu kekebisa bau na yina metala batelemini. Yandi ketuba nde: “Tala, mono ke tinda beno bonso mameme na kati ya bankoi . . . Beno keba mbote, sambu ke na bantu ya nkaka ta kanga beno, bo ta nata beno na bazuzi, ebuna bo ta bula beno fimbu na banzo na bo ya bisambu. Beno ta kwenda kusamba na meso ya baguvernere ti na meso ya bantotila sambu na mono.”

Ata nkutu balongoki na yandi tamona munyokudi ya ngolo, Yezu kepesa lusilu na kundimisa yonso nde: “Kana bo ke sambisa beno na tribinale, beno kumona mpasi ve na ntima nde: ‘Nki beto ta tuba?’ to ‘Beto ta tuba nki mutindu?’ Sambu Nzambi ta songa beno na ntangu yo yina mambu yina ya beno ta tuba. Sambu beno ve bantu ta tuba; kansi Mpeve ya Tata na beno ta songa beno mambu yina ya beno ta tuba.”

Yezu kelanda nde: “Bantu ta pesa bampangi na bo mosi na maboko ya bambeni sambu na kufwa bo, batata mpi ta sala mutindu mosi na bana na bo. Bana ta kuma bambeni ya batata ti ya bamama na bo, bo mpi ta fwa bo.” Yandi keyika nde: “Bantu yonso ta menga beno sambu na mono. Kansi muntu yina ta kanga ntima tii na nsuka, yandi ta guluka.”

Kisalu ya kusamuna kele na mfunu ya kuluta mingi. Sambu na kikuma yai, Yezu ketubila mingi mfunu ya kuvanda mayele sambu na kubikala na kimpwanza na kulungisa kisalu yango. Yandi ketuba nde: “Kana bo monisa beno mpasi na bwala ya nkaka, beno tina na bwala ya nkaka. Mono ke tubila beno mambu ya kieleka: Beno ta manisa kisalu na beno na babwala yonso ya Israele ve kana Mwana-muntu me kwisa ntete ve.”

Yau kele kyeleka nde Yezu kupesaka ndongi, lukebisu ti nsyamisa yai na bantumwa 12, kansi yau vandaka mpi sambu na bayina tavukana na kisalu ya kusamuna ya nsi-ntoto ya mvimba na nima ya lufwa mpi lufutumuku na yandi. Dyambu yai memonisama na kutuba na yandi nde balongoki na yandi ‘tayinama na bantu yonso,’ kaka na bantu ya Izraele ve yina balongoki kutindamaka na kulonga. Dyaka, na ntembe ve, bantumwa kunatamaka na ntwala ya baguvernere ti bantotila ntangu Yezu kutindaka bau na kisalu na bau ya kusamuna ya ntangu ya nkufi. Kuluta dyaka, na ntangu yina, bankwikidi bau kufwaka bau ve na bamambere ya dibuta.

Yau yina, na ntangu yandi ketuba nde balongoki na yandi tamanisa ve nzyetolo ya kisalu ya kusamuna “kana Mwana-muntu me kwisa ntete ve,” Yezu vandaka kutubila beto na mutindu mosi ya kubikula nde balongoki na yandi tamanisa ve nzyetolo ya kisalu ya ntoto ya mvimba ti kisalu ya kusamuna mambu yina metala Kimfumu ya Nzambi ya kutulama na ntwala Ntotila Yezu Kristu ya kukembisama kukuma bonso ndungisi ya bantuma ya Yehowa na Armagedoni.

Na kulandaka malongi ya kisalu na yandi ya kusamuna, Yezu ketuba nde: “Mwana-kalasi kuluta longi na yandi ve; mpika kuluta mfumu na yandi ve.” Yau yina, balandi ya Yezu fwete kutula kivuvu ya kumona bampasi ti minyokudi mutindu yandi kumonaka yau sambu na kisalu ya kusamuna Kimfumu ya Nzambi. Na yau, yandi kesyamisa nde: “Beno kuwa boma ve sambu na bantu yina ke fwaka nitu kansi bo lenda fwa moyo ve; kansi beno tina Nzambi boma; yandi muntu lenda fwa moyo ti nitu na [Gehena, NW].”

Na dyambu yai yau kulombamaka nde Yezu kupesa mbandu. Yau kufwanaka nde yandi kuvibidila lufwa nkatu kubanga na kisika ya kutula kwikama na yandi na kigonsa na ntwala ya Muntu yina kele ti ngolo yonso, Yehowa Nzambi. Ee, Yehowa muntu lenda kufwa “moyo” ya muntu (awa yau kesongidila nde kivuvu ya makwisa ya muntu bonso moyo ya kezinga) to lenda kufutumuna muntu mpi kupesa yandi luzingu ya mvula na mvula. Tata ya zulu ya zola mpi ya mawa ya inki mutindu Yehowa kele!

Na nima, Yezu mesyamisa balongoki na yandi ti bingana yina memonisa pwelele lusungiminu ya zola ya Yehowa sambu na bau. Yandi keyufula nde: “Keti bo ke tekaka [bansokusa, NW] zole ya fyoti ve na kibende mosi ya fyoti-fyoti? Kansi ata [nsokusa, NW] mosi lenda bwa ve na ntoto kana Tata na beno me ndima ntete ve. Ata nsuki na beno ya ntu, Nzambi me tangaka yo yonso. Yo yina, beno kuwa boma ve; ata [bansokusa, NW] kele mingi, kansi beno me luta bo na mfunu!”

Nsangu ya Kimfumu ya Yezu mepesa mukumba na balongoki na yandi sambu na kusamuna takabula banzo, ntangu bamosi na kati ya dibuta kendima yau mpi bankaka kebuya yau. Yandi ketendula nde: “Beno banza ve nde mono kwisaka sambu na kunata ngemba awa na nsi-ntoto; mono kwisaka kunata ngemba ve, kansi mono kwisaka kunata mbele ya bitumba.” Yau yina, sambu nde mambere mosi ya dibuta kundima kyeleka ya Biblia, yau kelombaka kikesa. Yezu ketuba nde: “Muntu yina ke zolaka tata na yandi to mama na yandi kansi yandi ke zolaka mono ve, yandi me lunga ve na kuvanda muntu na mono; muntu yina ke zolaka mwana na yandi ya bakala to mwana na yandi ya nkento kansi yandi ke zolaka mono ve, yandi me lunga ve na kuvanda muntu na mono.”

Na kusukisa malongi na yandi, Yezu ketendula nde bayina keyamba balongoki na yandi keyamba yandi mpi. “Mono ke tubila beno mambu ya kieleka: Muntu yina ke pesa ata dikopa mosi ya masa ya madidi na mulongoki mosi yina kele mfunu mingi ve . . . sambu muntu yina kele mulongoki na mono, yandi ta baka kaka matabisi na yandi.” Matayo 10:​16-42.

▪ Inki lukebisu Yezu kepesa na balongoki na yandi?

▪ Inki kikesa mpi nsyamisa yandi kepesa bau?

▪ Sambu na inki malongi ya Yezu kesadilama mpi na Bakristu ya bubu yai?

▪ Na inki mutindu longoki ya Yezu kele ve na zulu ya longi na yandi?