Kapu 56

Inki Kekumisaka Muntu Mvindu?

LUTELEMINU ya Yezu mekuma ngolo kibeni. Kele ve kaka nde balongoki na yandi mingi mekwenda, kansi mpi Bayuda na Yudea kesosa kufwa yandi, kaka mutindu bau salaka ntangu yandi vandaka na Yeruzalemi na Paki ya mvu 31 T.B.

Ntangu ya Paki ya mvu 32 T.B. melunga. Yau kemonana nde, na kuwakana ti malombu ya Nzambi, Yezu kekwenda na Yeruzalemi sambu na Paki. Kansi, yandi kesala yau na mayele yonso sambu luzingu na yandi kele na kigonsa. Na nima, yandi tavutuka na Galilea.

Ngatu Yezu kele na Kapernaumi ntangu Bafarize ti balongi ya Bansiku ya Yeruzalemi mekwisa na yandi. Bau kesosa bikuma ya kufunda yandi nde yandi mevwenza nsiku ya dibundu. Bau keyufula nde: “Sambu na nki balonguki na nge ke landaka bansiku ya bambuta ve? Na ntwala ya kudia, bo ke yobisaka maboko na bo ve.” Yai kele ve dyambu mosi ya metumamaka na Nzambi, kansi Bafarize kemona nde kukonda kusala nsiku yai ya bambuta, yina kelombaka kuyobisa maboko tii na binkoso, kele luzwezo ya ngolo.

Na kisika ya kuvutudila bau mvutu na yina metala lufundu na bau, Yezu ketubila mingi nkadilu na bau ya mbi, ya kufwa Nsiku ya Nzambi na luzolo yonso. Yandi kezola kuzaba: “Sambu na nki beno ke landaka bansiku na beno mosi, kansi beno ke landaka bansiku ya Nzambi ve? Sambu Nzambi tubaka nde: ‘Zitisa tata na nge ti mama na nge.’ Yandi tubaka mpi nde: ‘Muntu yina ke vwenzaka tata na yandi to mama na yandi, bo fweti fwa yandi.’ Kansi beno ke tubaka nde kana muntu kutuba na tata na yandi to na mama na yandi nde: ‘Lusadisu yina yonso ya mono zolaka kupesa nge, yo kele makabu yina ya mono ke bumba sambu na kupesa yo na Nzambi,’ mfunu kele ve yandi na kuzitisa tata na yandi.”

Ya kyeleka, Bafarize kelongaka nde mbongo, nzo to konso kima yina ya mepesamaka bonso makabu na Nzambi kele sambu na tempelo mpi yau lenda kusadilama ve sambu na kikuma ya nkaka. Kansi, na masonga yonso, makabu ya mepesamaka kebikala na maboko ya muntu yina kupesaka yau. Mpila yina mwana, na kutubaka kaka nde mbongo to bima na yandi kele “korban”​—⁠dikabu ya mepesamaka na Nzambi to na tempelo​—⁠kebuya mukumba na yandi ya kusadisa bibuti na yandi ya minunu, yina lenda kuvanda na mvwandilu mosi ya mpasi.

Yandi mewa kibeni kiseku ya kufwana sambu na mpila Bafarize kele na kubebisa Nsiku ya Nzambi na mutindu mosi ya mbi. Yezu ketuba nde: “Beno ke fwaka mambu yina ya Nzambi ke tubaka; yo yina beno ke landaka bansiku na beno mosi. Beno bantu ya luvunu, Yezaya tubaka mambu ya kieleka ntangu yandi tubaka na ntwala sambu na beno nde: ‘Nzambi ke tubaka nde: Bantu yai ke zitisaka mono kaka na munoko, kansi na ntima ve. Bisambu yina ya bo ke sambaka mono kele ya mpamba, sambu bo ke longaka bansiku ya bantu bonso nde yo kele malongi ya Nzambi!’ ”

Ngatu bibuka kudigambulaka sambu na kupesa Bafarize nzila ya kuyufula Yezu. Sesepi yai, ntangu Bafarize kemona ve mvutu ya kupesa sambu na kunganina ya ngolo ya yandi menganina bau, yandi mebinga bibuka na kufinama. Yandi ketuba nde: “Beno wa, beno fweti bakisa nde madia yina ke kotaka na munoko ya muntu yo ke kumisaka yandi mvindu ve; kansi mambu yina ke basikaka na munoko na yandi, yo yina ke kumisaka yandi mvindu.”

Na nima, ntangu bau mekota na nzo mosi, balongoki na yandi meyufula yandi nde: “Nge me zaba nde mambu yina ya nge me tuba yo me pesa Bafarize mpasi na ntima?”

Yezu kevutula nde: “Tata na mono yina kele na zulu ta tumuna bimenina yina yonso ya yandi kunaka ve. Beno bika Bafarize! Bo kele bamitwadisi ya kufwa-meso; kana muntu mosi ya kufwa-meso ke nata muntu ya nkaka ya kufwa-meso, bo yonso zole fweti kwenda kubwa na dibulu.”

Yau kemonana nde Yezu keyituka sambu na balongoki, ntangu Piere keyufula ntendula yina metala kima ya kekumisaka muntu mvindu. Yezu kevutula nde: “Ata beno mpi, beno me bakisa ve? Keti beno me bakisa ve nde, bima yina yonso ke kotaka na kati ya muntu, yo lenda kumisa yandi mvindu ve? Sambu yo ke kotaka na ntima na yandi ve kansi na divumu na yandi, ebuna na nima yo ke basikaka na nganda. . . . Mambu yina ke basikaka na ntima ya muntu, yo yina ke kumisaka muntu mbi. Sambu mabanza ya mbi yina ke basikaka na ntima ya muntu yo yina ke bendaka yandi na kusala mambu ya nsoni, na kuyiba, na kufwa bantu, na kusala pite, na kuzola bima ya bantu ya nkaka, na kusala bantu ya nkaka mbi, na kukusa bantu, na kutambula kisakasaka, na kudia bantu ya nkaka kimpala, na kuvwenza bantu ya nkaka, na kuditula, ti na kusala mambu ya buzoba. Mambu yai yonso ya mbi ke basikaka na ntima; mambu ke kumisaka muntu mbi yo yina.”

Awa, Yezu kele na kubuyisa ve dilongi ya bunkete. Yandi kezola kutuba ve nde yau kele ve mfunu na kuyobisa maboko na ntwala ya kulamba to ya kudya madya. Kansi, Yezu kele na kubedisa luvunu ya bamfumu ya mabundu yina kemekaka na kubalula bansiku ya lunungu ya Nzambi na kutubilaka mingi bansiku ya bambuta yina kele ve na Masonuku. Ee, kele bisalu ya mbi kekumisaka muntu mvindu, mpi Yezu kemonisa nde yau kekatukaka na ntima ya muntu. Yoane 7:1; Kulonga 16:16; Matayo 15:​1-20; Marko 7:​1-23; Kubasika 20:12; 21:17; Yezaya 29:13.

▪ Inki luteleminu Yezu mekutana na yau ntangu yai?

▪ Inki lufundu Bafarize mesala, kansi na kutadila Yezu, inki mutindu Bafarize kevwenza Nsiku ya Nzambi na luzolo yonso?

▪ Inki Yezu memonisa nde yau kekumisaka muntu mvindu?