Kapu 71

Bafarize Mebuya na Kundima na Luzolo Yonso

BIBUTI ya mulombi yina kuvandaka ntete kifwa-meso, mewa boma ntangu bau mebingisama na ntwala ya Bafarize. Bau kezaba nde lukanu mebakamaka nde konso muntu yina tamonisa lukwikilu na Yezu takulama na sinagoga. Kuzengama ya kinduku ya mutindu yina ti bantu ya nkaka na kati ya kimvuka lenda kuvanda mpasi kibeni, mingimingi sambu na dibuta mosi ya nsukami. Ebuna bibuti memonisa mayele.

Bafarize meyufula nde: “Yai mwana na beno? Beno ke ndima nde yandi butukaka na meso ya kufwa? Ebuna nki mutindu yandi ke mona sesepi yai?”

Bibuti mendima nde: “Beto zaba nde yandi kele mwana na beto, yandi butukaka na meso ya kufwa. Kansi beto zaba ve kana nki mutindu yandi ke mona sesepi yai; beto zaba mpi ve ata fioti kana nani me kangula meso na yandi.” Na ntembe ve mwana na bau kutubilaka bau mambu yonso ya kusalamaka, kansi na mayele yonso bibuti ketuba nde: “Beno yula yandi, yandi kele mbuta; yandi lenda vutula yandi mosi.”

Na yau, Bafarize mebinga dyaka muntu yango. Ntangu yai bau kemeka na kupesa yandi boma na kumonisaka nde bau memona banzikisa yina lenda kutula Yezu na kigonsa. Bau ketubila yandi nde: “[Pesa lukumu na Nzambi, NW]. Beto zaba nde muntu yina kele muntu ya masumu.”

Muntu yina kuvandaka ntete meso ya kufwa mebuya ve lufundu na bau, na kutubaka nde: “Mono zaba ve kana yandi kele muntu ya masumu to muntu ya masumu ve.” Kansi yandi keyika nde: “Kima mosi kaka ya mono zaba yo yai, nde mono vandaka na meso ya kufwa, ebuna sesepi yai mono ke mona.”

Na kusosaka kuzwa mwa kifu na kimbangi na yandi, Bafarize keyufula dyaka nde: “Nki yandi salaka nge? Nki mutindu yandi kangulaka meso na nge?”

Muntu yango mebokuta nde: “Mono me tubila beno ntete, kansi beno zolaka kuwila mono ve. Sambu na nki beno ke zola kuwa yo diaka?” Na kiseku yonso, yandi meyufula nde: “Keti beno mpi zola kituka balonguki na yandi?”

Mvutu yai mepesa Bafarize makasi. Bau mefunda yandi nde: “Nge, nge kele mulonguki ya muntu yina! Kansi beto, beto kele balonguki ya Moize! Beto zaba nde Nzambi tubanaka na Moize; kansi muntu yai; beto zaba mpi ve kana yandi me katuka wapi!”

Na kumonisaka ngituka, mulombi ya kudikulumusa yina mevutula nde: “Yai kele mambu ya kuyituka! Beno me bakisa ve kana yandi me katuka wapi, kansi yandi me kangula meso na mono!” Inki nsukulu lenda kubasika awa? Mulombi metubila dyambu yina kendimamaka nde: “Beto zaba nde Nzambi ke wilaka bantu ya masumu ve, kansi yandi ke wilaka muntu yina ke zitisaka yandi ti ke landaka luzolo na yandi. Beto me waka ntete ve bantu ke tuba nde muntu mosi me kangula meso ya muntu butukaka na meso ya kufwa.” Na yau, nsukulu fwete kuvanda kaka nde: “Kana muntu yina katukaka na Nzambi ve, yandi zolaka kusala ve ata kima mosi.”

Bafarize kele ve ata ti mvutu ya kupesa sambu na kuyindula ya kusungama, ya pwelele mpi ya ndonga. Bau lenda ve kundima kyeleka, mpi sambu na yau, bau kefinga muntu yango nde: “Nge ya mvimba, nge butukaka muntu ya masumu, nge zola kulonga beto?” Na yau, bau melosa muntu yango na nganda, yau kemonana nde bau mekula yandi na sinagoga.

Ntangu Yezu mewa mambu ya bau salaka, yandi mekwenda kumona muntu yango mpi metubila yandi nde: “Nge me ndima Mwana-muntu na ntima na nge?”

Sambu na kupesa mvutu, muntu yina kuvandaka ntete kifwa-meso, keyufula nde: “Tata, tubila mono kana yandi kele nani, sambu mono lenda ndima yandi.”

Yezu mevutula nde: “Yandi yai ke tubila nge sesepi yai.”

Na mbala mosi, muntu yango mefukama na ntwala ya Yezu mpi metuba nde: “Mfumu, mono me ndima.”

Na nima, Yezu metendudila yandi nde: “Mono kwisaka awa na nsi-ntoto na kuvanda zuzi sambu na kuzenga nde bantu ya kufwa-meso kumona, bayina ke monaka bo kituka bantu ya kufwa-meso.”

Ntangu bau mewa mambu yina, Bafarize yina kewidikila meyufula nde: “Keti beto mpi ke na meso ya kufwa?” Kana bau zolaka kundima nde bau kele meso ya kufwa na mabanza, ndolula zolaka kuvanda sambu na luteleminu na bau na Yezu. Mutindu Yezu ketubila bau nde: “Kana beno vandaka na meso ya kufwa, beno zolaka kuvanda na masumu ve.” Kansi, bau kelatama nde bau kele ve meso ya kufwa mpi bau kele ve ti mfunu ya nsemo ya kimpeve. Ebuna, Yezu metuba nde: “Beno me tuba nde: ‘Beto ke monaka mbote-mbote,’ yo yina beno kele kaka bantu ya masumu.” Yoane 9:​19-41.

▪ Sambu na inki bibuti ya muntu yina kuvandaka ntete kifwa-meso kewa boma ntangu bau mebingisama na ntwala ya Bafarize, mpi inki mutindu bau mepesa mvutu na mayele yonso?

▪ Inki mutindu Bafarize kemeka na kupesa muntu yina kuvandaka ntete meso ya kufwa boma?

▪ Inki ngindu ya ndonga ya muntu yango mepesa Bafarize makasi?

▪ Sambu na inki Bafarize kele ve ti ndolula sambu na luteleminu na bau na Yezu?