Kapu 70

Yezu Mebelula Kifwa-meso ya Kubutukila

NTANGU Bayuda memeka na kubula Yezu matadi, yandi mekatuka ve na Yeruzalemi. Na nima, na Kisabatu, yandi ti balongoki na yandi kele na kutambula na kati ya mbanza ntangu bau memona muntu mosi yina kubutukaka meso ya kufwa. Balongoki meyufula yandi nde: “Longi, sambu na nki muntu yai butukaka na meso ya kufwa? Nani salaka masumu, yandi mosi to tata na yandi ti mama na yandi?”

Mbala ya nkaka, balongoki kekwikila, mutindu barabi ya nkaka kekwikilaka, nde muntu lenda kusumuka na kati ya divumu ya mama na yandi. Kansi, Yezu mevutula nde: “Yo kele ve nde yandi muntu salaka masumu, to tata ti mama na yandi bantu salaka masumu. Yandi ke na meso ya kufwa sambu [bisalu, NW] ya Nzambi kumonika na yandi.” Kufwa ya meso ya muntu yai kele ve malanda ya kifu to disumu mosi ya mezabanaka yina muntu yango to bibuti na yandi kusalaka. Disumu ya muntu ya ntete Adami kubasisaka kukonda kukuka ya bantu yonso, mpi yau yina, bau mekumaka ti bifu bonso kubutuka meso ya kufwa. Kifu yai ya kele na muntu yina, kepesa ntangu yai dibaku na Yezu na kumonisa bisalu ya Nzambi.

Yezu ketubila mingi kusala bisalu yai ntinuntinu. Yandi ketuba nde: “Na ntangu mwini kele, beto fweti sala bisalu ya muntu yina tindaka mono. Kana mpimpa me bwa, ata muntu mosi ve ta vanda na mpila ya kusala. Ntangu mono kele na [katikati] ya bantu, mono kele mwinda sambu na bo.” Kubika fyoti lufwa ya Yezu takumisa yandi na tombe ya mazyamu kuna yandi lenda kusala dyaka ve ata kima mosi. Kansi ntangu yai, yandi kele nto ya nsemo sambu na inza.

Na nima ya kutuba mambu yai, Yezu melosa mate na ntoto mpi yandi mesala potopoto ti mate. Yandi metula yau na meso ya kifwa-meso mpi metuba nde: “Kwenda kuyobisa ilungi na nge na kiziba ya Siloe.” Muntu yango melemfuka. Mpi ntangu yandi mesala yau, yandi lenda kumona! Kyese ya inki mutindu yandi kele na yau na kuvutuka na yandi, ntangu yandi memona na mbala ya ntete na luzingu na yandi!

Bamfinangani ti bantu ya nkaka yina kuzaba yandi keyituka. Bau keyufula nde: “Keti yai kele ve muntu yina vandaka kuvanda na ntoto sambu na kulomba bantu mbongo?” Bamosi kevutula nde: “Yina yandi.” Bankaka lenda kukwikila yau ve: “Ve yandi ve, kansi yandi me fwanana na yandi.” Kansi muntu yango ketuba nde: “Yai mono si.”

Bantu keyufula nde: “Nki mutindu meso na nge me kanguka?”

“Muntu mosi, zina na yandi Yezu, yandi salaka ndambu ya potopoto, yandi pakula mono na meso, ebuna yandi tubila mono nde: ‘Kwenda kuyobisa ilungi na nge na kiziba ya Siloe.’ Mono kwendaka kuna; ntangu mono me yobila imene, mono yantika kumona.”

Bau meyufula nde: “Wapi muntu yango?”

Yandi mevutula nde: “Mono zaba ve.”

Ntangu yai, bantu menata muntu yina kuvandaka ntete meso ya kufwa na bamfumu na bau ya dibundu, Bafarize. Bau mpi melanda na kuyula yandi inki mutindu yandi meyantika na kumona. Yandi ketendula nde: “Yandi pakulaka mono mwa-ndambu ya potopoto na meso, mono yobisaka ilungi na mono, ebuna mono ke mona ntangu yai.”

Ya kyeleka, Bafarize fwete kuwa kyese ti mulombi yai ya mebeluka! Kansi, na kisika ya kusala mutindu yina, bau kebedisa Yezu. Bau ketuba nde: “Yandi lenda vanda ve muntu ya Nzambi.” Sambu na inki bau ketuba dyambu yai? “Sambu yandi ke landaka ve bansiku ya [kisabatu, NW].” Kansi Bafarize ya nkaka keyufula nde: “Nki mutindu muntu lenda sala mambu ya kuyituka ya mutindu yai, kana yandi kele muntu ya masumu?” Ebuna kukabwana mekota na kati na bau.

Yau yina, bau keyufula muntu yango nde: “Ebuna nge, nki nge ke banza sambu na muntu yina me kangula meso na nge?”

Yandi kevutula nde: “Yandi kele profete.”

Bafarize kebuya na kukwikila dyambu yai. Bau mendimisama nde yau fwete kuvanda nde Yezu ti muntu yina, bau wakanaka na kisweki sambu na kukusa bantu. Ebuna, sambu na kusukisa makambu, bau mebinga bibuti ya muntu yango sambu na kuyufula bau. Yoane 8:59; 9:​1-18.

▪ Inki kele na kikuma ya kufwa meso ya muntu yai, mpi inki kele ve kikuma na yau?

▪ Mpimpa yina ata muntu mosi ve tavanda na mpila ya kusala kele inki?

▪ Ntangu muntu mebeluka, inki bantu yina kuzaba yandi ketuba?

▪ Inki mutindu Bafarize kele ya kukabwana na yina metala muntu yina ya mebeluka?