Bafarize Ke Tulana Ntembe ti Muntu Yina Vandaka Kifwa-Meso

Sambu Bafarize ke ndima ve nde Yezu me belula muntu yina butukaka kifwa-meso, bo me binga bibuti na yandi. Bibuti na yandi me zaba nde Bayuda lenda ‘kula bo na sinagoga.’ (Yoane 9:22) Kana bo ke vukana diaka ve ti bampangi na bo Bayuda na sinagoga, yo ta vanda ti bupusi ya mbi na luzingu na bo ya dibuta mpi na mambu ya me tala mbongo.

Bafarize me yula bibuti yai bangiufula zole: “Keti yai mwana na beno yina beno ke tuba nde yandi butukaka kifwa-meso? Ebuna, inki mutindu yandi ke mona ntangu yai?” Bibuti me tuba nde: “Beto me zaba nde yandi kele mwana na beto mpi nde yandi butukaka kifwa-meso. Kansi nki mutindu yandi ke mona ntangu yai, beto me zaba ve; to nani kangulaka yandi meso, beto me zaba ve.” Ata mwana yai zabisaka bibuti na yandi mambu yina salamaka, bibuti yai ke keba na mutindu yina bo ke pesa mvutu; bo me tuba: “Beno yula yandi. Yandi kele mbuta. Yandi fwete tuba yandi mosi.”—Yoane 9:19-21.

Yo yina, Bafarize me binga diaka muntu yango, me bangisa yandi mpi me songa yandi nde bo kele ti banzikisa yina ke bedisa Yezu. Bo me zabisa yandi nde: “Pesa nkembo na Nzambi; beto me zaba nde muntu yina kele nsumuki.” Yandi me tula ve dikebi na mambu yina bo ke fundila Yezu, yandi me tuba nde: “Kana yandi kele nsumuki, mono me zaba ve.” Yandi me tuba diaka nde: “Kima mosi kaka ya mono me zaba kele nde, mono vandaka kifwa-meso, kansi ntangu yai mono ke mona.”—Yoane 9:24, 25.

Bafarize me yambula ve, bo me yula diaka muntu yango nde: “Inki yandi salaka nge? Inki mutindu yandi kangulaka meso na nge?” Yandi me zabisa bo ti kikesa yonso nde: “Mono songaka beno yo ntete, kansi beno waka ve. Sambu na nki beno ke zola kuwa yo diaka? Keti beno mpi ke zola kukuma balongoki na yandi?” Bafarize me wa makasi ya mingi, bo me songa yandi nde: “Nge kele longoki ya muntu yina, kansi beto kele balongoki ya Moize. Beto me zaba nde Nzambi tubaka na Moize, kansi beto me zaba ve kana muntu yai katukaka na wapi.”—Yoane 9:26-29.

Muntu yina ke lombaka bima me yituka mambu yina Bafarize me tuba mpi yandi me tuba nde: “Ya kieleka, yo kele diambu ya kuyituka, sambu beno me zaba ve kisika yandi me katuka, kansi yandi me kangula meso na mono.” Na nima, yandi me tubila dibanza yai ya ke salaka nde Nzambi kuwa muntu mpi kundima yandi: “Beto me zaba nde Nzambi ke wilaka ve bansumuki, kansi kana muntu ke waka yandi boma mpi ke salaka luzolo na yandi, yandi ke waka muntu yina. Katuka ntama beto me waka ntete ve nde muntu mosi me kangula meso ya muntu yina butukaka kifwa-meso.” Na nsuka, yandi me tuba nde: “Kana muntu yai katukaka ve na Nzambi, yandi zolaka kusala ve ata kima mosi.”—Yoane 9:30-33.

Bafarize me kuka ve kubuya mambu yina muntu yango me tuba, yo yina bo me vweza yandi nde: “Nge ya mvimba nge butukaka na disumu, kansi nge ke longa beto?” Ebuna, bo me losa yandi na nganda.—Yoane 9:34.

Ntangu Yezu me wa mambu yina me katuka kusalama mpi me mona muntu yina, yandi me yula yandi nde: “Keti nge ke kwikila na Mwana ya muntu?” Yandi me tuba nde: “Mfumu, yandi kele nani, sambu mono kwikila na yandi?” Yezu me zabisa yandi pwelele nde: “Nge me mona yandi, mpi ya kieleka, yandi muntu ke solula ti nge.”—Yoane 9:35-37.

Muntu yango me tuba nde: “Mfumu, mono ke kwikila na yandi.” Sambu na kumonisa lukwikilu mpi luzitu, yandi me fukimina Yezu, ebuna Yezu me tuba mambu yai ya mfunu kibeni: “Mono kwisaka na nsi-ntoto yai sambu na lusambisu yai, sambu bantu yina ke mona ve kumona mpi bantu yina ke mona kukuma bifwa-meso.”—Yoane 9:38, 39.

Bafarize yina kele pana me zaba nde bo kele ve bifwa-meso. Kansi, inki beto lenda tuba sambu na mukumba yina bo kele na yo ya kuvanda bantwadisi ya kimpeve? Bo me songa Yezu nde: “Keti beto mpi, beto kele bifwa-meso?” Yezu me zabisa bo nde: “Kana beno vandaka bifwa-meso, beno zolaka kuvanda ve ti disumu. Kansi ntangu yai beno ke tuba nde, ‘Beto ke mona.’ Disumu na beno kele kaka.” (Yoane 9:40, 41) Kana bo vandaka ve balongi na Izraele, beto lendaka kubakisa mutindu bo ke buya nde Yezu kele ve Mesia. Kansi sambu bo me zaba Nsiku, bo ke sala disumu ya nene mutindu bo ke buya Yezu.