Kapu 63

Ndongisila ya Nkaka ya Nsongisa

NTANGU Yezu ti bantumwa na yandi kele kaka na kati ya nzo na Kapernaumi, kima ya bau ketubila ntangu yai, kele dyaka ve ya kutula ntembe kana nani kele ya kuluta nene. Yai kele dyambu mosi ya kusalamaka mpi mbala ya nkaka na kuvutuka na bau na Kapernaumi, ntangu Yezu yandi mosi kuvandaka ve pana. Ntumwa Yoane ketuba nde: “Beto monaka muntu mosi kuna ke basisa bampeve ya mbi na zina na nge. Kansi yandi kele muntu na beto ve. Beto tubaka na yandi nde: ‘Kusala diaka mpidina ve.’ ”

Na ntembe ve, Yoane keyindula nde bantumwa kele kaka bau mosi bantu kele na nswa ya kubelula. Ebuna, yandi keyindula nde muntu yina kesala bisalu ya ngolo ya mutindu mosi mefwana ve sambu yandi kele ve na kibuka na bau.

Kansi, Yezu mepesa ndongisila nde: “Beno lenda kangisa yandi nzila ve, sambu konso muntu yina ke sala mambu ya kuyituka na zina na mono, yandi lenda tuba diaka ve mambu ya mbi sambu na mono kaka na ntangu yo yina. Sambu muntu yina kele mbeni na beto ve, yandi kele nduku na beto. Mono ke tubila beno mambu ya kieleka: Konso muntu yina ta pesa beno dikopa ya masa ya kunwa sambu beno kele bantu na mono Kristo, yandi ta baka matabisi na yandi.”

Mfunu kele ve sambu na muntu yai na kulanda Yezu kimuntu-kimuntu sambu na kuvanda na lweka na yandi. Dibundu ya Bukristu kuvandaka ntete ve ya kutungama, na mpila nde kukonda kuvanda na kati ya kibuka na bau vandaka kutendula ve nde yandi vandaka na dibundu ya nkaka. Muntu yango kuvandaka kibeni ti lukwikilu na zina ya Yezu mpi yandi kunungaka na kubasisa bampeve ya mbi. Yandi vandaka kusala kima mosi ya kufwanana kibeni ti yina ya Yezu kutubaka nde yau fwanaka na kubaka nsendo. Yezu kemonisa nde mutindu yandi kesala dyambu yai, yandi ta baka matabisi na yandi.

Kansi, inki zolaka kusalama kana bangogo ti bisalu ya bantumwa kutesisaka muntu yango sakuba? Yau zolaka kuvanda mpasi mingi! Yezu ketuba nde: “Na kati ya bana yai ya fioti ke tulaka ntima na mono, konso muntu yina [tatesa mosi na kati na bau sakuba, NW], kuluta mbote bo kangisa muntu yango yina ditadi ya nene na nkingu, ebuna bo losa yandi na nzadi-mungwa.”

Yezu ketuba nde balandi na yandi fwete kukatula konso kima yina kele mfunu na luzingu na bau bonso diboko, dikulu, to disu yina lenda kutesisa bau sakuba. Yau kele mbote na kukonda kima yai ya nge kezolaka mpi kukota na Kimfumu ya Nzambi, na kisika ya kukangama na yau mpi kulosama na Gehena (kisika ya bau vandaka kuyoka mvindu mfinama na Yeruzalemi), yina ketendula lufwa ya kimakulu.

Yezu kekebisa mpi nde: “Beno keba: beno kuvwenza ata leki mosi ve na kati ya baleki yai. Sambu mono ke tubila beno nde: Bawanzio na bo na zulu ke vandaka ntangu yonso na meso ya Tata na mono yina kele na zulu.” Na nima, yandi kepesa mbandu ya “baleki” ntangu yandi ketubila muntu yina kele ti mameme nkama, ebuna yandi mevidisa mosi. Yezu ketendula nde, muntu yango tabikisa yina yonso 99 sambu na kwenda kusosa mosi ya kuvilaka mpi ntangu yandi tamona yau, yandi tayangalala mingi sambu na yau kuluta sambu na 99 yina ya nkaka. Na nima, Yezu kesukisa nde: “Mutindu mosi, Tata na beno yina kele na zulu ke zolaka ve nde ata leki mosi na kati ya baleki yai kuvila.”

Ngatu na kuyindulaka ntembe yina kubasikaka na kati ya balongoki na yandi, Yezu mesyamisa nde: “Beno vanda [na] mungwa na kati na beno. Beno zinga na ngemba na kati na beno.” Bima ya masamasa kekumaka kitoko mingi na nsadisa ya mungwa. Yau yina, mungwa ya kifwani kekumisaka dyambu ya muntu ketuba mpasi ve na kundima. Kuvanda ti mungwa ya mutindu yina, tatanina ngemba.

Kansi, sambu na kukonda kukuka ya kimuntu, bantangu ya nkaka maswana ya ngolo tabasikaka. Yezu kupesaka mpi balutwadisu sambu na kubongisa yau. Yezu ketuba nde: “Kana mpangi na nge me sala nge mbi, kwenda kusonga yandi mbi yina ya yandi me sala nge. Kansi beno sala mambu yina kaka beno zole mpamba. Kana mpangi na nge me wila nge, tuba nde yandi me kuma diaka nduku na nge.” Yezu kelongisila nde, kana yandi mewila nge ve, “kwisa kunata muntu mosi to bantu zole ya nkaka. Mpidina, nge ta lungisa mambu yina ya bo sonikaka na Mukanda ya Nzambi nde: ‘Bantu zole to tatu fweti pesa kitemwe na bo na konso mambu ya bo me funda.”

Yezu ketuba nde, kaka na nsukansuka, nata makambu na “dibundu,” disongidila, na bankengi yina kele ti mikumba na kati ya dibundu yina lenda kubaka lukanu na nima ya kusambisa. Kana nsumuki melemfuka ve na lukanu na bau, Yezu kesukisa nde: “Beno sala yandi mutindu beno kesalaka bamimpani to bakalaki ya mpaku.”

Na kubakaka lukanu ya mutindu yina, bankengi fwete kusala na kuwakana mpenza ti bantuma yina kele na Ndinga ya Yehowa. Na yau, kana bau memona muntu mosi ya kele ti mbi to ya mefwana na kubaka ndola, mfundusu ‘tavandaka meyitaka kukangama na zulu.’ Mpi kana bau “me kangula . . . na ntoto,” disongidila, bau memona nde muntu yai kele na makambu ve, yau tavanda bau meyitaka “kangula mpi nzila na yo na zulu.” Na balukanu ya kusambisa ya mutindu yina, Yezu ketuba nde: “Na konso kisika yina ya bantu zole to tatu me kutakana na zina na mono, mono mpi kele pana ti bo.” Matayo 18:​6-20; Marko 9:​38-50; Luka 9:​49, 50.

▪ Na ntangu ya Yezu, sambu na inki yau vandaka mfunu ve na kufidisa yandi?

▪ Keti yau kele mbi mpenza na kutesisa leke mosi sakuba, mpi inki mutindu kingana ya Yezu kemonisa mfunu ya baleke ya mutindu yina?

▪ Mbala ya nkaka, inki mepusa Yezu nswalu na kusyamisa bantumwa na kuvanda ti mungwa na kati na bau mosi?

▪ Awa ‘kukanga’ ti ‘kukangula’ ketendula inki?