Kapu 95

Malongi Yina Metala Kufwa Makwela ti Zola Sambu na Bana

YEZU ti balongoki na yandi kele na nzila sambu na kukwenda na Yeruzalemi na Paki ya mvu 33 T.B. Bau mesabuka Nzadi ya Yordani mpi bau mebaka nzila yina kelutila na distrike ya Perea. Yezu vandaka na Perea mwa bamposo na ntwala, kansi na nima bau bingaka yandi na Yudea sambu nduku na yandi Lazare vandaka ya kubela. Ntangu bau vandaka na Perea, Yezu kutubilaka Bafarize mambu yina metala kufwa makwela, mpi ntangu yai bau mebasisa dyaka makambu yango.

Na kati ya Bafarize kele ti bimvuka ya bangindu ya kuswaswana na yina metadila kufwa makwela. Moize kutubaka nde bakala lenda kufwa makwela ti nkento na yandi kana yandi memona “kima mosi ya mbi” (NW) na yandi. Bamosi kekwikilaka nde yau ketadila kaka kukonda kwikama. Kansi bankaka ketadilaka “kima mosi ya mbi” nde yau kekotisa konso mambi yina ya fyoti. Ebuna, sambu na kumeka Yezu, Bafarize meyufula yandi nde: “Keti Bansiku na beto ke pesaka muntu nswa na kubikisa nkento na yandi na konso mambu ya mbi ya yandi me sala?” Bau ketula ntima nde konso kima yina ya Yezu tatuba tanatina yandi makambu ti Bafarize yina kele ti dibanza ya kuswaswana.

Yezu mepesa mvutu na ngyufula yango na mayele yonso, na kutubilaka ve konso ngindu yina ya bantu, kansi na kutubilaka lukanu ya kisina ya makwela. Yandi keyufula nde: “Keti beno me tangaka ve mambu yai na Mukanda ya Nzambi? ‘Na luyantiku, ntangu Nzambi salaka bantu, yandi salaka bo bakala ti nkento. Ebuna Nzambi tubaka nde: Yo yina, bakala ta bikisa tata na yandi ti mama na yandi, yandi ta kwenda kuvukana na nkento na yandi. Ebuna bo zole ta kuma [nsuni, NW] mosi.’ Mpidina bo kele diaka bantu zole ve kansi kaka [nsuni, NW] mosi mpamba. Yo yina, muntu lenda kabula ve yina ya Nzambi me vukisaka.”

Yezu kemonisa nde lukanu ya kisina ya Nzambi, kele nde bankwelani kubikala kumosi, nde bau kufwa ve dikwela. Bafarize mevutula nde, kana yau kele mpila yina, “Sambu na nki Moize songaka nde kana muntu ke bikisa nkento na yandi, yandi fweti pesa yandi mukanda nde [dikwela, NW] me fwa?”

Yezu mevutula nde: “Moize pesaka beno nswa ya kubikisa bankento na beno sambu beno kele ntu-ngolo. Kansi ntete yo vandaka mpidina ve.” Ee, ntangu Nzambi kutulaka mbandu ya makwela na masamba ya Edeni, yandi kuyidikaka ve kufwa makwela.

Yezu kelanda na kutubila Bafarize nde: “Mono ke tubila beno: Konso muntu yina ta bikisa nkento na yandi kana nkento yina me sala pite [na Kigreki, por·neiʹa] ve, ebuna muntu yina kukwela nkento ya nkaka, muntu yango me sala [bizumba, NW].” Mpila yai, yandi kemonisa nde por·neiʹa, disongidila nkadilu ya kuvukisa nitu ya mansoni kibeni, kele kikuma mosi kaka ya Nzambi kendimaka sambu na kufwa makwela.

Ntangu bau mebakisa nde makwela fwete kuvanda kikangilu mosi ya fwete kuzinga mpi kufwa kaka sambu na kikuma yai mpamba, balongoki mepusama na kutuba nde: “Kana yo kele mpidina na bakala ti nkento na yandi, kuluta mbote bantu kukwela ve.” Na ntembe ve, konso muntu yina kele na ngindu ya kukwela fwete kutadila mbotembote kikangilu ya makwela yina ya ntangu yonso!

Yezu kelanda na kutuba na yina metala kimpumpa. Yandi ketendula nde bana ya nkaka ya babakala mebutukaka bandingisi, na mpila nde bau lenda kukwela ve sambu binama na bau ya kibakala kele ve ya kuyela. Bankaka bantu mekumisaka bau bandingisi, na kuzengaka bau na nku yonso. Na nsuka, bantu ya nkaka mekatulaka mpusa ya kukwela mpi ya kusepela na kuvukisa nitu na mpila nde bau lenda kudipesa mingi na mambu yina metala Kimfumu ya mazulu. Yezu kesukisa nde: “Bika muntu yina lenda kusala yau [kubikala mpumpa] yandi kusala yau.” (NW)

Ntangu yai, bantu meyantika na kunata bana na bau ya fyoti na Yezu. Kansi, balongoki kenganina bana mpi kemeka na kukula bau, na ntembe ve, na kuzolaka kutanina Yezu na mayangisa ya mpamba-mpamba. Kansi Yezu ketuba nde: “Beno bikisa bana bo kwisa awa na mono. Beno kanga bo nzila ve, sambu Kimfumu ya Nzambi kele ya bantu yina kele bonso bo. Mono ke tubila beno mambu ya kieleka: Konso muntu me ndima Kimfumu ya Nzambi ve [bonso] mwana . . . yandi ta kota na Kimfumu yina ata fioti ve.”

Malongi ya mbote ya inki mutindu Yezu kepesa awa! Sambu na kubaka Kimfumu ya Nzambi, beto fwete kufulula kudikulumusa mpi mpeve ya kusosa kulongama yina kele ti bana ya fyoti. Kansi mbandu ya Yezu kemonisa mpi inki mutindu yau kele mfunu, mingimingi sambu na bibuti, na kulutisaka ntangu ti bana na bau. Yezu kemonisa ntangu yai zola na yandi sambu na bana ya fyoti na kubakaka bau na maboko na yandi mpi na kusakumunaka bau. Matayo 19:​1-15; Kulonga 24:1; Luka 16:18; Marko 10:​1-16; Luka 18:​15-17.

▪ Inki bangindu ya kuswaswana Bafarize kele na yau sambu na yina metala kufwa makwela, mpi sambu na yau, inki mutindu bau memeka Yezu?

▪ Inki mutindu Yezu mepesa mvutu na kikesa ya Bafarize mesala sambu na kumeka yandi, mpi inki yandi mepesa bonso kikuma mosi kaka sambu na kufwila makwela?

▪ Sambu na inki balongoki ya Yezu ketuba nde yau kele kuluta mbote kukonda kukwela, mpi inki ndongisila Yezu mepesa?

▪ Inki Yezu kelonga beto na mutindu na yandi ya kutadila bana ya fyoti?