Kapu 102

Kukota ya Kristu na Nkembo na Yeruzalemi

NA SUKA ya kilumbu ya kulanda, na Lumingu, Nisani 9, Yezu mekatuka na Betania ti balongoki na yandi mpi mekwenda na Yeruzalemi na kulutilaka na Ngumba ya Baolive. Na nima ya ntangu fyoti, bau mekuma penepene na Betfaze, bwala yina kele na Ngumba ya Baolive. Yezu metuma balongoki na yandi zole nde:

“Beno kwenda na bwala yina kele na ntwala; nswalu beno ta mona muna mpunda mosi ya nkento ya bo me kangaka na nsinga ti mwana na yandi. Beno kangula bo; ebuna beno kwisa kunata bo awa na mono. Kana muntu kuyula beno konso mambu, beno tubila yandi nde: ‘Mfumu ke na mfunu na bo,’ ebuna yandi ta bikisa bo kaka na ntangu yo yina.”

Ata nkutu na mbala ya ntete balongoki mebakisa ve nde bantuma yai ketadila ndungisa ya mbikudulu ya Biblia, na nima bau tabakisa nde yau kelungisa yau. Mbikudi Zakaria kutubaka na ntwala nde Ntotila ya Nzambi kusilaka takota na Yeruzalemi na zulu ya mwana ya mpunda, ee, “na zulu ya mbisi ya kuyela, mwana ya mpunda ya nkento.” Ntotila Salomo kutambulaka mpi mutindu mosi na zulu ya mwana ya mpunda ya nkento na ntangu yandi kwendaka kupakulama.

Ntangu balongoki mekota na Betfaze mpi mebaka mwana ya mpunda ti mama na yau, bantu ya nkaka yina kele ya kutelama metubila bau nde: “Sambu na nki beno ke kangula mpunda yai?” Kansi ntangu bau metubila bau nde bambisi yango kele sambu na Mfumu, bantu yango mebikisa balongoki na kunata yau na Yezu. Balongoki metula bilele na bau ya zulu na zulu ya mpunda ti mwana na yau, kansi Yezu memata na zulu ya mwana ya mpunda.

Na ntangu ya Yezu kekwenda na Yeruzalemi, bantu kekuma mingi. Bantu mingi ketanda bilele na bau ya zulu na nzila, ebuna bantu ya nkaka kezenga balutangu ya banti mpi ketanda yau. Bau keboka nde: “Mfumu Nzambi kusakumuna ntotila ya nene ke kwisa na zina na yandi! Ngemba kuvanda na zulu, lukumu kuvanda na [bisika ya kuluta kuzanguka, NW]!”

Bafarize ya nkaka yina kele na kati ya kibuka mewa mpasi na ntima sambu na kukumisa yai ebuna bau metubila Yezu nde: “Longi, tubila balonguki na nge bo vanda pima.” Kansi Yezu mevutula nde: “Kana bo vanda pima, matadi ta tuba na ndinga ya ngolo.”

Ntangu Yezu kefinama na Yeruzalemi, yandi metala mbanza mpi meyantika na kudila yau, na kutubaka nde: “A, Yeruzalemi, kana nge mpi zabaka bubu yai mambu yina ke nataka ngemba! Kansi mawa, nge lenda zaba yo ve.” Sambu na kukonda kulemfuka na yandi na luzolo yonso, Yeruzalemi fwete kufuta ntalu, mutindu Yezu ketuba na ntwala nde:

“Bambeni na nge [bantu ya Roma yina tatwadisama na Zenerale Titus] ta kwisa kuziunga nge. Bo ta tula-tula bamwa-ngumba ya ntoto penepene na bibaka na nge sambu na kumatila. Bo ta kangisa nge na ndambu yonso. Bo ta fwa nge mvimba, nge ti bantu na nge. Bo ta bikila nge ve ata ditadi mosi na zulu ya ditadi ya nkaka.” Mbungulu ya Yeruzalemi ya Yezu kubikulaka kusalamaka kibeni bamvula 37 na nima, na mvu 70 T.B.

Kaka mwa bamposo na ntwala, bantu mingi na kati ya bibuka kumonaka Yezu kefutumuna Lazare. Ntangu yai bau ketela bantu ya nkaka kimangu yango. Ebuna ntangu Yezu mekota na Yeruzalemi, mbanza yonso menikana. Bantu keyufula nde: “Muntu yai kele nani?” Ebuna bantu kelanda na kutubila bau nde: “Yai kele profete Yezu; yandi kele muntu ya Nazareti na ntoto ya Galilea!” Na ntangu bau kemona mambu yina kesalama, Bafarize kebokuta sambu bau kekuka ve na kusala ata kima mosi, yau yina, mutindu bau ketuba: “Bantu yonso me yantika kulanda yandi.”

Mutindu yandi meyikanaka na kusala kana yandi mekuma na Yeruzalemi, Yezu mekwenda na tempelo sambu na kulonga. Kuna bifwa-meso ti bifwa-makutu kekwisa na yandi, mpi yandi kebelula bau! Ntangu bambuta ya banganga-Nzambi ti balongi ya Bansiku memona mambu ya kuyituka ya Yezu kele na kusala mpi ntangu bau kewa bana ya babakala na kati ya tempelo keboka nde, “[Gulusa, beto kelomba na nge, NW] Mwana ya Davidi!” bau mewa makasi. Bau meyufula nde: “Nge ke wa mambu ya bo ke tuba?”

Yezu mevutula nde: “Mbote-mbote. Keti beno me tangaka ntete ve mambu yai na mukanda ya Nzambi nde: ‘Nge me longaka bana yina ke nwaka mabele ya bamama na bo, ti bana ya nkaka, sambu bo kupesa nge lukumu’?”

Yezu kelanda na kulonga, mpi yandi metala na nzyunga ya bima yonso yina kele na tempelo. Na mbala mosi, ntangu meluta. Ebuna yandi mekatuka, kumosi ti balongoki 12, mpi yandi mevutuka na bakilometere 3 na Betania. Kuna yandi melala na mpimpa ya Lumingu, ngatu na nzo ya nduku na yandi Lazare. Matayo 21:​1-11, 14-17; Marko 11:​1-11; Luka 19:​29-44; Yoane 12:​12-19; Zakaria 9:​9, NW.

▪ Inki ntangu mpi inki mutindu Yezu mekota bonso Ntotila na Yeruzalemi?

▪ Keti yau kele mfunu nde bibuka kukembisa Yezu?

▪ Inki mutindu Yezu mekudiwa ntangu yandi mekota na Yeruzalemi, mpi inki mbikudulu yandi mezabisa?

▪ Inki mesalama ntangu Yezu mekwenda na tempelo?