Kapu 103

Yezu Mekwenda Dyaka na Tempelo

YEZU ti balongoki na yandi mekatuka kusala mpimpa na bau ya tatu na Betania kubanda bau katukaka na Yeriko. Ntangu yai, ntongo ya Kintete, Nisani 10, metanina bau na nzila ya Yeruzalemi. Yezu mewa nzala. Ebuna ntangu yandi memona nti ya bafige yina kele ti matiti, yandi mekwenda kutala kana yau kele ti bafige.

Matiti ya nti yai memena na ntwala nsungi kulunga, sambu nsungi ya bafige keyantikaka ve na ntwala ya ngonda ya Yuni, mpi yai kele nsuka ya Marsi. Kansi, Yezu keyindula nde sambu matiti meyita kubasika, bafige mpi lenda kuvanda mebuta na ntwala. Kansi nsoni mebaka yandi. Matiti ya nti yai kele ya luvunu na kutala na meso. Ebuna, Yezu mesinga nti yango, na kutubaka nde: “Bantu ta diaka bambuma na nge diaka ve!” Malanda ti ntendula ya kima ya Yezu mesala tabakisama na nima ya midi ya kilumbu talanda.

Na kulandaka kukwenda, Yezu ti balongoki na yandi mekinga ve na kukuma na Yeruzalemi. Yandi mekwenda na tempelo yina ya yandi kutalaka na nima ya midi ya mazono. Kansi, bubu yai, yandi mesala kima mosi, kaka mutindu yandi salaka bamvula tatu na ntwala ntangu yandi kwisaka na Paki ya mvu 30 T.B. Yezu mekula bayina keteka mpi kesumba na kati ya tempelo mpi yandi melosa bamesa ya bansobisi ti bakiti ya bateki ya bapizyo. Yandi mepesa nswa ata na muntu mosi ve na kuluta ti kima na kati ya tempelo.

Na kubedisaka bayina kesobisa mbongo mpi keteka bambisi na kati ya tempelo, yandi ketuba nde: “Keti bo sonikaka na Mukanda ya Nzambi ve nde: ‘Nzo na mono ta vanda nzo ya bisambu sambu na makanda yonso’? Kansi beno me kumisaka yo nzo ya bamiyibi!” Bau kele bamiyibi sambu bau kelombaka ntalu ya kuluta mingi na bayina kele na mpila ya nkaka ve ya kusala katula kusumba bambisi ya bau kele na yau mfunu sambu na kimenga. Ebuna Yezu memona mutindu ya kinkita yai bonso mpila ya kubotula bantu bima to kuyiba.

Ntangu bambuta ya banganga-Nzambi, balongi ya Bansiku, ti bantu ya nene na kati ya bantu memona mambu ya Yezu mesala, bau meyantika na kusosa mpila ya kufwa yandi. Mpila yina, bau memonisa nde bau lenda kubonga diaka ve. Kansi, bau kemona ve mpila ya kufwa Yezu sambu bantu yonso kelanda yandi sambu na kuwidikila yandi.

Katula bantu ya kubutukaka na kikanda ya Bayuda, Bantu ya Makanda mpi mekwisa na Paki. Bau kele baprozelite, disongidila nde bau kukotaka na dibundu ya Bayuda. Bagreki ya nkaka, na ntembe ve baprozelite, mepusana ntangu yai na Filipo mpi bau melomba na kumona Yezu. Filipo mekwenda na Andre, mbala ya nkaka sambu na kuyufula kana lukutakanu ya mutindu yina tavanda mbote. Yau kemonana nde Yezu kele kaka na tempelo, kisika Bagreki lenda kumona yandi.

Yezu kezaba nde bilumbu ya luzingu na yandi mebikala fyoti, ebuna yandi metela mvwandilu na yandi kingana ya mbote kibeni: “Sesepi yai ntangu me lunga, Mwana-muntu ke baka lukumu na yandi. Mono ke tubila beno mambu ya kieleka: Mbuma ya ble ke bikalaka kaka mbuma mosi kana yo kubwa ve na ntoto, ti kana yo kufwa ve. Kansi kana yo fwa, yo ke butaka bambuma mingi.”

Mbuma mosi ya ble kele ti mbalu ya fyoti. Kansi, inki tasalama kana yau mekunama na ntoto mpi yau “mefwa,” na kusukisaka luzingu na yau bonso nkeni? Na nima yau kemenaka mpi yau kekulaka, ye yau kekumaka nti sambu na kubuta bambuma mingi ya ble. Mutindu mosi, Yezu kele muntu mosi kaka ya kukuka. Kansi kana yandi kufwa ya kwikama na Nzambi, yandi takuma nzila ya kupesila luzingu ya mvula na mvula na bantu ya kwikama yina kele ti mpeve ya kuditambika ya mutindu mosi na yina ya yandi kele na yau. Yau yina, Yezu ketuba nde: “Muntu yina ke zolaka moyo na yandi, yandi ta vidisa yo; kansi muntu yina ke [yinaka, NW] moyo na yandi ya nsi-ntoto yai . . . yandi ta bumba yo sambu na moyo ya mvula na mvula.”

Yezu kekudiyindula kaka yandi mosi ve ata fyoti, sambu yandi ketendula na nima nde: “Kana muntu zola sadila mono, yandi fweti kwenda nzila mosi ti mono; mpidina muntu na mono ya kisalu ta vanda na kisika yina ya mono kele. Tata na mono ta pesa lukumu na muntu yina ke sadilaka mono.” Nsendo ya kitoko ya inki mutindu na kulanda Yezu mpi na kusadila yandi! Yau kele nsendo ya kukumisama na Tata sambu na kuvukana ti Kristu na Kimfumu.

Na kuyindulaka na yina metala mpasi ya mingi ti lufwa ya mpasi yina kevingila yandi, Yezu kelanda nde: “Ntangu yai mono ke mona mpasi na ntima. Ebuna nki mono lenda tuba? . . . Tata, katula mono na mambu yai ke kwisila mono ntangu yai.” Ah, kana mpila kuvandaka ya kutina yina kevingila yandi na ntwala! Kansi, ve, mutindu yandi ketuba: “Mono kwisaka sambu na kumona mpasi na ntangu yai.” Yezu kendima ngidika yonso ya Nzambi, ti yina ya lufwa na yandi ya kuditambika. Matayo 21:​12, 13, 18, 19; Marko 11:​12-18; Luka 19:​45-48; Yoane 12:​20-27.

▪ Sambu na inki Yezu metula ngindu ya kukuta bafige ata nkutu nsungi na yau melunga ntete ve?

▪ Sambu na inki Yezu kebinga bayina ketekaka na tempelo “bamiyibi”?

▪ Na inki mutindu Yezu kele bonso mbuma ya ble ya kefwa?

▪ Inki mutindu Yezu kekudiwa na yina metala mpasi ti lufwa ya kevingila yandi?