Tuba Mutindu Nge Kesolulaka

MBALA mingi bantu kevandaka na kyese kana bo kesolula ti banduku na bo. Bo ketubaka mambu yina mekwisila bo mbala mosi na mabanza. Bantu yankaka ketubaka mingi, kansi bankaka ketubaka mingi ve. Ata mpidina, kutuba mutindu nge ketubaka kesepidisaka bantu yankaka mpi kepusaka bo na kukota na disolo.

Kansi, kana nge kesolula ti nzenza, yo kele mbote ve na kutuba na mutindu mosi yina tamonisa nde beno mezabanaka banda ntama to bonso nde nge kesolula ti nduku. Ya kyeleka, na bisika mingi masolo yonso ti banzenza keyantikaka ti bangogo ya luzitu mingi. Na nima ya kusonga luzitu ya kufwana, yo tavanda mbote na kukotisa na mayele kutuba ya kinduku mpi ya kemonisa mutindu nge kesolulaka.

Kana nge ketuba na zulu ya estrade, nge fwete keba mpi. Kana nge ketuba bonso nde nge kesolula ti banduku, yo lenda katula kilo ya beto kepesaka na balukutakanu na beto ya Bukristu mpi na mambu ya nge ketuba. Na bandinga yankaka, yo kelombaka kusadila bangogo ya mefwana sambu na kutubila mbuta, longi, mfumu, to kibuti mosi. (Tala bangogo ya bo mesadila na Bisalu 7:2 mpi 13:16.) Bo mesadila bangogo ya kuswaswana sambu na kutubila nkwelani to nduku mosi ya ngolo. Ata mutindu na beto ya kutuba na zulu ya estrade fwete vanda ve bonso nde beto ketuba na ntwala ya mfumu mosi, yo fwete vanda ya luzitu.

Kansi, kele ti mambu ya lenda sala nde muntu kuyantika kutuba bonso nde yandi kele na boma to nde yandi ketuba na ntwala ya mfumu mosi. Mosi na kati ya mambu yango kele mutindu yandi meyidika bansa to bimvuka ya bangogo. Dyambu ya mpasi kebasikaka kana mutubi kesala ngolo sambu na kuvutukila bimvuka ya bangogo kaka mutindu yo kele ya kusonika na mukanda. Bangogo ya kusonika kevandaka mbala mingi ya kuswaswana ti bangogo ya kutuba na munoko. Ya kyeleka, na ntangu beto kebongisa disolo, beto kesadilaka mbala mingi mikanda sambu na kusosa bansangu yankaka. Malongi ya diskure ya beto keyidika kevandaka ntangu yankaka ya kusonika na pula. Kansi kana nge kebasisa bangindu kaka mutindu bo ketubila yo na mukanda to nge ketanga yo mbala mosi na pula ya bo pesaka nge ntangu nge kesala diskure na nge, zaba nde kutuba na nge tawakana ve bonso mutindu nge kesolulaka. Sambu na kulanda na kutuba mutindu nge kesolulaka, tubaka na bangogo na nge mosi mpi kusadila ve bansa ya mpasi-mpasi.

Dyambu yankaka ya kutadila kele kusoba vitesi ya kutuba. Kutuba bonso na boma to bonso na ntwala ya bamfumu kesalaka mbala mingi nde muntu kusadila bangogo yina kevandaka ti vitesi ya mutindu mosi ya kulemba mpi kupema-pema na kati ya bangogo. Na kusolula ya konso kilumbu beto kesobaka vitesi mpi ntangu ya kupema.

Ya kyeleka, ntangu nge ketuba na ntwala ya bantu mingi, nge fwete tubaka mutindu nge kesolulaka mpi kumatisa volime, kutuba na ndinga ya ngolo, mpi kutuba ti tiya yonso sambu na kusimba dikebi na bo.

Sambu na kutuba mpenza mutindu nge kesolulaka na ntangu nge kesala kisalu ya kusamuna, nge fwete sala ngolo na kutubaka mbote konso kilumbu. Yo ketendula ve nde nge fwete kota banzo-nkanda ya nene. Kansi yo kele mbote na kukuna kikalulu ya mbote ya kutuba yina tasadisa bankaka na kuzitisa mambu yina nge ketuba. Ti mambu yai na mabanza, tala kana yo kelomba nde nge tomisa mambu yai melanda na mutindu na nge ya kusolula ya konso kilumbu.

1.  Kusadila ve bangogo yina kefwa bansiku ya gramere to yina lenda nata bantu na kufwanisa nge na bantu yina kezitisaka ve bansiku ya Nzambi na luzingu na bo. Na kuwakana ti ndongisila yina kele na Kolosai 3:8, kusadila ve kutuba ya nsoni to ya mbi. Kansi, kusadila bangogo ya bantu meyikanaka na yo kele mbi ve. Kutuba mutindu bantu meyikanaka, to bangogo ya bantu kesadilaka mingi konso kilumbu kezitisaka ve bansiku mingi ya ndinga, kansi bantu kendimaka yo.

2.  Kuvutukilaka ve bangogo ya mutindu mosi mbala mingi sambu na kutendula konso dibanza yina nge ketubila. Zaba kusadila bangogo yina ketendula pwelele mambu ya nge kezola kutuba.

3.  Kuvutukilaka ve mpamba-mpamba mambu ya nge metuba dezia kansi yindulaka mbote mambu ya nge kezola kutuba, na nima tuba.

4.  Kusadila ve bangogo mingi kuluta, kana ve bangindu ya mfunu tabasika ve mbote. Vanda ti kikalulu ya kusadila bansa ya nkufi sambu na kutuba pwelele dyambu ya nge kezola nde bantu kusimba.

5. Tubaka na mutindu mosi ya kesonga nde nge kezitisaka bantu yankaka.