Tuba Mutindu Nge Ketubaka

KANA nge ketuba mutindu nge ketubaka konso kilumbu, yo tasadisa bantu yankaka na kutudila nge ntima. Keti nge tatula ntima na kima yina muntu mosi ya melwata munganzi na luse na yandi ketubila nge? Keti nge tatudila yo ntima mingi kana munganzi yango ya yandi melwata kemonana kitoko kuluta luse ya mutubi? Ve. Yo yina, na kisika ya kusoba mutindu na nge ya kutuba, tuba mutindu nge ketubaka konso kilumbu.

Kutuba mutindu nge ketubaka konso kilumbu ketendula ve kutuba kukonda dikebi. Yo kele mbote ve na kukonda kuzitisa bansiku ya gramere, na kutuba bangogo kifu, mpi na kukonda kutuba bangogo pwelele. Yo kele mpi mbote ve na kusadila kutuba ya balabala. Beto kezolaka kumonisa ntangu yonso lukumu ya kufwana, yo vanda na kutuba mpi na bikalulu na beto. Muntu yina ketubaka mutindu yandi ketubaka konso kilumbu kesobaka ve mutindu na yandi ya kutuba mpi susi na yandi kevandaka ve ya kuyitukisa bankaka.

Na Kisalu ya Bilanga. Keti nge kewaka boma kana nge mefinama ti nzo mosi to kana nge mepusana penepene ti muntu mosi na kisika ya bantu mingi ti dibanza ya kuta kimbangi? Bantu mingi na kati na beto kewaka boma, kansi boma yango kezingaka mingi na bantu yankaka. Boma lenda sala nde ndinga kusoba to yo tekita, to yo lenda monana na mutindu muntu yango kenikisa-nikisa maboko to ntu na mutindu ya mefwana ve.

Bikuma kele mingi yina lenda sala nde nsamuni mosi kuwa boma. Mbala yankaka yandi keyindula mutindu bantu yina kelanda yandi tamona yandi to yandi kekudiyula kana disolo na yandi tavanda mbote. Mambu yai kekuminaka bantu mingi, kansi yo kekumaka mbi kana nge tudila yo dikebi kuluta mingi. Inki lenda sadisa nge kana nge kewaka boma na ntwala ya kubasika na kisalu ya bilanga? Kudibongisa mbote mpi kisambu ya masonga na Yehowa. (Bis. 4:29) Yindula mawa ya nene yina Yehowa kemonisa ntangu yandi kebinga bantu na kukuma ti mavimpi ya kukuka mpi na kubaka luzingu ya mvula na mvula na Paladisu. Yindula bantu yina nge kesala kikesa na kusadisa mpi mpusa ya bo kele na yo ya kuwa nsangu ya mbote.

Kuvila mpi ve nde bantu kele ti kimpwanza ya kupona mambu ya bo mezola, yo yina bo lenda ndima to kubuya nsangu ya nge kezabisa bo. Yo salamaka mpi mutindu mosi ntangu Yezu vandaka kulonga na Izraele ya ntama. Kisalu na nge kele kaka kulonga. (Mat. 24:14) Ata na ntangu bantu kebikila nge ve nzila ya kutuba, kumonana ya nge memonana na ntwala na bo kele kimbangi ya mvimba. Nge menunga na kulungisa mukumba na nge sambu nge kendima nde Yehowa kusadila nge sambu na kulungisa luzolo na yandi. Kansi na baokazio yina nge kele ti dibaku ya kutuba, inki mambu nge tatuba? Kana nge longuka na kutula mabanza na nge na bampusa ya bantu yankaka, mambu ya nge tatuba tavanda ya kitoko mpi nge tatuba yo mutindu nge ketubaka konso kilumbu.

Ntangu nge keta kimbangi, kana nge kesala mpi ketuba mutindu nge ketubaka konso kilumbu, yo tasepidisa bawi na nge. Nkutu bo lenda ndima kukonda mpasi bangindu ya Masonuku yina nge kezola kuzabisa bo. Na kisika ya kusadila bo diskure, yo kele mbote na kusolula ti bo. Solula ti bo bonso banduku. Tudila bo dikebi, mpi widikila mambu ya bo ketuba. Ya kyeleka, kana na kisika yina ndinga to bikalulu ya bwala kele ti bansiku yina muntu fwete zitisa sambu na kumonisa luzitu kana yandi kesolula ti banzenza, yo tavanda mbote na kuzitisa bansiku yango. Kansi nge lenda mwetaka ntangu yonso.

Na Estrade. Kana nge ketuba na ntwala ya bantu mingi, yo kevandaka mbala mingi mbote na kusala disolo mutindu nge ketubaka konso kilumbu. Ya kyeleka, kana bawi kele mingi, yo talomba nde nge tombusa ndinga na nge na ntangu nge ketuba. Kana nge meka kusimba diskure na nge na ntu to kana nge fulusa banoti na nge ti mambu ya fyotifyoti, yo kele pwelele nde nge kekudibanza mingi na kusonika na mutindu ya sikisiki mpenza mambu yonso ya nge tatuba. Yo kele mfunu na kusadila bangogo ya mbote, kansi kana nge tudila yo dikebi kuluta mingi, nge takuka ve kutuba mutindu nge ketubaka konso kilumbu mpi nge takangama-kangamaka. Kutuba na nge tavanda ve bonso yina nge kesadilaka konso kilumbu. Nge fwete yindula na ntwala bangindu ya nge tatuba mpi kusala yo mbotembote, kansi tula dikebi ya kuluta mingi na bangindu, kansi na bangogo ve.

Nge fwete sala mpi mutindu yina na ntangu bo keyula nge bangyufula na lukutakanu mosi. Kudibongisa mbote, kansi kutangaka ve to kusimba ve bamvutu na nge na ntu. Ntangu nge kepesa bamvutu na nge, nge fwete tubaka mutindu nge ketubaka konso kilumbu sambu bamvutu yango kumonana nde yo kekatukaka na ntima.

Ata bikalulu ya mutubi ya mbote, kana nge lutisa ndilu na mutindu nge kesadila yo, bawi lenda mona neti nde nge ketuba ve mutindu nge ketubaka konso kilumbu. Mu mbandu, nge fwete tubaka pwelele mpi kutuba bangogo mbote, kansi nge fwete sala yo ve na mpila nde nge yantika kutuba mutindu nge ketubaka ve. Kana nge kesadila mbote bidimbu sambu na kunyata bangindu ya mfunu to bidimbu sambu na kutendula bangindu, yo lenda yika ngolo na disolo na nge, kansi bidimbu ya kuganga to ya kulutisa ndilu takatula dikebi ya bawi na mambu ya nge ketuba. Sadila volime ya kufwana, kansi kusadila ve volime ya kuluta mingi. Bantangu yankaka, yo kevandaka mbote na kuyika kikesa na disolo na nge, kansi kusosa ve kuyitukisa bawi na kutuba na nge. Nge fwete sadila kusoba ndinga, kutuba ti kikesa, mpi mawi na mutindu mosi ya kebenda ve dikebi ya bantu na kimuntu na nge mosi to na mutindu yina lenda katula kyese ya bawi na nge.

Bantu mingi kevandaka na mutindu ya sikisiki ya bo ketubaka, ata ntangu bo kesala ve diskure. Bankaka ketubaka bonso bo kesolula. Kima ya kuluta mfunu kele kutuba na mutindu mosi ya mbote konso kilumbu mpi kuvanda ti bikalulu yina kewakana ti lukumu ya Bukristu. Ebuna ntangu nge tamata na estrade, nge tamona mpasi ve na kutuba mpi na kusala mambu mutindu nge kesalaka yo konso kilumbu.

Ntangu Nge Ketanga na Ntwala ya Bantu. Yo kelombaka kusala kikesa mingi sambu na kutanga mutindu nge ketubaka na ntangu nge ketanga na ntwala ya bantu. Sambu na kusala yo, nge fwete zaba bangindu ya mfunu ya malongi yina nge tatanga, mpi tala mutindu bo ketendula yo. Bangindu yai fwete vanda pwelele na mabanza na nge; kana ve, nge tatangaka bangogo kaka sambu na kutanga. Zikisa mutindu ya mbote ya kutuba bangogo ya nge meyikanaka na yo mingi ve. Meka na kutanga yo na ndinga ya ngolo sambu na kuzaba kisika ya mbote ya kusoba ndinga mpi ya kuvukisa bangogo na mpila nde yo basisa pwelele bangindu. Vutukila yo mbala mingi tii kuna nge tatanga kukonda kukangama. Zaba malongi na nge mbote na mpila nde ntangu nge tatanga yo na ndinga ya ngolo, lutangu na nge kuwakana bonso disolo mosi ya tiya. Yo yina kima ya beto kebinga nde kutuba mutindu nge ketubaka konso kilumbu.

Ya kyeleka, mambu mingi ya beto ketangaka na ndinga ya ngolo na ntwala ya bantu kekatukaka na mikanda na beto yina ketendulaka Biblia. Katula badevware ya kutanga na Nzo-Nkanda ya Kisalu ya Teokrasi, beto ketangaka baverse na kisalu ya bilanga mpi ntangu beto kesalaka masolo na estrade. Bo kelombaka bampangi ya babakala na kutanga baparagrafe ya malongi ya beto ketadilaka na Kulonguka ya Nzozulu ya Nkengi mpi na Kulonguka ya Mukanda ya Dibundu. Bo kepesaka bampangi ya babakala yankaka ya kufwana mikumba ya kutanga badiskure maniskri na ntwala ya bawi na lukutakanu ya distrike. Yo vanda nge ketanga Biblia to mukanda yankaka, tanga bitini yina kele na kati ya ba guillemets na mutindu mosi ya keswasisa yo ti mambu yankaka ya nge ketanga. Kana bo kevutukila bangogo ya bantu ya kuswaswana, soba ndinga na nge ntangu nge ketanga bangogo ya konso muntu. Lukebisu: Kukumisa yo ve bonso nsaka, kansi tanga ti kikesa mpi sala yo mutindu nge ketubaka.

Kana muntu ketanga mutindu yandi ketubaka, kutanga na yandi kewakanaka bonso disolo. Kutanga yango kewakanaka ve bonso ya kingolongolo, kansi yo kevandaka ti mawi.