Ntoto ya mpa ya Nzambi Silaka

BIBLIA, Ndinga ya kusonama ya Nzambi, kepesa beto kivuvu ntangu yo ketuba nde: “Beto ke vingila nde Nzambi kubasisa zulu ya mpa ti ntoto ya mpa, yina ya yandi silaka beto; kuna bantu yonso ta lemfuka kaka na Nzambi konso ntangu.”​—2 Piere 3:13.

“Zulu ya mpa” kele inki? Biblia kesadilaka ngogo zulu sambu na kutubila luyalu. (Bisalu 7:49) “Zulu ya mpa” kele luyalu ya mpa yina tayala ntoto. Yo kele ya mpa sambu yo tayinga ngidika ya luyalu ya ntangu yai; yo kele mpi kitambi mosi ya mpa na kulungana ya lukanu ya Nzambi. Yezu kulongaka beto na kusamba sambu na Kimfumu yango. (Matayo 6:10) Sambu Nzambi kele Nto na yo mpi yandi kezingaka na zulu, bo kebingaka Kimfumu yango nde “kimfumu ya zulu.”​—Matayo 7:21, NW.

“Ntoto ya mpa” kele inki? Yo kele ve ntoto yankaka ya mpa, sambu Biblia ketuba pwelele nde bantu tazingaka na ntoto kimakulu. “Ntoto ya mpa” kele kimvuka ya mpa ya bantu. Yo tavanda ya mpa sambu Nzambi takatula bantu ya mbi. (Bingana 2:21, 22) Ebuna, bantu yonso yina tazinga kuna takumisa mpi talemfukila Ngangi, mpi bo tazinga na kuwakana ti bansiku na yandi. (Nkunga 22:28) Ntangu yai, bo ke na kubinga bantu ya bansi yonso na kulonguka bansiku yango mpi na kuwakanisa luzingu na bo ti yo. Keti nge ke na kusala yo?

Na ntoto ya mpa ya Nzambi, bantu yonso tazitisaka luyalu na Yandi. Keti zola ya nge kele na yo sambu na Nzambi kepusaka nge na kulemfukila yandi? (1 Yoane 5:3) Keti yo kemonanaka na nzo na nge? na kisika ya kisalu to na nzo-nkanda? na mutindu ya nge ke na kusadila luzingu na nge?

Na ntoto yina ya mpa, bantu tavukana na lusambu ya Nzambi ya kyeleka. Keti nge kesambilaka Ngangi ya zulu ti ntoto? Keti lusambu na nge kevukisa nge mpenza ti bansambidi ya makanda, ya bampusu ya nitu, mpi ya bandinga yonso?​—Nkunga 86:9, 10; Yezaya 2:2-4; Sofonia 3:9.

[Lupangu ya kele na lutiti 17]

Nzambi Yina Kesila Bima Yai

Yandi kele Ngangi ya zulu mpi ya Ntoto. Yandi kele muntu yina Yezu Kristu kubingaka nde “Nzambi mosi [kaka] ya kieleka.”​—Yoane 17:3.

Bantu mingi kepesaka lukumu na banzambi ya bo mesalaka bo mosi. Mingi dyaka kefukiminaka bifwanisu ya kukonda luzingu. Bankaka kekumisaka bimvuka ya bantu, bafilozofi, to bampusa na bo mosi. Ata bayina ketubaka nde bo kesadilaka Biblia, bo yonso ve kekumisaka zina ya muntu yina Biblia kebinga nde “Nzambi ya [kyeleka].”​—Kulonga 4:35.

Ngangi ketuba sambu na yandi mosi nde: “Mono kele Yehowa. Yo yina zina na mono.” (Yezaya 42:5, 8, NW) Zina yai kemonana bambala kiteso ya 7 000 na bandinga ya kisina ya Biblia. Yezu Kristu kulongaka balongoki na yandi na kusamba nde: “Tata na beto kele na zulu, zina na nge ya santu kuvanda ya lukumu.”​—Matayo 6:9.

Nzambi ya kyeleka kele muntu ya nki mutindu? Yandi mosi ketuba nde yandi kele ‘Nzambi mosi ya kezolaka bantu ti kuwila bo mawa; yandi kewaka makasi nswalu ve kansi yandi kesongaka kaka mambote na yandi. Yandi ke salaka mambu yonso ya yandi ketubaka,’ yandi kenungisaka ve ata fyoti bantu yina kezitisaka ve bansiku na yandi na zola yonso. (Kubasika 34:6, 7) Disolo ya bangwisana na yandi ti bantu kemonisa mpenza nde mambu yina kele ya kyeleka.

Beto fwete santisa, to kubaka bonso santu, zina mpi munkwa ya zina yango. Sambu yandi kele Ngangi mpi Mfumu ya Bima Yonso, yandi mefwana na kubaka bulemfu mpi lusambu na beto yonso. Keti nge kepesaka yandi yo?

[Lupangu/Kifwanisu ya kele na lutiti 18]

Inki Bansoba “Zulu ya Mpa ti Ntoto ya Mpa” Tanata?

Ntoto takituka Paladisu Luka 23:43

Kisalu ya mbote, madya mingi Yezaya 25:6; 65:17, 21-23

[Lupangu/Bifwanisu ya kele na lutiti 19]

Keti Nge Takota na Inza ya Mpa?

Nzambi ketubaka ve luvunu!​—Tito 1:2.

Yehowa ketuba nde: “Mambu yina ke katukaka na munoko na mono, yo ke vutuka ve mpamba na mono kana yo me sala ve ntete luzolo na mono, kana yo me lungisa ve bangindu na mono.”​—Yezaya 55:10, 11.

Yehowa ke na kuganga dezia “zulu ya mpa ti ntoto ya mpa.” Luyalu ya zulu ke na kusala dezia. Bo metulaka dezia fondasio ya “ntoto ya mpa.”

Na nima ya kumonisa ndambu ya mambu ya kitoko yina “zulu ya mpa ti ntoto ya mpa” tanatila bantu, mukanda ya Kusonga kevutukila mambu yina Nzambi, Mfumu ya Bima Yonso, ketuba: “Ntangu yai mono ke sala bima yonso ya mpa!” Yandi ketuba dyaka nde: “Sonika mambu yai, sambu mambu yai ya mono ke tuba kele ya kieleka, nge lunga tula ntima na yo.”​—Kusonga 21:1, 5.

Ngyufula ya mfunu yo yai, Keti beto kesala bansoba yina kele mfunu sambu na kuvanda na kati ya bantu yina mefwana na kuzinga na “ntoto ya mpa” na nsi ya luyalu ya “zulu ya mpa”?