Kimangu ya Zole na Kana

Na nima ya kusala bilumbu zole na Samaria, Yezu me kwenda na bwala na yandi. Yandi me katuka kusala kisalu ya nene ya kulonga na Yudea. Kansi yandi me vutuka ve na Galilea sambu na kupema. Yandi me yantika kisalu ya nene ya kulonga na bwala yina yandi yelaka. Ziku yandi ke yindula ve nde bo ta yamba yandi mbote, sambu yandi mosi tubaka nde: “Mbikudi ke vandaka ve na lukumu na bwala na yandi mosi.” (Yoane 4:44) Kansi na kisika ya kubikala ti yandi, balongoki na yandi me vutuka na bwala na bo mpi na mabuta na bo sambu na kusala bisalu yina bo vandaka kusala ntete.

Inki nsangu Yezu me yantika kulonga? Yandi ke tuba nde: “Kimfumu ya Nzambi me kuma pene-pene. Beno balula ntima, mpi beno kwikila na nsangu ya mbote.” (Marko 1:15) Inki bawi me sala? Ya kieleka, bantu mingi ya Galilea me yamba Yezu mbote, bo me pesa yandi lukumu. Bo me sala yo ve kaka sambu na mambu yina yandi me longa. Bangonda mingi me luta, bantu ya nkaka ya Galilea vandaka na Yeruzalemi na Nkinsi ya Paki mpi bo monaka mambu ya nene yina Yezu salaka.—Yoane 2:23.

Na wapi Yezu me yantika kisalu na yandi ya nene ya kulonga na Galilea? Ziku na Kana, mbanza yina yandi kumisaka masa vinu na nkinsi mosi ya makwela. Ntangu Yezu me kwisa na Kana sambu na mbala ya zole, yandi me wa nde mwana-bakala mosi ke bela ngolo mpi ke zola kufwa. Yandi kele mwana ya kapita ya Erode Antipasi, ntotila yina zengaka Yoane Mbotiki ntu. Kapita yina me wa nde Yezu me katuka na Yudea mpi yandi ke kwenda na Kana. Yo yina yandi me katuka na bwala na yandi na Kapernaumi mpi me kwenda na Kana sambu na kumona Yezu. Yandi kele na mawa ya mingi mpi yandi ke bondila Yezu nde: “Mfumu, kwisa na ntwala nde mwana na mono ya fioti kufwa.”—Yoane 4:49.

Yezu me zabisa yandi mambu yai ya me yitukisa yandi kibeni: “Kwenda; mwana na nge kele na luzingu.” (Yoane 4:50) Kapita yina me kwikila mambu yina Yezu me tuba mpi yandi me vutuka na bwala na yandi. Na nzila, yandi me kutana ti bansadi na yandi zole. Bo ke kwisa ntinu sambu na kuzabisa yandi nsangu ya mbote. Mwana na yandi kele na luzingu mpi yandi kele ti mavimpi ya mbote. Sambu na kuzikisa nde yo salamaka mpidina, yandi me yula bo nde: ‘Na nki ntangu yandi kumaka mbote?’

Bo me vutula nde: “Fievre manaka mazono na ngunga ya nsambwadi.”—Yoane 4:52.

Kapita yina me bakisa nde yo vandaka kibeni ngunga yina Yezu zabisaka yandi nde: “Mwana na nge kele na luzingu.” Kapita yai vandaka mvwama sambu yandi vandaka ti bansadi; yandi ti nzo na yandi ya mvimba kumaka balongoki ya Kristu.

Mbanza ya Kana kele kisika yina Yezu salaka bimangu mbala zole. Yandi kumisaka masa vinu mpi na nima, yandi belulaka na kintama mwana-bakala mosi na bakilometre 26. Ya kieleka, yandi salaka kaka ve bimangu yai. Kansi mutindu yandi me belula mwana-bakala yina kele mfunu mingi sambu yo me monisa nde yandi me vutuka na Galilea. Yandi kele kibeni mbikudi yina Nzambi ndimaka. Kansi, inki mutindu ‘bo ta pesa mbikudi yai lukumu na bwala na yandi mosi’?

Diambu yai me monana pwelele ntangu Yezu me kwenda na bwala na yandi Nazareti. Inki ta kumina yandi kuna?