Kapu 20

Kimangu ya Zole na Kana

NTANGU Yezu mevutuka na bwala na yandi na nima ya kusala kisalu ya kusamuna mingi na Yudea, yau kele ve sambu na kupema. Kansi, yandi meyantika nkutu kisalu ya kuluta nene na Galilea, ntoto yina ya yandi kuyedilaka. Kansi balongoki na yandi, na kisika ya kubikala ti yandi, bau mevutuka na mabuta na bau ti na bisalu na bau ya ntama.

Inki nsangu Yezu meyantika kulonga? Nsangu yai: “Kimfumu ya Nzambi me kuma penepene. Beno balula ntima. Beno ndima Nsangu ya Mbote.” Ebuna mbutu? Bantu ya Galilea meyamba Yezu. Bau yonso kepesa yandi lukumu. Ata mpila yina, yau kele kibeni ve sambu na nsangu na yandi, kansi, sambu mwa bangonda meluta, bamingi na kati na bau kuvandaka na Paki na Yeruzalemi mpi bau monaka bidimbu ya nene ya yandi kusalaka.

Yau kemonana nde Yezu meyantika kisalu na yandi ya nene ya Galilea na Kana. Na ntwala, nge lenda kuyibuka nde, na ntangu yandi katukaka na Yudea, yandi kubalulaka masa na malafu na nkinsi ya makwela. Na okazio yai ya zole, mwana ya nsadi mosi ya luyalu ya Mfumu Erode Antipasi kebela mingi. Ntangu bau mewa nde Yezu mekatuka na Yudea mpi yandi mekuma na Kana, nsadi yina mesala nzyetolo ya nda katuka na bwala na yandi na Kapernaumi sambu na kumona Yezu. Yandi menyokwama kibeni na mawa, muntu yango kebondila Yezu nde: ‘[Mfumu, NW], kwisa na nzo na mono ntangu mwana me fwa ntete ve.’

Yezu mevutula nde: ‘Kwenda ka nge, mwana na nge me beluka!’ Nsadi ya Erode mendima mpi meyantika nzyetolo ya nda sambu na kuvutuka na bwala na yandi. Na nzila yandi mekutana ti bansadi na yandi, bayina kwendaka nswalu sambu na kusonga yandi nde mambu yonso kekwendila mbote​—⁠mwana na yandi mebeluka! Yandi meyufula nde: ‘Inki ntangu yandi belukaka?’ (NW)

Bau mevutula nde: ‘Mazono na inere ya nkokila.’

Nsadi yango meyibuka nde yina kele kibeni ntangu ya Yezu tubaka nde: ‘Mwana na nge me beluka!’ Na nima na yau, muntu yango ti dibuta na yandi yonso mekuma balongoki ya Yezu.

Yau yina, Kana kukumaka na lemvo bonso kisika yina, na kusonga kuvutuka na yandi tuka na Yudea, Yezu kusalaka bimangu mbala zole. Ya kyeleka, kele bimangu yai mpamba ve yandi mesala tii ntangu yai, kansi yau kele na ntendula sambu yau kemonisa kuvutuka na yandi na Galilea.

Ntangu yai, Yezu mekwenda na bwala na bau na Nazareti. Inki kevingila yandi kuna? Yoane 4:​43-54; Marko 1:​14, 15; Luka 4:​14, 15.

▪ Ntangu Yezu mevutuka na Galilea, inki mekumina balongoki na yandi, mpi inki mutindu bantu keyamba yandi?

▪ Inki kimangu Yezu mesala, mpi inki bupusi kimangu yango kele na yau na zulu ya bantu yango?

▪ Inki mutindu Kana mebaka lemvo na Yezu?