Kapu 15

Kimangu ya Ntete ya Yezu

KILUMBU mosi to zole mpamba meluta kubanda Andre, Piere, Yoane, Filipo, Natanaele, ziku ti Yakobo kukumaka balongoki ya ntete ya Yezu. Ntangu yai, bau kevutuka na bwala na bau na distrike ya Galilea, bwala ya kisina ya bau yonso. Bau kekwenda na Kana, mbanza ya kisina ya Natanaele, yina kele na miwanda ya Nazareti, kisika yandi mosi Yezu kuyedilaka. Bau mebingama na nkinsi mosi ya makwela na Kana.

Mama ya Yezu mpi mekwisa na makwela. Bonso nduku ya dibuta ya bayina kekwela, bau kulombaka na Maria na kupesa banzenza bima. Ebuna, yandi memona nswalu nde kima mosi melunga ve, yandi mekwenda kutubila Yezu nde: “Bantu ke na vinu ya kunwa diaka ve.”

Kansi, ya kyeleka, ntangu Maria kepesa ngindu nde Yezu kusala kima mosi sambu vinu mekonda, Yezu mebuya na mbala ya ntete. Yandi meyufula nde: “Inki mambu mono kele na yau ti nge?” (NW) Bonso Ntotila ya kuponama na Nzambi, yandi fwete kutwadisama ve na dibuta na yandi to na banduku na yina metala kisalu na yandi. Na yau, Maria mebikisa na mayele yonso mambu yango na maboko ya mwana na yandi, yandi metubila kaka bayina vandaka kusala kisalu nde: “Beno sala mambu yonso ya yandi ta songa beno.”

Ee, mabungu ya kubakila masa ya nene sambanu ya matadi kele pana, konso dibungu lenda kukota kiteso ya balitere kuluta makumi iya. Yezu mepesa nswa na bayina kesala kisalu nde: “Beno fulusa masa na mabungu yai.” Mpi bansadi mefulusa yau meke. Na nima, Yezu metuba nde: “Ntangu yai, beno baka ndambu . . . , beno nata yo na muntu ke sadisa feti.”

Ntwadisi ya nkinsi keyituka na kumona vinu yina ya kitoko, nkatu kuzaba nde yau mebasisama na mutindu mosi ya kimangu. Yandi mebinga bakala, yandi metuba nde: “Bantu yonso ke pesaka bantu ntete vinu ya kitoko; na nima, kana bantu me nwa mingi, bo kwisa kupesa bo vinu yina kele kitoko mingi ve. Kansi nge vandaka kubumba vinu ya kitoko tii ntangu yai!”

Yai kele kimangu ya ntete ya Yezu, mpi ntangu bau memona yau, lukwikilu ya balongoki ya mpa mesyamisama. Na nima, kumosi ti mama na yandi mpi bampangi na yandi ya kimama, bau mesabuka na Kapernaumi penepene na nzadi ya Galilea. Yoane 2:​1-12.

▪ Na ntangu ya kisalu ya Yezu, inki ntangu makwela mesalama na Kana?

▪ Sambu na inki Yezu mebuya ngindu ya mama na yandi?

▪ Inki kimangu Yezu mesala, mpi yau kele ti inki malanda na zulu ya bankaka?