Masolo ya Bansamuni ya Kimfumu

“Bantuma na Nge Yonso Kele Kyeleka”

NTANGU fyoti na ntwala lufwa na yandi, Moize longisilaka bantu ya Israele na kulemfuka na konso ntuma ya Yehowa. Yandi tubaka nde: “Atasio! beno landa bansiku yonso ya mono me pesa beno bubu yai. Beno songa yo mbala na mbala na bana na beno na mpila nde bo mpi bo tula ngolo na kulanda mbote-mbote malongi yonso ya Nzambi. Malongi yai kele mambu ya mpamba ve, yo kele luzingu na beno mpenza.”​—Kulonga 32:46, 47.

Bankama ya bamvula mingi na nima, muyimbi-bankunga monisaka mfunu ya malongi yonso ya Nzambi ntangu yandi tubaka nde: “Nge kele penepene, O Yehowa, mpi bantuma na nge yonso kele kyeleka.” (Nkunga 119:​151, NW) Na mvunkama ya ntete, Yezu yandi mosi tubilaka mbalu ya “mambu yina yonso ya Nzambi ke tubaka.” (Matayo 4:4) Ye na lutwadisu ya Nzambi ntumwa Polo sonikaka nde “Masonuku yonso mepemama na Nzambi mpi yau kele mfunu.”​—2 Timoteo 3:​16, NW.

Yau kemonana pwelele nde, Yehowa Nzambi kezolaka nde bansambidi na yandi kutula dikebi ya ngolo na nsangu yonso ya mepesama na beto na kati ya Ndinga na yandi. Kele ve ata ti mukapu mosi na Biblia yina kele na mfunu ve. Yai kele mawi ya Bambangi ya Yehowa kevandaka na yau sambu na Ndinga ya Nzambi, mutindu yau kemonana na disolo yai ya mekatuka na île Maurice.

Mr. D——vandaka kuzinga na bwala mosi ya ntama, kuna yandi vandaka santinele ya mpimpa. Yandi vandaka kusosa tuka ntama na masonga yonso mutindu ya mbote ya kusamba Nzambi. Na mpimpa, na bilumbu na yandi ya kisalu, yandi bandaka kutanga Biblia. Nsukansuka, yandi tangaka yau banda na luyantiku tii na nsuka. Yandi zabaka nde zina ya Nzambi kele Yehowa​—zina ya kemonana mbala na mbala na Biblia na yandi ya Hindi. Yandi monaka nde ntetentete mukanda ya Kusonga vandaka ya ngituka.

Ntangu yai yandi kudiyulaka kana vandaka ti dibundu ya vandaka kulanda Biblia ya mvimba. Yandi monaka nde mabundu ya yandi vandaka kusadila, vandaka kulanda mingi kaka bitini yankaka ya Biblia. Mabundu yankaka ndimaka Masonuku ya Kiebreo ye losaka Masonuku ya Bukristu ya Kigreki. Mabundu yankaka vandaka kubuya Masonuku ya Kiebreo, na kupesaka mbalu ya nsadilu kaka na Masonuku ya Kigreki.

Kilumbu mosi Mr. D——monaka bankwelani zole kepola na nsi ya mvula mpi bingaka bau na kubumbana na nzo na yandi. Bau vandaka Bambangi ya Yehowa. Nkento vandaka na maboko ti mukanda La Révélation: le grand dénouement est proche!a Na mbala mosi Mr. D——lombaka bau mukanda yango. Bambangi monaka nde mbikudulu ya Kusonga vandaka ya kuluta ngolo sambu na yandi, yau yina bau zodilaka kupesa yandi mikanda yankaka na kisika na yau. Kansi Mr. D——latamaka nde mono kaka mukanda Révélation.

Ntangu yandi zwaka nsononono na yandi, yandi tangaka yau nswalu. Na nima, yandi ndimaka kulonguka Biblia ti Bambangi ya Yehowa. Ntama mingi ve yandi yitukaka na kumona nde Bambangi vandaka kundima ngolo Biblia ya mvimba. Yandi bandaka kukwenda na balukutakanu mbala na mbala na Nzo ya Kimfumu ya Bambangi ya Yehowa, kisika bantu vandaka kulonguka na dikebi yonso Masonuku, yau kuvanda ya Kiebreo to ya Kigreki. Ntangu yai, yandi kele nsamuni ya Kimfumu ya kubotama mpi mambere ya dibundu ya Bukristu.

[Noti na nsi ya lutiti]