Ntotila Mosi Vandaka ti Kimvwama mpi Mayele

Keti nge keyindulaka nde kimvwama lenda pesa nge kyese? Kana muntu mosi kupesa nge mbongo ya mingi, keti nge tawa kyese ve? Ziku nge tawa yau. Nge tabanda kuyindula mitindu ya kusadila yau.

NTEMBE kele ve, bima ya kusumba kele mingi sambu na kuzinga mbote mpi na kyese. Mbongo mpi “lenda sadisa” nge na mambu ya kintulumukina bonso maladi to ntangu kisalu kefwaka.​—⁠Longi 7:⁠12.

Kansi, inki kuwakana kele na kati ya mbongo ti kyese? Keti nge keyindulaka bonso bayina ketubaka nde kyese kekwisaka ti kimvwama? Kuzwa bamvutu na bangyufula yai lenda vanda mpasi; sambu, mbongo beto lenda tesa yau, beto lenda tanga yau; kansi, beto lenda tesa to kutanga kyese ve. Nge lenda tula ve kyese na zulu ya kilo, nge tesa yau.

Kima yankaka, bamvwama yankaka kemonanaka nde bau kele na kyese, kansi bankaka ve. Bansukami mpi kiteso mosi, bankaka na kyese, bankaka na mpasi. Dyaka, bantu mingi​—⁠ata bayina kele dezia bamvwama​—⁠keyindulaka nde kuzwa dyaka mbongo mingi tapesa bau kyese ya kuluta.

Muntu mosi ya kusonikaka mukanda na mambu yai kele Salomo, Ntotila ya ntama na Izraele. Yandi vandaka mosi na kati ya bamvwama ya kuluta nene ya ntangu yonso. Nge lenda tanga kimvwama na yandi ya kuluta bimvwama na Biblia, na kapu 10 ya mukanda ya Ntete ya Bantotila. Mu mbandu, tala mvese 14 yina ketuba nde: “Konso mvula Salomo vandaka kubaka bakilo mile makumi zole na tatu (23 000 kg) ya wolo.” Bubu yai, ntalu ya wolo yina yonso kele badolare ya Amerika 200 000 000!

Kansi, Salomo vandaka ve kaka ti kimvwama; Nzambi pesaka yandi mpi mayele. Biblia ketuba nde: “Ntotila Salomo lutaka bantotila ya nkaka ya nsi-ntoto na kimvwama ti na mayele, ebuna bo yonso vandaka kwisa kuwa mayele yina ya Nzambi pesaka yandi.” (1 Bantotila 10:​23, 24) Mayele ya Salomo lenda sadisa beto yonso, sambu mukanda ya yandi sonikaka kele na kati ya Biblia. Beto tala mambu ya yandi tubaka na yina metala kuwakana yina kele na kati ya mbongo ti kyese.

[Bangogo ya kemonisa kisina ya foto ya kele na lutiti 3]

Yau mekatuka na Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart