Sambu na nki kukwikila na Yezu Kristu?

MUKANDA mosi (The World Book Encyclopedia) ketuba nde: “Ata bantu mingi yina kele Bakristu ve kekwikilaka nde Yandi vandaka longi mosi ya nene mpi ya mayele. Ntembe kele ve nde yandi vandaka ti bupusi ya kuluta mingi na zulu ya bantu.” “Muntu yango” kele nani? Yezu Kristu, muntu ya kusalaka dibundu ya Bukristu.

Kansi, ata mukanda yina ketuba mutindu yai, sambu na bantu mingi ya kezingaka na ndambu ya Esti ti na bisika yankaka, Yezu kele nzenza, bo keyibukaka zina na yandi kaka sambu yo kele na mikanda na bo ya nzo-nkanda. Ata na mabundu ya Kikristu, kele ti bantu yina kelongukaka Teolozi ti bamfumu ya mabundu ya ketubaka nde beto zaba ve kibeni Yezu. Mpi bo kebasisaka badute sambu na yina metala bukyeleka ya masolo ya luzingu na yandi (ba Evanzile) yina kele na Biblia.

Keti bantu yina kusonikaka ba evanzile yina ketubila luzingu ya Yezu, bo gangaka mambu yina metala luzingu ya Yezu? Ata fyoti ve! Na nima ya kulonguka mikanda yonso iya ya bantumwa kusonikaka, muntu mosi ya kelongukaka nkenda mpi ya mezabanaka mingi, Will Durant, kusonikaka nde: “Kutuba nde bantu fyoti ya mpambampamba yina kuzingaka na nsungi mosi kugangaka muntu ya ngolo mpi ya kebendaka dikebi ya bantu, muntu mosi ya kuvandaka ti bikalulu ya kitoko mutindu yina mpi mabanza ya kimpangi ya nene, zolaka kuvanda kimpa mosi ya nene ya kuyitukisa kibeni kuluta mambu yonso yina kele na ba evanzile. Na nima ya bamvu-nkama zole ya mvimba ya kulonguka mambu yai na Haute critique, bangindu ya kimvuka ya ketubila luzingu ya Kristu, kimuntu na yandi, ti malongi na yandi, kele kaka pwelele, mpi yo kele kima ya keyitukisaka bantu mingi na nkenda ya bantu ya Westi.”

Kansi, kele ti bantu yina kebuyaka kumona Yezu Kristu bonso muntu mosi ya mefwana nde bo tudila yandi dikebi sambu na mambu yina bantu yina ketubaka nde bo kele balongoki na yandi mesalaka. Na Japon, bantu mingi lendaka kutuba nde ‘Bo losaka bombi ya ngolo kibeni na Nagasaki.’ ‘Nagasaki vandaka ti Bakristu mingi kuluta bambanza yankaka na Japon.’ Keti nge lenda tuba nde yo kele kifu ya munganga kana mbefo mebeluka ve sambu yandi landaka ve ndongisila ya munganga? Tuka ntama, bantu mingi yina ketubaka nde bo kele Bakristu kezolaka ve kulanda bandongisila yina Yezu pesaka sambu na kumanisa bampasi ya bantu. Kansi, Yezu monisaka mutindu ya kumanisa makambu ya beto kekutanaka na yo konso kilumbu ti mambu yonso ya mpasi yina bantu kekutanaka na yo na inza ya mvimba. Yo yina beto kelomba na nge na kutanga disolo ya kelanda sambu nge bakisa nge mosi kana yandi vandaka muntu ya nki mutindu.