Beto Kele Bantu Yina Ke na Lukwikilu

Kuzabisa Nsangu ya Mbote na Bilanga ya Loso na Taiwan

MVULA kenokaka mingi na Taiwan, ebuna yo kesadisaka bantu na kukatula loso mbala zole konso mvula. Kansi, mbala mingi, bamvula kenokaka ve na nsungi yina yo fwete noka. Ebuna, tubanti ya loso yina ke na kumena kefwaka. Kana mvula kenoka ve, keti muntu yina kesalaka bilanga keyambulaka na kusala bilanga na yandi? Ve. Yandi zaba nde yo kelombaka kukanga ntima. Yandi kekunaka tubanti ya loso yankaka mpi kekunaka yo dyaka na bilanga yonso. Ebuna, kana mvula kunoka mpi loso kuyela, muntu yina kesalaka bilanga kekatulaka loso mingi. Mbala mingi kukuna mpi kukatula bambuma na kimpeve kesalamaka mutindu mosi.

Kukanga ntima na kubuka bambuma na Kimpeve

Bamvula mingi meluta na Taiwan Bambangi ya Yehowa kesalaka ngolo sambu na kukuna mpi kukatula bambuma ya kyeleka ya Masonuku na bisika mingi yina vandaka kumonika ve nde yo tabuta mbote. Beto kele ti mbandu ya provense mosi na zina ya Miao-li. Bantu mingi ve vandaka kundima nsangu yina bampangi na beto vandaka kulonga na mabaku ya mbote na ntoto yina. Na mvu 1973, bo tindaka bankwelani zole yina kuvandaka bapasudi-nzila ya nene sambu na kusala bonso bansamuni ya Kimfumu ya ntangu yonso. Na luyantiku, bantu mingi kusepilaka na nsangu ya mbote. Kansi, mpusa yango kusukininaka ve na kumana. Yo yina, bo tindaka bapasudi-nzila ya nene yina na kisika yankaka.

Na mvu 1991, bo tindaka bapasudi-nzila ya nene yankaka zole na bwala yina. Kansi, mambu yonso kumonisaka dyaka nde nsungi kuvandaka mbote ve sambu na kuyedisa bantu na kimpeve. Na nima ya bamvula mingi, bo tindaka dyaka bapasudi-nzila ya nene yina na kisika mosi ya bo vandaka kutula kivuvu nde yo tabuta mbote kuluta. Kansi, ntoto yango vandaka ya mbote ve na nsungi mosi.

Bikesa ya mpa mebuta bambuma

Na Septembri ya mvu 1998, yo lombaka kusala kikesa sambu na kusosa bisika yina lenda buta bambuma na teritware ya nene yina bo mepesaka ntete ve ata na muntu mosi na Taiwan. Inki mutindu dyambu yai zolaka kusalama? Bo tindaka bapasudi-nzila ya nene ya mwa ntangu fyoti 40 sambu bo sala na bateritware ya kele na bantu mingi kibeni kansi ya bo mepesaka ntete ve ata na muntu mosi.

Sambu na kusala kampanye yango, bo ponaka babwala zole yina mekangamaka ya kele na provense ya Miao-li. Bampangi iya ya bankento ya mekwelaka ve kwendaka kusala bangonda tatu kuna sambu na kutala kana teritware yango kele mbote. Ntama mingi ve na nima ya kukuma na bo, bo sonikaka balapolo ya kyese mpenza yina vandaka kusonga ntalu ya bantu yina kusepilaka na kyeleka yina bo zwaka. Na nima ya kusala kisalu ya kimupasudi-nzila bangonda tatu na kisika yai, bo kumaka kulonguka Biblia ti bantu mingi na banzo na bo. Bo kangulaka mpi kimvuka ya kulonguka ya mukanda ti lusadisu ya nkuluntu mosi yina vandaka kuzinga na dibundu yina vandaka penepene.

Bampangi tatu na kati ya bampangi yina ya bankento kumonisaka nde bo vandaka na nzala ya kulanda na kusungimina “tubanti” yina vandaka kuyela mbote. Yo yina, zole na kati na bo kukumaka bapasudi-nzila ya nene na bisika yina, mpi ya tatu kulandaka na kusala kisalu ya kimupasudi-nzila ya ntangu yonso na kisika yango. Nkuluntu mosi yina vandaka kuzinga na dibundu mosi ya penepene, vandaka kwenda kutala bo sambu na kusadisa bo. Bantu kuluta 60 kwendaka kuwa diskure ya ntete ya bantu yonso yina bo salaka na kisika yina. Ntangu yai dibundu yina kele penepene kesadisaka kimvuka yina ya mpa na kusala balukutakanu konso Lumingu, katula kulonguka ya mukanda ya bo kesalaka dezia mbala mingi. Kubika fyoti dibundu mosi ya mpa lenda kanguka na bwala yina.

Kukanga ntima menata balusakumunu na bisika yankaka na Taiwan

Na bisika yankaka mpi bantu kundimaka kyeleka mutindu mosi. Na provense ya I-lan ya kele na ndambu ya Nordi mpi Esti ya kisanga yina, bo kangulaka Kulonguka ya Mukanda ya Dibundu mosi na kisika yina bapasudi-nzila ya nene ya mwa ntangu kusalaka.

Ntangu bo vandaka kusala kisalu ya nzo na nzo na nkokila mosi, mupasudi-nzila mosi ya nene ya mwa ntangu kukutanaka ti mwana-bakala mosi, ebuna yandi songaka yandi lutiti yina vandaka kusonga manaka ya balukutakanu ya dibundu. Kukonda kusukinina yandi yulaka nde: “Keti mu le kwisa na lukutakanu yango mbasi na nkokila? Kana mpidina, yo talomba nde mu lwata nki?” Konso mposo mupasudi-nzila yai kumaka kulonguka Biblia ti bantu nana yina vandaka kusepila. Ntama mingi ve, balongoki na yandi ya Biblia mingi kumaka kuyilama sambu bo mpi kukuma bansamuni ya nsangu ya mbote, ti lukanu ya kubaka mbotika.

Kaka na mbanza yina, nkento mosi vandaka ti kikalulu ya kukwenda na nzo-Nzambi bamvula mingi, kansi yandi vandaka kuzwa ve muntu yina lenda longa yandi Biblia. Ntangu yandi waka nde bo tayantika kulonguka Biblia, yandi ndimaka mbala mosi. Bo syamisaka yandi na kubongisa na ntwala dilongi yina bo talonguka. Ntangu mupasudi-nzila ya nene ya mwa ntangu kukwisaka sambu bo longuka, yandi kutaka nkento yina mesala “devware” na yandi mpi yandi mesumba karne ebuna yandi sonikaka bangyufula yonso ya kele na dilongi yina bo talonguka. Yandi sonikaka mpi bamvutu na yandi na konso ngyufula. Yandi sonikaka dyaka baverse yonso ya bo mepesa na dilongi na yandi. Na ntangu mpangi na beto ya nkento kukwisaka sambu bo longuka mbala ya ntete, nkento yango vandaka yandi mebongisa dezia malongi tatu ya ntete!

Mambu ya mutindu mosi kusalamaka na mbanza Dongshih na katikati ya Taiwan. Bapasudi-nzila ya nene ya mwa ntangu kukabulaka tumikanda kuluta 2 000 na bangonda tatu yina bo salaka kisalu na kisika yina. Na ngonda ya tatu, bo vandaka kulonguka Biblia ti bantu 16 na nzo. Mbanza yango kufwaka mpenza mingi ntangu ntoto kunikanaka na Septembri 21 ya mvu 1999, kansi bantu mingi yina kesepila na kyeleka kelanda na kuyela na kimpeve, ata yo kelombaka nde bo tambula kiteso ya ngunga mosi na nzila sambu na kukuma na balukutakanu na Nzo ya Kimfumu yina kele penepene. Ee, beto kele na mfunu ya kukanga ntima sambu na kubuka bambuma ya mbote, yo vanda bambuma ya kyeleka to ya kimpeve.

[Karte ya kele na lutiti 8]

(For fully formatted text, see publication)

CHINE

Detroit de Taiwan

TAIWAN

[Bangogo ya kemonisa kisina ya foto]

Mountain High Maps® Copyright © 1997 Digital Wisdom, Inc.