666​—Kele Diswekamu ya Mpamba Ve

“Ata muntu mosi ve vandaka na mpila ya kusumba kima to kuteka kima kana yandi vandaka na kidimbu yina ve, disongidila nde kidimbu yina kele na zina ya mbisi yina, to ntalu yina me fwanana na zina na yandi. Na mambu yai muntu fweti vanda na mayele. Konso muntu yina ke na mayele ta mona mpila ya kubakisa lutendulu ya ntalu ya mbisi yina, sambu ntalu yina me fwanana na zina ya muntu. Ntalu ya muntu yina kele nkama sambanu makumi sambanu na sambanu.”​—Kusonga 13:17, 18.

MASOLO mingi ve ya Biblia mebendaka dikebi mingi mpi metubilaka ntalu ya mbikudulu 666 yina metala kidimbu ya diswekamu, to zina ya “mbisi ya makasi.” Na televizio ti na Internet, na bafilme, na mikanda, mpi na bazulunalu, bantu mekumaka kubasisa bangindu ya mutindu na mutindu sambu na kutendula kidimbu yai ya mbisi ya makasi.

Bantu mingi kekwikilaka nde ntalu 666 kele kidimbu ya mbeni ya Kristu yina Biblia ketubila. Bantu yankaka ketubaka nde yo ketendulaka kidimbu ya kusonika na nitu to na kibende yina kesongaka nde muntu yai kesadilaka mbisi. Bankaka dyaka ketubaka nde ntalu 666 kele kidimbu ya kimfumu ya bapape ya Katolika. Ntangu bo yingisaka bantalu yai na kisika ya bisono yai Vicarius Filii Dei (Vikere ya Mwana ya Nzambi), yina vandaka kusonga titre ya pape ya Roma, bo yidikaka bantalu yango tii kuna bo monaka nde ntalu yai 666 mefwana na kuvanda titre ya pape. Bantu ketubaka dyaka nde ntalu yai mosi bo lenda zwa yo mpi kana bo sala bakalkile ya zina ya kilatini ya Ntotila ya Roma Diocletian mpi ya zina ya Kiebreo yina ya bo kebalulaka nde Nero Caesar.a

Kansi bantendula yai ya bantu keyindulaka mpi kebasisaka na mpila na bo, keswaswana ngolo mpenza ti yina ya Biblia yo mosi kepesa sambu na kutendula mbisi, mutindu beto tamona yo na disolo yina kelanda. Biblia ketuba nde makasi ya Nzambi tafwa bantu yina kele ti kidimbu ya mbisi ntangu yandi tafwa ngidika ya bima ya ntangu yai. (Kusonga 14:9-11; 19:20) Yo yina, kubakisa ntendula ya ntalu 666 ketendula mambu mingi. Yo ketendula kaka ve kusengumuna diswekamu. Yo kele kyese mingi na kumona nde Yehowa Nzambi, muntu yina kele zola mpi Nto ya nsemo ya kimpeve, metendudilaka bansadi na yandi dyambu yai ya mfunu.​—2 Timoteo 3:16; 1 Yoane 1:5; 4:8.

[Noti na nsi ya lutiti]