Inki Mambu Tasalama na Bilumbu Kekwisa?
SAMBU NA NKI YO KELE MFUNU NA KUZWA MVUTU NA NGYUFULA YAI? Mambu yina muntu keyindula sambu na bilumbu kekwisa kemonanaka na mambu yina yandi kesala ntangu yai. Mu mbandu, bantu yina kele mpenza ve ti kivuvu sambu na bilumbu kekwisa lenda ndima nkadilu yai: “Beto dia, beto nwa, sambu mbasi beto ke fwa.” (1 Korinto 15:32) Mbala mingi, nkadilu ya mutindu yai kepusaka bantu yango na kudya mbiki, na kunwa malafu mingi, mpi na kutula susi mingi. Kansi, yo kenatilaka bo ve ngemba ya kyeleka.
Ya kyeleka, kana avenire na beto kuvandaka kaka na maboko na beto, beto zolaka kuvanda ve ti kivuvu. Mupepe, masa, mpi ntoto ke na kubeba na kiteso mosi ya mesalamaka ntete ve. Bantu kelanda na kuwa boma nde kilumbu yankaka bitumba ya nikleyere tabasika to bateroriste tanwanisa bantu. Maladi mpi kinsukami kele mingi na nsi-ntoto ya mvimba. Ata mpidina, beto kele ti bikuma ya mbote ya kuvanda ti kivuvu.
Ata bantu lenda tuba ve na sikisiki nki mutindu bilumbu kekwisa tavanda, Yehowa Nzambi kekudibinga nde yandi kele Muntu yina “ke tubaka mambu yina fweti kubwa, [yandi] ke zabisaka mpi ntama na ntwala mambu yina me bwa ntete ve.” (Yezaya 46:10) Inki Yehowa ketuba sambu na yina metala mambu yina tasalama na bilumbu kekwisa?
Mambu Yina Biblia Ketuba
Yehowa tapesa ve nzila nde ntoto to bigangwa yina kele na ntoto kufwa. Nkutu, Biblia kesila nde Nzambi ‘tafwa bantu yina kebebisa nsi-ntoto!’ (Kusonga 11:18) Na nzila ya Kimfumu, to guvernema na yandi ya zulu, Yehowa takatula mambi na ntoto mpi talungisa lukanu yina yandi vandaka na yo na luyantiku. (Kuyantika 1:26-31; 2:8, 9; Matayo 6:9, 10) Baverse yai ya Biblia kemonisa pwelele mutindu bilumbu kekwisa tavanda, mpi yo ketendula mambu yina tavanda na bupusi na luzingu ya konso muntu kubika fyoti.
Nkunga 46:9, 10. “Beno Kwisa beno tala mambu ya Mfumu Nzambi me sala. Beno kwisa kutala mambu ya kuyituka ya yandi me sala awa na nsi-ntoto. Yandi ke sukisaka bitumba na nsi-ntoto yonso, yandi ke buka-bukaka babunduki ya tolotolo ti bamakonga, yandi ke tulaka tiya na mabaya ya kuditanina na batolotolo ya bambeni.”
Yezaya 35:5, 6. “Meso ya bantu ya kufwa-meso ta mona, makutu ya bantu ya kufwa-makutu ta kanguka. Bantu ya makulu-kifu ta pumbuka bonso mbambi, bababa ta kuma kutuba na ndinga ya ngolo ti kiese. Bamasa ta basika mingi na ntoto ya zelo na zelo.”
Yezaya 65:21, 22. “Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo. Banzo ya bo ta tunga ti bilanga ya bo ta kuna, yo ta vanda sambu na bo mosi kansi sambu na bantu ya nkaka diaka ve.”
Daniele 2:44. “Nzambi ya zulu ta tula ntotila mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii kuna.”
Yoane 5:28, 29. “Ntangu ke kwisa, bantu yonso yina me fwaka kele na maziamu, bo ta wa ndinga [ya Yezu]; ebuna bo ta basika na maziamu na bo.”
Kusonga 21:3, 4. “Yandi mosi Nzambi ta vandaka ti bo, yandi ta vandaka Nzambi na bo. Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.”
Mutindu Bamvutu ya Biblia Kenataka Ngemba ya Kyeleka ya Mabanza
Ntetentete, yo lenda vanda mpasi na kundima nde mambu yai ya beto metanga na zulu kele ya kyeleka. Kansi, Nzambi muntu mepesa balusilu yai, bantu ve. Mpi Yehowa Nzambi “ke tubaka luvunu ve.”—Tito 1:2.
Kana nge longuka na kutula ntima na balusilu ya Nzambi mpi kuzinga na kuwakana ti bansiku na yandi, nge talanda na kuvanda na ngemba ya mabanza, ata na ntwala ya bampasi ya ngolo. Bitumba, kinsukami, maladi, mpi nkutu bampasi ya kimununu to kuzaba nde beto tafwa takatula ve ngemba na nge kimakulu. Sambu na nki? Sambu nge tandima mpenza nde Kimfumu ya Nzambi takatula mambu ya mbi yonso ya kekatuka na bampasi yai.
Inki mutindu nge lenda vanda ti kivuvu ya mutindu yina sambu na bilumbu kekwisa? Nge fwete ‘balula mabanza na nge’ mpi kuzaba “mambu yina kele ya mbote, mambu yina ke pesaka [Nzambi] kiese, mambu yina ke na kifu ve.” (Roma 12:2) Ntembe kele ve nde nge tavanda na mfunu ya banzikisa yankaka ya kendimisa nde nge lenda tula ntima na balusilu ya Biblia. Yo mefwana na kusala mpenza kikesa sambu na kuzaba mambu yai. Mambu kele ve mingi ya nge lenda sala na luzingu ya tanatila nge ngemba ya mabanza.
[Bifwanisu ya kele na lutiti 7, 8]
Ndinga ya Nzambi ketuba nki sambu na yina metala bilumbu kekwisa?