Yezu Kristu Bupusi ya Nsangu na Yandi

“Ntembe kele ve nde nzikisa ya kuluta ngolo ya muntu ya mayele ya Kapernaumi kele nde yandi kelanda na kuvanda na bupusi na ntima mpi na mabanza ya bantu.”a​—NSONIKI GREGG EASTERBROOK.

BANGOGO kevandaka ti kiyeka. Bangogo ya mayele ya muntu mepona mbote lenda simba ntima, kupesa kivuvu, mpi kusoba luzingu ya bantu. Ata muntu mosi ve metubaka bangogo ya kele ti kiyeka kuluta Yezu Kristu. Muntu mosi yina kuwaka Yezu kesala Disolo na Zulu ya Ngumba, disolo yina mezabanaka mingi bubu yai, kusonikaka na nima nde: “Ntangu Yesu manisaka malongi yina, bantu vandaka kuyituka ngolo mutindu yandi vandaka kulonga.”​—Matayo 7:28.

Tii bubu yai, bantu ya nsi-ntoto ya mvimba mezaba mbote mambu mingi yina Yezu kutubaka. Beto tadila mwa ndambu ya mambu yina kele na ntendula mingi.

“Beno lenda sadila bamfumu yai zole ve, Nzambi ti kimvwama.”​—Matayo 6:24.

“Beno sala bantu ya nkaka mambu yonso yina ya beno zola nde bo sala beno.”​—Matayo 7:12.

“Ya ntotila ya nene, beno pesa na ntotila ya nene; ya Nzambi, beno pesa na Nzambi.”​—Matayo 22:21.

“Kiese ke vandaka mingi na kupesa, kansi na kubaka kiese ke vandaka fioti.”​—Bisalu 20:35.

Kansi Yezu kusukaka ve kaka na kutuba mambu yina bantu lenda vila ve. Nsangu yina yandi longaka kele ti kiyeka sambu yo vandaka kumonisa kyeleka ya metala Nzambi, sambu yo longaka bantu mutindu ya kuzwa ntendula ya kyeleka na luzingu, mpi sambu yo monisaka pwelele nde Kimfumu ya Nzambi tamanisa bampasi yonso ya bantu. Na ntangu beto ketadila nsangu yai na balutiti yina kelanda, beto tamona sambu na nki Yezu kelanda na “kuvanda na bupusi na ntima mpi na mabanza ya bantu.”

[Noti na Nsi ya Lutiti]