4 Nzambi Kele Muntu ya Kukonda Lunungu—Keti Yo Kele Kyeleka?

Mambu yina ziku nge mewaka: “Nzambi ketwadisaka nsi-ntoto yai, mpi mambu yonso kesalamaka na luzolo na yandi. Sambu nsi-ntoto mefuluka ti kukonda lunungu, kupona-pona, mpi bampasi, Nzambi kele na kisina ya mambu yina.”

Mambu yina Biblia kelongaka: Nzambi kele ve na kisina ya kukonda lunungu yina kesalama na ntoto. Biblia ketuba sambu na Yehowa nde: “Kisalu na yandi kele ya kukuka, sambu banzila na yandi yonso kele ya lunungu. Nzambi ya kwikama, na yandi kukonda lunungu kele ve.”​—Kulonga 32:4, NW.

Nzambi kesadisaka bantu yonso, tanga mpi bayina mefwana ve na kubaka lusadisu na yandi. Mu mbandu, “yandi ke basisaka ntangu na yandi na zulu sambu na bantu ya mbi ti na bantu ya mbote, yandi ke nokisaka mvula na yandi na bantu yina ke salaka mambu ya mbote ti na bayina ke salaka mambu ya mbi.” (Matayo 5:45) Yandi kesadilaka bantu ya bampusu yonso mpi ya binkulu yonso mambu ti lunungu, mutindu Bisalu 10:34, 35 kemonisa yo: “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”

Kansi, kukonda lunungu kukatukaka wapi? Bantu mingi kesalaka mambu kukonda lunungu sambu bo kelandaka ve mbandu ya lunungu ya Nzambi. (Kulonga 32:5) Dyaka, Biblia kemonisa nde, Nzambi mepesaka mbeni na yandi Dyabulu, nzila ya kuyala nsi-ntoto.a (1 Yoane 5:19) Kansi, kubika fyoti Nzambi tafwa luyalu yai ya kukonda lunungu. Yandi mebakaka dezia bangidika sambu na ‘kufwa bisalu ya Satana.’​—1 Yoane 3:8.

Mutindu kuzaba kyeleka lenda sadisa nge: Bansangu yina ketubilaka ntangu yonso kukonda lunungu mpi mutindu bantu kenyokulaka bankaka lenda yangisa nge. Kuzaba kisina ya bampasi kesadisa nge na kubakisa kikuma yina mambu ya mbi kesalama mpi bikesa yina bantu kesala sambu na kukumisa nsi-ntoto kisika mosi ya mbote kenunga ve. (Nkunga 146:3) Na kisika ya kudipesa mingi mpi kusala bikesa sambu na kusoba mambu, kaka sambu na mwa ntangu fyoti, nge lenda vanda ti kivuvu ya mbote yina mesimbama na balusilu ya Nzambi sambu na makwisa.​—Kusonga 21:3, 4.

Kubakisa kisina ya kukonda lunungu lenda sadisa beto, mingi-mingi ntangu beto kekutana ti bampasi. Ntangu bantu kesadila beto mambu na kukonda lunungu, beto lenda tuba bonso nsadi ya Nzambi, Habakuki yina kutubaka nde: “Bansiku kele diaka ngolo ve, masonga ke monika ve ata fioti.” (Habakuki 1:4) Nzambi kunganinaka ve Habakuki sambu yandi tubaka mambu yai. Kansi, Nzambi kundimisaka Habakuki nde, yandi meponaka ntangu sambu na kuyidika mambu mpi yandi sadisaka Habakuki na kuvanda na kyese na bantangu ya bampasi. (Habakuki 2:2-4; 3:17, 18) Kiteso mosi, kutula ntima na lusilu ya Nzambi ya kukatula kukonda lunungu lenda sadisa nge na kubaka ngemba ya mabanza na nsi-ntoto yai ya mekonda lunungu.

[Noti na nsi ya lutiti]

[Bangogo sambu na kubenda dikebi ya kele na lutiti 7]

Keti Nzambi kele mpenza na kisina ya kukonda lunungu mpi bampasi?

[Bangogo ya kemonisa kisina ya foto ya kele na lutiti 7]

© Sven Torfinn/Panos Pictures