Keti Nge Ta Tudila Nzambi Ntima?

YINDULA nde nge kele ti nduku mosi yina nge ke zolaka mingi, kansi yandi me sala diambu mosi yina nge ke bakisa ve. Bantu ya nkaka ke vweza diambu yina yandi me sala mpi bikuma na yandi na kutubaka nde yandi kele muntu ya nku. Keti nge ta ndima mbala mosi mambu yina bo ke tuba, to keti nge ta vingila kuwa mambu yina nduku na nge ta tuba? Kana yandi kele ve pana sambu na kutendudila nge, keti nge ta monisa ntima-nda, mpi ta buya kutuba nde yandi kele muntu ya nku?

Na ntwala ya kupesa mvutu, ziku yo ta lomba nde nge sosa kuzaba mambu ya nkaka. Nge lenda kudiyula nde: ‘Keti mono zaba mpenza nduku yina, mpi inki pusaka mono na kusepela ti yandi?’ Kudiyula mutindu yina kele mbi ve. Kansi tadila diambu yai: Keti beto lenda sala ve mpidina sambu kuzaba kana Nzambi kele muntu ya nku to ve?

Yo lenda vanda mpasi sambu na nge na kubakisa mambu ya nkaka yina Nzambi me salaka, to ziku nge lenda kudiyangisa na mutindu yandi me pesaka nzila nde mambu ya nkaka kusalama. Bantu mingi lenda zabisa nge nde Nzambi kele muntu ya nku mpi kusiamisa nge na kusambisa bikuma na yandi bonso bo. Keti nge lenda tudila Nzambi ntima tii ntangu nge ta zaba mambu mingi na yina me tala yandi? Mvutu na ngiufula yina ke tadila kiteso yina nge me zaba Nzambi. Kudiyula nde: ‘Nzambi ke vandaka nduku ya nki mutindu sambu na mono?’

Kana nge me kutanaka ti bampasi mingi na luzingu, nge lenda tuba nde Nzambi ke vandaka ve ata fioti nduku na nge. Kansi yindula fioti. Keti Nzambi ke vandaka na kisina ya bampasi ya luzingu na nge to ya balusakumunu na nge? Mutindu beto monaka yo, Satana muntu kele “mfumu ya nsi-ntoto yai,” kansi Yehowa ve. (Yoane 12:31) Yo yina, Satana muntu kele na kisina ya bampasi mpi ya mambu ya kukonda lunungu yina kele na nsi-ntoto yai. Keti nge ke ndima ve nde, kukonda kukuka na beto mpi mambu ya kukonda kukana ke vandaka na kisina ya bampasi mingi yina beto ke kutanaka ti yo?

Kansi, inki mambu Nzambi me salaka? Beto tadila mambu yina Biblia ke tuba: nde Nzambi “salaka zulu ti ntoto”; nde na kati ya bima yina yandi salaka beto lenda tanga nitu na beto yina ‘salamaka na mutindu mosi ya kuyituka’; mpi nde Yehowa kele ‘Nzambi yina luzingu na nge kele na maboko na yandi.’ (Nkunga 124:8; 139:14; Daniele 5:23) Mambu yai yonso ke tendula nki?

Yo ke tendula nde, mpema mpi luzingu na beto me katukaka na Ngangi na beto. (Bisalu 17:28) Yo ke tendula mpi nde dikabu ya luzingu, bima ya kitoko yina kele na ntoto, kiese ya kuzola mpi ya kusala kinduku, kuwa ntomo ya bima, kusimba, kuwidikila, mpi kuwa nsudi​—kele makabu yina me katukaka na Nzambi. (Yakobo 1:17) Keti nge ke ndima ve nde balusakumunu yai yonso ke monisa nde yandi kele Nduku yina beto fwete zitisa mpi kutudila ntima?

Ya kieleka, yo lenda vanda mpasi sambu nde nge tudila Nzambi ntima. Ziku nge ke yindulaka nde, nge me zaba yandi mbote mpenza ve sambu na kutudila yandi ntima. Mpi yo kele mbi ve. Na masolo yai ya nkufi, beto lenda tubila ve bikuma yonso yina bantu ya nkaka ke sambisaka Nzambi nde yandi kele muntu ya nku. Kansi, keti yo me fwana ve na kusala bikesa sambu na kuzaba Nzambi mbote-mbote?a Beto ke kwikila nde kana nge sala mpidina, nge ta zaba kieleka na yina me tala Nzambi. Keti yandi kele muntu ya nku? Ve, nkutu: “Nzambi kele zola.”​—1 Yoane 4:8.