Sambu na Nki Nge Fwete Tadila Dibundu na Nge?

Yindula nde bo fwete sala nge operasio sambu na maladi mosi yina lenda nata nge na lufwa. Yo ta lomba nde nge tula ntima ya mingi na munganga yina ta sala nge operasio, sambu luzingu na nge kele na maboko na yandi. Keti yo ta vanda ve mayele na kutadila diaka ba operasio yina yandi me salaka?

Mutindu mosi, yo kele mayele na kutadila dibundu na nge na dikebi yonso. Kana nge ke vandaka na dibundu mosi buna, yo kele bonso nde luzingu na nge ya kimpeve kele na maboko na yo. Luzingu na nge ya mvula na mvula kele na maboko na yo.

Yezu pesaka munsiku mosi yina lenda sadisa beto na kuzaba kana dibundu na beto kele ya kieleka to ve. Yandi tubaka nde: “Konso nti ke zabanaka na mbuma na yo.” (Luka 6:44) Mu mbandu, ntangu nge ke talaka dibundu mosi buna, inki bambuma yo ke basisaka? Keti bantwadisi na yo ke tulaka dikebi ya mingi na mbongo? Keti bantu ya dibundu yango ke zitisaka minsiku ya Biblia ya me tala mvita mpi bikalulu ya mbote? Keti kele ti dibundu yina me fwana na kutudila ntima? Beto ke siamisa nge na kutadila masolo yina me landa.