Keti Kele ti Dibundu Yina Me Fwana na Kutudila Ntima?

Kana dibundu mosi me pesaka nge mpasi, yo lenda vanda mpasi na kutudila dibundu ya nkaka ntima. Kansi ndima nde kele ti dibundu yina me fwana na kutudila ntima. Ntangu yandi vandaka na ntoto, Yezu vukisaka kimvuka mosi ya balongoki ya kwikama mpi longaka bo na kuzitisa minsiku ya Nzambi. Balongoki ya kieleka ya Kristu​—bayina ke kudipesaka na kuzitisa minsiku ya Bukristu—​kele tii bubu yai. Na wapi nge lenda mona bo?

Estelle, yina beto tubilaka na luyantiku ke tuba nde: “Nsuka-nsuka mono longukaka Biblia, ntangu mono yantikaka kulonguka ti Bambangi ya Yehowa. Kukonda kusukinina, mono bakisaka Yoane 8:32 yina ke tubaka nde: ‘Beno ta zaba kieleka, ebuna kieleka ta pesa beno kimpwanza.’”

Ray, yina beto tubilaka mpi na luyantiku ke tuba nde: “Ntangu mono longukaka Biblia ti Bambangi ya Yehowa, mono bakisaka nde Nzambi kele ve na kisina ya bampasi ya bantu. Mono vandaka na ntonda ya kumona nde, Nzambi kele ti bikuma ya mbote ya kupesa nzila na mambi ntangu yai, kansi mpi nde yandi ke sila na kumanisa yo ntama mingi ve.”

Yo kele pwelele nde, yo kele mpasi na kusala mambu ya mbote ntangu bantu mingi ke zitisa ve bansiku ya bikalulu ya mbote. Kansi nge lenda sala yo. Bantu mingi ke vandaka na mfunu ya lusadisu sambu na kubakisa Biblia mpi kusadila mambu yina bo ke longuka. Yo yina, na nsi-ntoto ya mvimba Bambangi ya Yehowa ke longukaka Biblia ya ofele ti bamilio ya bantu na banzo. Konso mposo, bamilio ya bantu ke longuka mambu yina Biblia ke longaka mpenza. Mpidina, bo ke kwendaka pene-pene na Ngangi na bo, mpi kele ti luzingu ya kiese.a

Mbala ya nima yina nge ta kutana ti Bambangi ya Yehowa, sambu na nki ve kuyula bo kikuma yina bo ke tudilaka dibundu na bo ntima? Tadila malongi na bo mpi sosa kuzaba kana bo ke zitisaka minsiku ya Bukristu. Na nima, baka lukanu kana kele ti dibundu yina nge lenda tudila ntima.