Keti Nge Lenda Tudila Dibundu Ntima na Yina Me Tala Bikalulu ya Mbote?

Sylvia, yina ke salaka kisika bo ke tadilaka mambu ya lusansu, ke tuba nde: “Ntangu mono kotaka na universite bana mingi ya nzo-nkanda vandaka kutuba nde bo ke sambilaka; kansi bo vandaka kuyiba na ekzame mpi kusadila bima yina ke lausaka. Dibundu nungaka ve na kusoba luzingu na bo.”

Bakala mosi na zina ya Lionel ke tuba nde: “Banduku na mono ya kisalu ke kusaka mpi ke bingaka ata bo ke bela ve. Dibundu kele kima mosi ya bo kele na yo kansi yina bo ke sadilaka ve​—yo kele bonso armware yina bo me tulaka na nzo kaka sambu na lukumu.”

Dibundu me sadisaka ve bantu mingi na kuvanda ti bikalulu ya mbote na luzingu na bo. Bantu mingi bubu yai “ke monanaka bonso nde bo kele ti kikalulu ya kuwa Nzambi boma, kansi bo ke buyaka ngolo ya kikalulu yina.” (2 Timoteo 3:5) Bantwadisi ya mabundu na bo ke pesaka ve mbandu ya mbote mpi ke pesaka ve mameme bandongisila ya mbote ya Biblia sambu bo monisa bikalulu ya mbote. Yo yina, yo ke yitukisa ve na kumona nde bantu mingi ke kwikilaka nde, Nzambi ke tulaka ve dikebi na mutindu yina bo ke zingaka.

BIBLIA KE LONGAKA INKI?

Biblia ke monisa nde Nzambi ke waka kiese to mawa mpi nde nkadilu na beto ke vandaka na mfunu mingi sambu na yandi. Ntangu bantu ya Izraele vandaka kukolama na Nzambi, “bo vandaka kumonisa yandi mawa.” (Nkunga 78:40) Kansi, ‘kiese ya mingi ke vandaka na zulu’ ntangu muntu ke sobaka nkadilu na yandi na masonga yonso. (Luka 15:7) Kana muntu me kuma kusepela na bikalulu ya kitoko ya Tata na beto ya zulu, zola na yandi sambu na luzolo ya Nzambi ta yela mpi yo ta pusa yandi na kuzola mambu yina Nzambi ke zolaka mpi kumenga mambu yina Nzambi ke mengaka.​—Amosi 5:15.

BAMBANGI YA YEHOWA KE SALAKA INKI MUTINDU?

Zulunalu mosi (Deseret News) ya Salt Lake City, na Utah na insi États-Unis ke tuba nde: “Bambangi ya Yehowa ke sadisaka bantu na kuvanda ti bangwisana ya mbote na kati ya mabuta, bo kele bantu ya masonga mpi ya ke zolaka kisalu.” Zulunalu yina ke yika nde: “Bo ke kwikilaka na minsiku ya me tala bikalulu ya mbote. Bo ke kwikilaka nde kunwa makaya, kulutisa ndilu na kunwa malafu, kusadila bima yina ke lausaka na mutindu ya mbi, bansaka ya mbongo, kuvukisa nitu na mitindu ya mbi mpi kuvukisa nitu babakala ti babakala mpi bankento ti bankento ke bebisaka bangwisana ya muntu ti Nzambi.”

Inki mutindu kulonguka bikalulu ya Nzambi ke sadisaka Bambangi? Sylvia, yina beto tubilaka na luyantiku ke tuba nde: “Luvunu ke salamaka mingi na kisika bo ke tadilaka mambu ya lusansu. Yo ke vandaka mpasi ve na kubwa na mutambu yina. Kansi, kubakisa mutindu Yehowaa ta wa na diambu yina, ke sadisaka mono na kusala mambu ya mbote. Mono kele na kiese mpi na ngemba ya kati.” Sylvia ke ndima nde, kuzinga na kuwakana ti balukwikilu ya dibundu na yandi me kumisaka luzingu na yandi mbote.