“Tala! Mono Ke Sala Bima Yonso ya Mpa”

Keti nge ti dibuta na nge ke zolaka kuvanda ti mavimpi ya mbote mpi luzingu ya nda? Keti nge ke zolaka kuzinga na nsi-ntoto yina mpasi, maladi, mpi lufwa ta vanda diaka ve? Nsi-ntoto ya mutindu yai kele ndosi ve. Ya kieleka, ntama mingi ve Yehowa Nzambi ta tula nsi-ntoto ya mpa mpi ya lunungu mutindu yandi silaka. Tala mutindu Biblia ke tubilaka kulungana ya lukanu na yandi na Kusonga 21:3-5.​—Tanga.

“[Nzambi] ta kusula mansanga yonso na meso na bo.” (Kusonga 21:4) Mansanga ya nki mutindu yandi ta kusula? Yo kele ve mansanga ya kiese to yina ke taninaka meso na beto. Lusilu ya Nzambi ke tadila mansanga yina ke basikaka sambu na mpasi to mawa. Nzambi ta yumisa kaka ve mansanga yina, kansi yandi ta kusula yo kimakulu ntangu yandi ta katula bikuma yina ke basisaka mansanga ya mawa, disongidila mpasi mpi mawa.

“Lufwa ta vandaka diaka ve.” (Kusonga 21:4) Inki ya nkaka me basisaka mansanga mingi ya mawa kuluta mbeni na beto lufwa? Yehowa ta katula bantu ya bulemfu na kimpika ya lufwa. Inki mutindu? Na mutindu yandi ta katula kikuma ya kieleka ya lufwa: disumu ya beto me bakaka na Adami. (Baroma 5:12) Yehowa ta sala nde bantu ya bulemfu kukuma bantu ya kukuka na nsadisa ya kimenga ya nkudulu.a Ebuna, “yandi ta katula lufwa, mbeni na beto ya nsuka.” (1 Bakorinto 15:26) Bantu ya kwikama ta zinga mutindu Nzambi zolaka nde bo zinga, disongidila kuzinga kimakulu ti mavimpi ya kukuka.

“Mpasi ta vandaka diaka ve.” (Kusonga 21:4) Mpasi ya nki mutindu ta vanda diaka ve? Mpasi ya mabanza, ya mawi, mpi ya nitu yina disumu ti kukonda kukuka me salaka nde luzingu ya bamilio ya bantu kuvanda ya mpasi, ta vanda diaka ve.

Ntama mingi ve, bantu ta dila diaka ve, lufwa mpi mpasi ta vandaka diaka ve. Nge lenda kudiyula nde: ‘Kansi na wapi?’ ‘Keti Nzambi ke sila luzingu yina na zulu?’ Ve. Beto tadila bikuma yai. Ya ntete, lusilu yina ke yantika ti bangogo yai, “tenta ya Nzambi kele ti bantu,” mpi bantu ke zingaka na ntoto. (Kusonga 21:3) Ya zole, lusilu yina ke tubila nsi-ntoto yina “lufwa ta vandaka diaka ve,” disongidila nsi-ntoto mosi kisika lufwa vandaka ntete kansi yo ta vanda diaka ve. Lufwa ke vandaka ve ata fioti na zulu, kansi yo ke vandaka tuka ntama awa na ntoto. Ya kieleka, luzingu ya mbote yina Nzambi me silaka ta lungana ntama mingi ve awa na ntoto.

Yehowa ke zolaka nde beto kwikila na lusilu na yandi ya kutula nsi-ntoto ya mpa ya lunungu. Na nima ya kutubila balusakumunu yina ta kwisa, Nzambi ke ndimisa lusilu na yandi, ntangu yandi ke tuba nde: “Tala! Mono ke sala bima yonso ya mpa.” Yandi yikaka nde: “Mambu yai kele ya kwikama mpi ya kieleka.” (Kusonga 21:5) Sambu na nki ve kulonguka mambu mingi mutindu nge ti bantu ya nge ke zolaka lenda vanda na kati ya bansadi ya kiese yina ta mona kulungana ya mambu ya kitoko yina Nzambi me silaka?