Mambu ya Ke Nata Basusi na Mabuta

Janet ke tuba nde: “Ntama mingi ve na nima ya lufwa ya tata na mono, bakala na mono songaka mono nde yandi me zwa nkento ya nkaka. Na nima, yandi kangaka bilele mpi kwendaka kukonda kuzabisa mono. Yandi bikaka mono ti bana zole.” Janet zwaka kisalu, kansi salere na yandi vandaka fioti sambu na kulungisa bampusa ya dibuta na yandi. Katula bampasi ya mbongo, mambu yankaka vandaka kuyangisa yandi. Yandi ke tuba nde: “Mambu lutilaka mono sambu mono kumaka ti mikumba mingi ya kulungisa. Mono kumaka kumona nde mono ke sansa ve bana na mono mbote bonso bibuti ya nkaka. Nkutu tii bubu yai, mono ke kudiyangisaka na mutindu bantu ya nkaka ke tadilaka mono ti bana na mono. Ziku bo ke kudiyulaka nde, keti mono salaka ngolo sambu na kutanina makwela na mono?”

Bisambu ke sadisaka Janet na kuyala mawi na yandi mpi na kutanina bangwisana na yandi ti Nzambi. Yandi ke tuba nde: “Na mpimpa ntangu bwala ke kumaka pima, mono ke kudiyangisaka mingi. Kansi, kisambu mpi lutangu ya Biblia ke sadisaka mono na kuzwa mpongi. Mono ke zolaka mingi mukanda ya Bafilipi 4:6, 7 ya ke tubaka nde: ‘Beno kudiyangisa ve sambu na kima ata mosi, kansi na mambu yonso na nzila ya kisambu mpi ya dodokilu kumosi ti kupesa matondo, beno zabisa balombilu na beno na Nzambi; mpi ngemba ya Nzambi yina me luta mambu yonso yina bantu lenda bakisa ta tanina bantima na beno mpi mabanza na beno.’ Mono ke sambaka mingi na mpimpa mpi ngemba ya Yehowa ke lembikaka mono.”

Bangogo ya Yezu ya me tala kisambu yina yandi tubilaka na Disolo na yandi na Zulu ya Ngumba ke tadila bampasi ya mitindu yonso. Yandi tubaka nde: “Tata na beno ke zabaka mambu yina beno kele na yo mfunu na ntwala nkutu nde beno lomba yandi yo.” (Matayo 6:8) Yo yina, beto fwete samba yandi. Kisambu kele mwaye ya ntete ya lenda sadisa beto na ‘kukwenda pene-pene na Nzambi.’ Kana beto ke sala yo, ‘yandi ta kwisa pene-pene na beto.’​—Yakobo 4:8.

Ya kieleka, kisambu ke sadisaka beto ve kaka na kudiwa mbote ntangu beto me zabisa Nzambi bampasi na beto. Kansi, Yehowa, ‘muntu yina ke ndimaka bisambu ya bantu,’ ke pesaka mvutu na bantu yina ke sambaka yandi ti lukwikilu yonso. (Nkunga 65:3) Yo yina, Yezu longaka balongoki na yandi na ‘kusamba ntangu yonso mpi kuyambula ve.’ (Luka 18:1) Beto fwete landa na kulomba Nzambi lutwadisu, lusadisu mpi kutula ntima nde yandi ta pesa mvutu na bisambu na beto. Beto fwete tula ve ntembe na ngolo yina Nzambi kele ti yo sambu na kusadisa beto. Kana beto ke “samba ntangu yonso,” beto ta monisa nde beto kele ti lukwikilu ya masonga.​—1 Batesalonika 5:17.

KUVANDA TI LUKWIKILU KE TENDULA NKI MPENZA?

Lukwikilu kele mpenza nki? Lukwikilu ke tendula mpi “kulonguka na kuzaba” Nzambi bonso muntu ya kieleka. (Yoane 17:3) Beto ke salaka mutindu yai ntangu beto ke longukaka mambu ya Nzambi na Biblia. Beto ke longukaka nde yandi ke monaka konso muntu mpi yandi ke vandaka ti mpusa ya kusadisa beto. Lukwikilu ya kieleka ke sukaka ve kaka na kuzaba diambu mosi ya me tala Nzambi, kansi yo ke tendulaka mambu mingi. Yo ke tendula mpi kusala bangwisana ya mbote ti yandi. Bonso kinduku ya bantu, beto lenda sala ve kinduku ya mutindu yai na kintulumukina. Lukwikilu na beto ‘ke landaka na kukuma mingi’ ntangu beto ke longukaka mambu mingi ya me tala yandi, ntangu beto “ke salaka mambu yina ke pesaka yandi kiese,” mpi ntangu yandi ke sadisaka beto. (2 Bakorinto 10:15; Yoane 8:29) Lukwikilu ya mutindu yai sadisaka Janet na kunwana ti bampasi.

Janet ke tuba nde: “Kima ya me salaka kibeni nde lukwikilu na mono kuvanda ngolo kele lusadisu yina Yehowa ke pesaka mono. Mbala mingi, beto vandaka kukutana ti mambu ya kukonda lunungu yina beto monaka nde beto lenda manisa yo ve. Sambu beto vandaka kusamba mingi, Yehowa vandaka kusadisa beto ntangu yonso na mutindu yina mono vandaka kuyindula ve. Ntangu mono ke tondaka yandi, yo ke yibukisaka mono mambu mingi ya yandi me salaka sambu na mono. Konso mbala, yandi ke sadisaka beto na ntangu ya me fwana kibeni. Mpi yandi me pesaka mono banduku ya kieleka, Bakristu ya babakala mpi ya bankento. Bo ke sadisaka mono ntangu yonso mpi bo kele mbandu ya mbote sambu na bana na mono.”a

Yandi ke tuba diaka nde: “Mono me bakisa kikuma yina Yehowa ke tubaka na Malaki 2:16 nde: ‘Mono ke zolaka ve ata fioti nde bakala kubikisa nkento na yandi.’ Diambu yai ke pesaka nkwelani yina me sala mbi ve mpasi mingi. Bamvula mingi me luta banda bakala na mono me yambulaka mono, kansi bantangu ya nkaka mono ke kudiwaka mono mosi mpi ke kudimonaka kukonda mfunu. Kana mono kudiwa mutindu yai, mono ke salaka kima mosi sambu na kusadisa muntu ya nkaka; mpi kusala mutindu yai ke sadisaka mono.” Janet ke fiotunaka basusi na yandi ntangu yandi ke sadilaka minsiku ya Biblia mpi ntangu yandi ke buyaka kuvanda yandi mosi.b​—Bingana 18:1.

Janet ke tuba nde: “Kuzaba nde Nzambi ‘ke talaka bana-nsiona ti mifwidi ya bankento’ ke pesaka mono kikesa ya mingi. Yandi ta yambula beto ve bonso bakala na mono.” (Nkunga 68:6) Janet ke zabaka nde Nzambi ke mekaka beto ve na “mambu ya mbi.” Kansi, yandi ke pesaka “bantu yonso na ntima ya mvimba” mayele mpi “ngolo yina me luta ngolo ya bantu” sambu na kusadisa bo na kunwana ti bampasi.​—Yakobo 1:5, 13; 2 Bakorinto 4:7.

Inki beto lenda sala kana luzingu na beto me kuma na kigonsa?