Beno Kudiyangisa Ve

MUNSIKU YA BIBLIA: “Beno bika kudiyangisa sambu na luzingu na beno.”​—Matayo 6:25.

Yo ke tendula inki? Yezu tubaka mambu yai na Disolo na yandi na Zulu ya Ngumba. Diksionere mosi ya ke tendulaka Biblia ke tuba nde ngogo ya Kigreki ya bo me balula nde “kudiyangisa” lenda tendula “mambu yina muntu ke salaka ntangu yandi me kutana ti kinsukami, nzala mpi bampasi ya nkaka yina ke bwila yandi na luzingu.” Mbala mingi bantu ke kudiyangisaka sambu na mambu yina ta salama na bilumbu ke kwisa. Yo kele mbi ve na kudiyangisa sambu na bampusa na beto ya kinsuni mpi sambu na mambote ya bantu ya beto ke zolaka. (Bafilipi 2:20) Kansi, ntangu Yezu tubaka nde “beno kudiyangisa ve ata fioti,” yandi vandaka kulongisila balongoki na yandi na kubika kudiyangisa mpamba-mpamba, disongidila kubika kuwa boma ya kuluta ndilu sambu na mbasi, sambu yo lenda katula kiese ya luzingu ya bubu.​—Matayo 6:31, 34.

Keti yo kele mfunu bubu yai? Beto ta vanda bantu ya mayele kana beto ke landa ndongisila ya Yezu. Sambu na nki? Mikanda mingi ke tubaka nde ntangu bantu ke kudiyangisaka mingi, misisa yonso ya nitu na bo ke salaka kisalu ya ngolo mpi yo ke bedisaka “maladi ya estoma, maladi ya ntima, mpi maladi ya ntulu.”

Yezu pesaka kikuma mosi ya nene sambu na kubika kudiyangisa kuluta ndilu: Yo kele na mfunu ve. Yezu yulaka nde: “Nani na kati na beno lenda yika nda ya luzingu na yandi ata fioti kana yandi ke kudiyangisa?” (Matayo 6:27) Kana beto ke kudiyangisa mingi sambu na bampasi na beto, yo ta kumisa ve luzingu na beto nda ata na sekondi mosi, nkutu yo lenda tomisa ve luzingu. Diaka, mambu ya beto ke waka boma nde yo ta salama, mbala mingi yo ke salamaka ve mutindu beto vandaka kuyindula. Muntu mosi ya mayele tubaka nde: “Kudiyangisa sambu na bilumbu ke kwisa kele kulutisa ntangu, mpi boma ya beto ke waka sambu na bilumbu ke kwisa ke vandaka mbala mingi ya mpamba.”

Inki nge lenda sala sambu na kudiyangisa ve kuluta ndilu? Ntete-ntete, tudila Nzambi ntima. Kana Nzambi ke disaka bandeke mpi ke lwatisaka bintuntu kitoko, ntembe kele ve nde yandi ta pesa bima ya mfunu ya luzingu na bantu yina ke tulaka lusambu na yandi na kisika ya ntete na luzingu na bo. (Matayo 6:25, 26, 28-30) Ya zole, zaba nde konso kilumbu kele ti makambu na yo. Yezu tubaka nde: “Beno kudiyangisa ve ata fioti sambu na kilumbu yina ke landa, sambu kilumbu yina ke landa ta vanda ti basusi na yo.” Keti nge ke ndima ve nde “konso kilumbu ke vandaka ti bampasi na yo”?​—Matayo 6:34.

Kana beto landa ndongisila ya mayele ya Yezu, beto ta kuditanina na bampasi. Diaka, beto ta zwa ngemba ya mabanza, yina Biblia ke bingaka “ngemba ya Nzambi.”​—Bafilipi 4:6, 7.