Keti Lutwadisu ya Biblia Kele na Mfunu Bubu Yai?

BANTU YA NKAKA KE TUBAKA NDE VE. Munganga mosi fwanisaka kusadila Biblia sambu na kubaka lutwadisu ti kusadila mukanda mosi yina basikaka na bamvu 1920 sambu na kulonga shimi na nzo-nkanda. Nkutu muntu ya ke zitisaka ve Biblia lenda yula kana nge ta sadila mukanda mosi ya ke tubilaka mutindu ya kusadila ordinatere ya ntama sambu yo sadisa nge na kusadila ordinatere ya mpa. Ya kieleka, bantu ya nkaka ke tadilaka Biblia bonso mukanda mosi ya me manaka kibeni ngala.

Sambu na nki kusadila mukanda yai ya ntama na nsi-ntoto ya bubu yai yina kele ti teknolozi ya ngolo? Ya kieleka, basite mingi ya internet ke pesaka mbala na mbala lutwadisu mpi bandongisila ya mpa mingi kibeni. Baprograme mingi ya televizio ke tubilaka bandongisila ya bantu ya mayele yina ke longukaka bangindu ya bantu, ya bamfumu ya mabundu yina ke monisaka mutindu ya kuzinga mpi ya bansoniki. Diaka, bisika ya bo ke tekaka mikanda ke vandaka ti mikanda mingi yina ke sadisaka bantu na kuyidika bo mosi makambu na bo, mpi yo ke kotisaka bamiliare ya badolare.

Sambu na bansangu yonso ya mpa yina bo ke pesaka, sambu na nki kusosa lutwadisu na Biblia, mukanda yina bo me sonikaka bamvula kiteso ya 2 000 me luta? Keti bantu yina ke zitisaka ve Biblia ke tubaka ve masonga ntangu bo ke tubaka nde kusadila mukanda yai ya ntama sambu na kubaka lutwadisu kele bonso kusadila mukanda mosi ya shimi to ya ordinatere yina me manaka ngala? Ya kieleka, bangindu yai kele ya luvunu. Siansi mpi teknolozi ke sobaka nswalu kibeni, ebuna keti mambu yina bantu ke vandaka ti yo mfunu me sobaka? Bantu ke zolaka kaka kuvanda ti luzingu ya mbote, kiese, lutaninu, kuwakana ya mbote na dibuta mpi kinduku ya mbote.

Ata Biblia kele mukanda mosi ya ntama, yo ke tubilaka mambu yai mpi mingi ya nkaka. Biblia ke tubaka nde bo sonikaka yo na nsadisa ya mpeve ya Ngangi na beto. Yo ke tubaka nde yo ta twadisa beto na mambu yonso ya luzingu mpi ta sadisa beto na konso diambu ya mpasi. (2 Timoteo 3:16, 17) Katula yina, Biblia ke pesaka bandongisila yina ke vandaka mfunu ntangu yonso, disongidila bandongisila yina ke manaka ve ata fioti ngala! Biblia ke tuba nde: “Ndinga ya Nzambi kele ya moyo.”—Baebreo 4:12.

Keti mambu yina Biblia ke tuba kele kibeni ya masonga? Keti yo me manaka ngala to yo kele kibeni mukanda ya me luta mikanda yonso na mfunu, disongidila mukanda ya moyo? Lukanu ya nimero ya Nzozulu ya Nkengi yai ya ntete mpi ya banimero yina ke landa kele ya kusadisa nge na kuzwa bamvutu na bangiufula yai.