Nzambi Mepesaka Beto Kimvwama
1 Ntumwa Polo vandaka kubaka mukumba ya kusamuna yina Nzambi kupesaka yandi na valere mpi yandi bingaka yo “kimvwama.” (2 Kor. 4:7) Yandi kangaka ntima na bampasi mpi na mimekamu sambu na kulungisa mukumba yango. Yandi samunaka kukonda kulemba na bantu yonso yina yandi vandaka kukutana ti bo. Yandi salaka banzyetelo mingi ya mpasi mpi ya kigonsa, na nzila ya makulu mpi ya masa. Inki mutindu beto lenda landa mbandu ya Polo mpi kumonisa nde beto kezolaka mpenza kisalu na beto ya kusamuna? (Roma 11:13) Inki kesalaka nde kisalu na beto ya kusamuna kuvanda kimvwama mosi ya beto lenda fwanisa ve ti kima yankaka?
2 Kimvwama ya Kuluta Mbote: Mbala mingi, bimvwama ya ntoto kenatilaka bantu bampasi mingi, mpi mambote na yo kevandaka ti bandilu to kezingaka mingi ve. Kansi, kisalu na beto ya kusamuna kenatilaka beto ti bantu yankaka mambote ya kimakulu. (1 Tim. 4:16) Yo kesadisaka bantu ya masonga na kuzaba Yehowa, na kusala bansoba yina kele mfunu na luzingu na bo, mpi na kuzwa kivuvu ya kyeleka ya luzingu ya mvula na mvula. (Roma 10:13-15) Kana beto kebaka kisalu na beto ya kusamuna na valere mingi mpenza, beto takuma ti lukanu ya mbote na luzingu, beto tavanda na kyese yina muntu kebakaka kana yandi melungisa kisalu na yandi mbote, mpi kivuvu ya kyese sambu na bilumbu kekwisa.—1 Kor. 15:58.
3 Monisa nde Nge Kebakaka Kimvwama na Nge na Valere: Kana beto kebaka kima mosi na valere, yo kemonanaka mbala mingi na bima yina beto lenda tambika sambu na yo. Beto kele na dibaku ya mbote kibeni ya kusadila ntangu mpi ngolo na beto sambu na kukumisa Yehowa! (Ef. 5:16, 17) Mutindu beto kesadilaka ntangu na beto fwete monisa nde beto kepesaka valere mingi na mambu ya kimpeve kuluta na bima ya kinsuni. Sambu beto kele ti kima mosi ya ntalu mingi ya beto fwete zabisa bankaka, beto tazola kusamuna ti kyese mpi kuzabisa nsangu ya mbote na konso dibaku ya beto kekutana ti yo.
4 Mbala mingi, bantu kebumbaka ve bimvwama ya ntalu, kansi bo ketulaka yo na kisika yina bantu yankaka lenda mona yo. Kana beto kebaka kisalu na beto ya kusamuna bonso kimvwama, yo tabaka kisika ya nene na luzingu na beto. (Mat. 5:14-16) Bika nde, ti ntima ya kufuluka na ntonda, beto landa ntangu yonso mbandu ya ntumwa Polo mpi kusadila konso dibaku sambu na kumonisa nde beto kebakaka mpenza kisalu na beto ya kusamuna na valere mpi ketadilaka yo bonso kimvwama.