Baka Kisalu na Nge ya Kusamuna na Mbalu
1. Inki mutindu bantu mingi na nsi-ntoto ketadilaka kisalu na beto ya kusamuna?
1 Bantu mingi na nsi-ntoto yai ya Satana kemonaka nde kisalu na beto ya kusamuna kele “mambu ya buzoba.” (1 Kor. 1:18-21) Kana beto keba ve, ngindu yai ya mbi lenda lembisa beto mpi kufyotuna kikesa na beto. (Bing. 24:10; Yez. 5:20) Sambu na nki beto fwete baka na mbalu dibaku ya beto kele na yo ya kuvanda Bambangi ya Yehowa?—Yez. 43:10.
2. Sambu na nki beto lenda tuba nde kisalu ya kusamuna kele ‘kisalu mosi ya santu’?
2 ‘Kisalu Mosi ya Santu’: Ntumwa Polo kutubaka nde kisalu ya kusamuna kele ‘kisalu mosi ya santu.’ (Roma 15:15, 16, NW) Inki mutindu kisalu ya kusamuna kele ‘kisalu mosi ya santu’? Ntangu beto kesalaka kisalu yai, beto kekumaka “banduku ya kisalu” ya “Muntu ya Santu,” Yehowa, mpi yo kesadisaka na kusantisa zina na yandi. (1 Kor. 3:9, NW; 1 Pie. 1:15) Yehowa kemonaka nde kisalu na beto ya kusamuna kele “kimenga ya lukumu;” yo yina kisalu ya kusamuna kele dyambu mosi ya mfunu na lusambu na beto.—Baeb. 13:15, NW.
3. Inki kesalaka nde kusamuna nsangu ya mbote kuvanda lukumu mosi ya nene?
3 Kusamuna nsangu ya mbote kele lukumu mosi ya nene yina bo mepesaka na bantu fyoti mpamba. Bawanzio lendaka kusala kisalu ya mutindu yai na kyese yonso mpi ntembe kele ve nde bo zolaka kusala yo mbote kuluta. (1 Pie. 1:12) Kansi, Yehowa meponaka beto bantu ya kukonda kukuka, “mabungu ya kukonda ngolo ya bo ke salaka na ntoto,” sambu na dibaku yai ya kitoko!—2 Kor. 4:7.
4. Inki mutindu beto lenda monisa nde beto kebakaka kisalu ya kusamuna na mbalu?
4 Kisalu Mosi ya Mfunu: Sambu beto kebakaka dibaku na beto na mbalu mpenza, beto kemonaka nde kisalu ya kusamuna kele dyambu mosi ya “kuluta mfunu” na luzingu na beto. (Filp. 1:10) Yo yina beto keyidikaka manaka na beto sambu na kusamuna konso mposo. Beto baka mbandu ya muyimbi-nkunga mosi ya keyimbaka na kimvuka mosi ya mezabanaka na ntoto ya mvimba. Yandi lenda monisa nde yandi kebakaka na mbalu kisalu na yandi kana yandi kebongisa mbote konso konsere mpi keyedisa mayele na yandi ya kisalu. Mutindu mosi, beto fwete kudibongisa na ntwala ya kukwenda na kisalu ya kusamuna; mpidina beto lenda ‘zabisa nsangu ya kieleka mbote-mbote.’ Dyaka, beto fwete yedisa ‘mayele na beto ya kulonga.’—2 Tim. 2:15; 4:2, NW.
5. Banani kesepelaka ti kisalu na beto ya kusamuna?
5 Beno bika ve nde nkadilu ya mbi ya bantu mingi kulembisa beno. Beno vila ve nde teritware na beto kele kaka ti bantu mingi yina kesepelaka na kusolula ti beto. Ata mpidina, beto kesosaka ve nde bantu kundima beto. Dyambu ya kuluta mfunu kele mutindu Yehowa ketadilaka kisalu na beto; mpi yandi kebakaka na mbalu mingi bikesa na beto.—Yez. 52:7.