Bikuma Kumi na Zole ya Kusala Kisalu ya Kusamuna
Sambu na nki beto kesamunaka mpi kelongaka nsangu ya mbote? Keti ntete-ntete yo kele sambu na kusadisa bantu ya ntima ya mbote na kukota na nzila ya luzingu? (Mat. 7:14) Yina kele kikuma ya ntete ya bo metanga awa na nsi, kansi yo kele ve kikuma ya kuluta mfunu. Na kati ya bikuma 12 yai ya kelanda, ya kusala kisalu ya kusamuna, nge keyindula nde inki kikuma kele ya kuluta mfunu?
1. Yo kesadisaka na kugulusa luzingu ya bantu.—Yoa. 17:3.
2. Yo kesadisaka na kukebisa bantu ya mbi.—Ezek. 3:18, 19.
3. Yo kesadisaka na kulungana ya bambikudulu ya Biblia.—Mat. 24:14.
4. Yo kemonisaka lunungu ya Nzambi. Ata muntu mosi ve lenda tuba nde Yehowa mepesaka ve bantu ya mbi dibaku ya kubalula ntima na ntwala nde yandi kufwa bo. —Bis. 17:30, 31; 1 Tim. 2:3, 4.
5. Yo kepesaka beto nzila ya kufuta mfuka na beto ya kusadisa bantu na kimpeve, bayina bo mesumbaka na menga ya Yezu.—Roma 1:14, 15.
6. Yo kesadisaka beto na kuvanda ve na mfuka ya menga.—Bis. 20:26, 27.
7. Yo kele dyambu yina Nzambi kelombaka beto sambu na luguluku na beto mosi. —Ezek. 3:19; Roma 10:9, 10.
8. Yo kemonisaka zola na beto sambu na mfinangani.—Mat. 22:39.
9. Yo kemonisaka nde beto kelemfukilaka Yehowa mpi Mwana na yandi.—Mat. 28:19, 20.
10. Yo kele kitini ya lusambu na beto.—Baeb. 13:15.
11. Yo kemonisaka nde beto kezolaka Nzambi.—1 Yoa. 5:3.
12. Yo kesadisaka beto na kupesa maboko na kusantisama ya zina ya Yehowa.—Yez. 43:10-12; Mat. 6:9.
Ya kyeleka, yai kele ve kaka bikuma yina kepusaka beto na kusala kisalu ya kusamuna. Mumbandu, kisalu ya kusamuna kekumisaka lukwikilu na beto ngolo mpi yo kepesaka beto dibaku ya mbote ya kuvanda banduku ya kisalu ya Nzambi. (1 Kor. 3:9) Kansi, kikuma ya kuluta mfunu ya beto kesalaka kisalu ya kusamuna kele kikuma yina kele na nimero 12. Yo vanda bantu kendima beto to ve, kisalu ya kusamuna kepesaka maboko na kusantisama ya zina ya Nzambi mpi yo kepesaka Yehowa nzila ya kupesa mvutu na muntu yina ketongaka yandi. (Bing. 27:11) Ya kyeleka, beto kele na bikuma ya mbote ya kufula ‘kulonga kaka, mpi ya kuzabisa nsangu ya mbote.’—Bis. 5:42.