Bikesa Yina Tasalama na Ntoto ya Mvimba Sambu na Kubinga Bantu na Lukutakanu ya Distrike “Landa Kristu!”
Bansamuni Takabula Dyaka Emvitasio ya Sipesiali
1 Na mvula ya meluta, kampanye ya kubinga bantu na ntoto ya mvimba na Lukutakanu ya Distrike “Luguluku Mefinama!” kuvandaka ti bupusi ya ngolo kibeni na bantu yina kesepelaka na kyeleka. Bantu yina kundimaka emvitasio ya sipesiali kuvukanaka sambu na mbala ya ntete na feti ya kimpeve ti Bambangi ya Yehowa. (Yez. 65:13) Bo sepelaka ti kinduku ya mbote kibeni ti dibuta ya Bukristu ya kele ti bumosi. (Nk. 133:1) Sambu beto kuka na kusadisa bantu mingi kuluta na kuvukana na Lukutakanu ya Distrike “Landa Kristu!,” beto takabula dyaka na ntoto ya mvimba baemvitasio ya sipesiali.
2 Bambuma Beto Bakaka na Mvula Meluta: Barapore ya beto bakaka na bandambu yonso ya ntoto kemonisa nde kukabula baemvitasio ya Lukutakanu ya Distrike “Luguluku Mefinama!” kubutaka bambuma ya mbote mpenza. Na bisika mingi, bantu kukumisaka beto mpenza. Mu mbandu, zulunalu mosi kusonikaka mambu mingi na yina metala kampanye, nde: “Sambu na kukutana ti konso muntu na ntangu ya mbote na ntwala ya lukutakanu ya distrike, Bambangi ya Yehowa kusalaka kikesa mingi na bisika ya bo kezingaka, bo salaka bangunga mingi, bo tambulaka na bisika ya ntama, mpi bo vandaka kusolula nswalu-nswalu ti bantu.” Na mbanza yankaka, mutindu ya mbote yina kampanye ya kukabula baemvitasio vandaka kusalama, kubendaka dikebi ya bimwangi-nsangu yo yina bo tubilaka yo mingi na bansangu. Bazulunalu kiteso ya tatu kutubilaka mbote bisalu ya beto vandaka kusala na ntwala nde lukutakanu ya distrike kusalama. Nsoniki mosi kusonikaka masolo mingi yina kufulusaka balutiti zole ya zulunalu mosi. Yandi tubilaka balukwikilu na beto, organizasio na beto, kampanye ya kukabula baemvitasio, mpi lukutakanu ya distrike. Ntangu nsamuni mosi kupesaka muntu mosi emvitasio na kyelo, muntu yango kuzengaka yandi mpi kutubaka nde, “Ee. Mono mekatuka kutanga yo ntama mingi ve na zulunalu!” Muwi yankaka kutubaka nde: “Mu mekatuka kutanga mambu na beno kaka sesepi yai, mpi beno yai mekumina munu! Keti yai emvitasio na munu?” Na nima yandi yikaka nde, “Yai kele dyambu mosi ya mbote kibeni ya Bambangi ya Yehowa ke na kusala.”
3 Bantu mingi ya kusepelaka kukwisaka na lukutakanu yango ti baemvitasio na bo na maboko. Bankaka kukatukaka na bambanza ya ntama sambu na kukwisa kuvukana na lukutakanu. Bikesa ya beto salaka sambu na kubinga bantu yankaka ketombulaka ntalu ya bantu yina kevukanaka. Na nsi mosi, yo vandaka ti bantu 27 na zulu ya nkama kuluta ntalu ya bantu yina kuvukanaka na lukutakanu ya distrike na mvula meluta.
4 Mutindu ya Kusala Teritware Yonso: Beno lenda yantika kukabula baemvitasio bamposo tatu na ntwala nde lukutakanu na beno ya distrike kuyantika. Beno fwete sala kikesa sambu na kusala teritware yonso ya dibundu na beno. Sambu na mabundu yina kele ti teritware ya nene, bansamuni lenda bikila bantu yina kele ve na banzo baemvitasio na mposo ya nsuka na ntwala ya lukutakanu ya distrike. Mabundu fwete sala kikesa sambu na kukabula baemvitasio yonso ya bo metindila bo mpi na kusala teritware ya mvimba kana mpila kele. Bapasudi-nzila lenda sadila baemvitasio yina tabikala.
5 Mambu ya Kutuba: Nge lenda tuba bangogo bonso yai: “Beto kevukana na kisalu ya kukabula na ntoto ya mvimba emvitasio yai ya ketadila dyambu mosi ya mfunu yina tasalama na bilumbu kekwisa. Kopi na nge yo yai. Nge takuta bansangu yankaka na kati ya emvitasio yango.” Kana bangogo na beto kele nkufi, yo tasadisa beto na kukabula baemvitasio mingi. Ya kyeleka, kana muwi meyula bangyufula, baka ntangu ya kupesa yandi bamvutu. Kana muntu memonisa mpusa, baka banoti mpi vutukila yandi kukonda kusukinina na mbala kekwisa.
6 Yo kele mfunu mpenza nde beto sala ngolo na kulanda Kristu! (Yoa. 3:36) Lukutakanu na beto ya distrike yina kekwisa tasadisa bantu yonso yina tavukana na kulanda Kristu. Ya kyeleka beto lenda tuba na ntwala nde na mbala yai mpi, beto tata kimbangi ya kuyituka sambu na bikesa ya beto tasala na ntoto ya mvimba sambu na kubinga bantu na Lukutakanu ya distrike “Landa Kristu!” Yo yina, beno vanda kikesa sambu na kubinga bantu mingi kibeni na kuvukana na lukutakanu. Bika Yehowa kusakumuna bikesa yina konso muntu na kati na beno tasala sambu na kuvukana na kisalu yai ya kesalama na bumosi na ntoto ya mvimba.