Pesa Emvitasio Mbala Mosi

1. Inki ntangu kampanye ya kukabula ba-emvitasio ya lukutakanu ya nene ta yantika?

¹ Kana nge ke yilama na kulamba madia mosi ya sipesiali sambu na bantu ya dibuta to banduku mpi madia yango ke lomba mbongo ti kikesa ya mingi, ziku nge ta vanda na kiese ntangu nge ke kabula ba-emvitasio. Mutindu mosi, kisalu ya ngolo me salama sambu na kuyidika fete ya kimpeve yina ta salama na lukutakanu ya distrike na bilumbu ya ke kwisa. Bamposo tatu na ntwala nde lukutakanu na beto ya nene kusalama, Yehowa ke pesa beto dibaku ya kubingisa bantu ya nkaka na kukwisa na lukutakanu yango. Inki ta sadisa beto na kukabula ba-emvitasio na kiese yonso?

2. Inki ta pusa beto na kusala mingi na nsungi ya kampanye?

² Kana beto ke yindula mambote yina beto ke bakaka na malongi ya mfunu yina Yehowa ke pesaka beto na balukutakanu ya nene, yo ta pusa beto na kusala mingi na nsungi ya kampanye. (Yez. 65:13, 14) Beto fwete vila mpi ve nde kampanye ya beto ke salaka konso mvula ke butaka mbuma. (Tala lupangu “Kampanye Ke Butaka Mbuma.”) Bantu ya nkaka yina beto ta bingisa ta kwisa na lukutakanu, kansi bankaka ta kwisa ve. Ata bantu kukwisa to ve, bikesa na beto ya masonga na nsungi ya kampanye ta kumisa Yehowa mpi ta monisa kikalulu na yandi ya kukaba.—Nk. 145:3, 7; Kus. 22:17.

3. Inki mutindu beto ta kabula baemvitasio?

³ Kimvuka ya bankuluntu fwete tadila nki mutindu dibundu lenda kabula ba-emvitasio mingi. Bo ta tala mpi kana yo ta lomba nde bansamuni kubikisa ba-emvitasio na banzo yina bo ta kuta ve bantu to kukabula yo na ntangu bo ke ta kimbangi na bisika ya bantu mingi na teritware na bo. Beto fwete kabula bazulunalu nzila mosi ti ba-emvitasio na bawikendi kana mpila kele. Ntangu kampanye ta mana, beto ta vanda na kiese mingi ya kuzaba nde beto salaka kisalu na kikesa yonso mpi bingisaka bantu mingi na kuvukana ti beto na fete ya kimpeve yina Yehowa me yidika!

Kampanye Ke Butaka Mbuma

Bamvula mingi me luta, mpangi-nkento mosi vandaka kukabula ba-emvitasio. Yandi vandaka kudiyula kana bikesa na yandi yonso ta buta mbuma. Yandi vandaka kudiyula nde: ‘Keti bantu ta kwisa mpenza na lukutakanu ya nene?’ Na kilumbu ya lukutakanu, na Sabala na suka, yandi monaka bakala mosi ya dibundu ya Sikh me vanda pene-pene na yandi. Yo yina, yandi bakaka lukanu ya kusolula ti yandi. Na nima ya masolo na bo, yandi bakisaka nde bakala yango kwisaka na lukutakanu sambu bo pesaka yandi emvitasio. Yandi yulaka mpangi-nkento bangiufula mingi mpi mpangi-nkento pesaka yandi bamvutu. Bakala yango tubaka nde yandi sepelaka mingi ti malongi, bikalulu mpi mutindu ya kulwata ya Bambangi. Kaka na kilumbu yina, mpangi-nkento yango solulaka diaka ti bankwelani ya vandaka na lweka na yandi. Bo zabisaka yandi nde bo bakaka emvitasio, yo yina bo kwisaka na lukutakanu na kamio. Bo sepelaka mingi ti lukutakanu mpi bo bakaka lukanu ya kukwisa diaka na Lumingu. Mpangi yina bakisaka mfunu ya kampanye ya beto ke salaka konso mvula.
Na lukutakanu mosi ya nene ya me salama ntama mingi ve, bakala mosi ti nkento na yandi ya kele bapasudi-nzila ya ntangu yonso solulaka ti mbuta-muntu mosi ti nkento na yandi. Mbuta-muntu yango ti nkento na yandi zabisaka bo nde yo vandaka mbala na bo ya ntete ya kukwisa na lukutakanu. Bapasudi-nzila yango yulaka bo nde: “Nani pesaka beno emvitasio?” Bo vutulaka nde: “Kilumbu mosi ntangu beto vutukaka na nzo, beto kutaka emvitasio mosi na nsi ya kielo.” Bo tangaka emvitasio mpi fulusaka formilere na yo. Bampangi ya nkaka pesaka bankwelani yai madia. Bankwelani yango sepelaka mingi ti malongi mpi bo bakaka lukanu ya kukwisa diaka na kilumbu yina landaka. Bampangi bakaka bangidika ya kutala bo sambu na kuyedisa mpusa na bo.