Emvitasio Mosi ya Sipesiali
1. Inki ntangu kampanye ya kukabula baemvitasio ya balukutakanu ya nene ya 2014 ta yantika?
1 Kana nge me yilama na kulamba madia mosi ya sipesiali sambu na banduku to sambu na bantu ya dibuta mpi madia yango ke lomba mbongo ti kikesa ya mingi, ziku nge ta vanda na kiese ntangu nge ke kabula baemvitasio. Mutindu mosi, kisalu ya ngolo me salama sambu na kuyidika fete ya kimpeve yina ta salama na balukutakanu ya distrike mpi ya bansi mingi na 2014. Bamposo tatu na ntwala nde lukutakanu na beto ya nene kusalama, beto ta vanda ti dibaku ya kubingisa bantu ya nkaka na kukwisa na lukutakanu. Inki ta sadisa beto na kukabula baemvitasio na kiese yonso?
2. Inki ta pusa beto na kusala mingi na nsungi ya kampanye?
2 Kana beto ke yindula mutindu beto ke bakaka mambote na fete ya kimpeve yina Yehowa ke yidikilaka beto na balukutakanu ya nene, yo ta pusa beto na kusala mingi na nsungi ya kampanye. (Yez. 65:13, 14) Beto fwete vila mpi ve nde kampanye yina beto ke salaka konso mvula ke butaka bambuma. Bantu ya nkaka yina beto ta bingisa ta vukana ti beto na lukutakanu. Ata bantu kukwisa to ve, bikesa na beto ya masonga na nsungi ya kampanye ta kumisa Yehowa mpi ta monisa kikalulu na yandi ya kukaba.—Nk. 145:3, 7; Kus. 22:17.
3. Inki mutindu beto ta kabula baemvitasio?
3 Kimvuka ya bankuluntu fwete zaba nki mutindu dibundu lenda kabula baemvitasio mingi. Bo ta tala mpi kana yo ta lomba nde bansamuni kubikisa baemvitasio na banzo yina bo ta kuta ve bantu to kukabula yo na ntangu bo ke ta kimbangi na bisika ya bantu mingi na teritware na bo. Beto fwete kabula bazulunalu nzila mosi ti baemvitasio na bawikendi kana mpila kele. Kana Sabala ya ntete ya ngonda me bwa na badati yina kampanye ke salama, beto ta kudipesa mingi na kukabula baemvitasio na kisika ya kuyantika kulonguka Biblia ti bantu. Ntangu kampanye ta mana, beto ta vanda na kiese ya mingi na kuzaba nde beto salaka kisalu na kikesa yonso mpi bingisaka bantu mingi na kuvukana ti beto na fete ya kimpeve yina Yehowa me yidika!