Manaka ya Lukutakanu ya Nzyunga Yina Kekwisa

Yo mefwana nde beto kumisa Yehowa. Inki mutindu beto kekumisaka Yehowa? Inki bampasi bampangi yankaka kekutana ti yo sambu na kukumisa Yehowa? Inki balusakumunu bantu yina kekumisa Nzambi ntangu yai kebaka? Manaka ya lukutakanu ya nzyunga ya mvu ya kisalu 2008 tapesa bamvutu ya mbote na bangyufula yai. Ntu-dyambu na yo kele, ‘Sala Mambu Yonso Sambu na Kupesa Nzambi Lukumu.’ (1 Kor. 10:31) Tadila mambu yina kevingila beto na bilumbu zole ya kekwisa ya malongi mingi ya kimpeve.

Nkengi ya distrike tatubila masolo yai, “Sambu na Nki Kupesa Nzambi Lukumu?” mpi “Pesa Mbandu ya Mbote na Kulungisaka Mambu Yina Nzambi Kelombaka.” Yandi tasala diskure ya bantu yonso ya kele na ntu-dyambu, “Banani Kepesa Nzambi Lukumu?,” mpi diskure ya nsuka, “Beto Pesa Nzambi Lukumu Kumosi na Ntoto ya Mvimba.” Yandi tatwadisa mpi Nzo-Nkanda ya Kisalu ya Teokrasi. Nkengi ya nzyunga tasala masolo yai, “Vanda na Kyese na Kutentisa Lukumu ya Nzambi,” “Beto Tadila Bampusa ya Nzyunga,” mpi “Bikala ya ‘Kukangama Ngolo na Kyeleka,’ ” yina mesimbama na 2 Piere 1:12. Dyaka, beto talonguka mutindu “Kisalu ya Kimupasudi-Nzila Kepesaka Nzambi Lukumu.” Diskure ya ntete na kati ya badiskure zole ya bitini mingi ya kepusa na kuyindula tavanda na ntu-dyambu, “Beto Pesa Nzambi Lukumu na Mambu Yonso ya Luzingu na Beto.” Yo tatadila na bunda ntendula ya bangogo ya kupemama ya kele na 1 Korinto 10:31. Diskure ya bitini mingi, “Sala Kisalu ya Santu Sambu na Kupesa Yehowa Lukumu” tatubila bitini ya kuswaswana ya lusambu na beto. Beto talanda disolo na bunkufi ya Nzozulu ya Nkengi mpi disolo ya ketadila mukapu ya kilumbu ya Lumingu. Bantu tavanda mpi ti dibaku ya kubaka mbotika.

Bantu mingi kibeni kebuyaka kundima Nzambi. Bankaka ketulaka dikebi mingi kibeni na bapula ya bantu kesala, yo yina bo kezwaka ve ntangu ya kuyindula mambu ya metala lukumu ya Yehowa. (Yoa. 5:44) Kansi beto kendimaka mpenza nde yo kele mfunu na kubaka ntangu ya kutadila mutindu ya ‘Kusala Mambu Yonso Sambu na Kupesa Nzambi Lukumu.’ Sala bangidika sambu nge vanda na bitini yonso ya lukutakanu yango mpi nge bakila yo mpenza mambote.