Manaka ya Mpa ya Balukutakanu ya Dibundu

1, 2. Inki bansoba tasalama na balukutakanu na beto yantika na Yanuari 2009?

¹ Na mposo ya Aprili 21-27, 2008, dibuta ya bampangi ya ntoto ya mvimba kuwaka nsangu mosi ya kyese. “Yantika na Yanuari 1, 2009, Kulonguka ya Mukanda ya Dibundu tasalamaka kilumbu mosi ti Nzo-Nkanda ya Kisalu ya Teokrasi mpi Lukutakanu ya Kisalu. Beto tayantika kubinga Kulonguka ya Mukanda ya Dibundu nde Kulonguka ya Biblia ya Dibundu.”

² Manaka Sambu na Lukutakanu Yai ya Konso Mposo: Ntangu ya kimvuka sambu na balukutakanu yai, yika mpi bankunga ti kisambu, tavanda ngunga 1 ti minuta 45. Manaka tayantika na nkunga mpi kisambu (Min. 5), na nima beto tasala Kulonguka ya Biblia ya Dibundu (Min. 25). Nzo-Nkanda ya Kisalu ya Teokrasi (Min. 30) tasalama mbala mosi na nima na yo. Ebuna, beto tayimba nkunga (Min. 5) sambu na kuyantika Lukutakanu ya Kisalu (Min. 35). Manaka tasuka ti nkunga mpi kisambu (Min. 5). Sambu na kusadisa beno na kubongisa balukutakanu yai, manaka ya Kulonguka ya Biblia ya Dibundu, ya Nzo-Nkanda ya Kisalu ya Teokrasi mpi ya Lukutakanu ya Kisalu tabasikaka konso ngonda na Kisalu na Beto ya Kimfumu.

3. Inki mutindu bo tatwadisaka Kulonguka ya Biblia ya Dibundu?

³ Kulonguka ya Biblia ya Dibundu: Lukutakanu yai tasalamaka bonso Kulonguka ya Nzozulu ya Nkengi. Mfunu tavanda ve ya kuyantika ti mvutukila ya malongi ya mposo yina meluta. Kansi, lukutakanu fwete yantika ti mwa bangogo ya nkufi ya luyantiku. Kusala mutindu yai tapesa bawi yonso ntangu mingi ya kupesa bakomantere ya nkufi. Nkengi-ntwadisi muntu taponaka bankuluntu yina tasalaka bature ya kutwadisa lukutakanu yai, nkuluntu mosi ya kuswaswana konso mposo.

4. Na nki mutindu Lukutakanu ya Kisalu tasoba?

4 Lukutakanu ya Kisalu: Lukutakanu ya Kisalu tasoba ve kansi yo tavanda ti masolo ya nkufi. Baluzayisu tabakaka mbala mingi minuta tanu. Minuta yai tafwana sambu na kusala baluzayisu ya mfunu mpi kutanga mikanda yankaka ya kekatukaka na filiale. Mfunu kele ve ya kutanga na estrade baluzayisu ya ketadila bangidika sambu na kisalu ya bilanga, manaka ya kutula bunkete, rapore ya konti, mpi mikanda ya kekatukaka na biro ya filiale yina kekwisaka mbala na mbala. Kansi beno tatula yo na tablo ya bansangu sambu bampangi kutanga yo. Bampangi yina tavanda ti masolo fwete kudibongisa mbote mpi kuzitisa ntangu ti bantuma ya bo mepesa.

5. Na mposo ya viziti ya nkengi ya nzyunga, inki tavanda manaka ya balukutakanu ya dibundu?

⁵ Viziti ya Nkengi ya Nzyunga: Manaka ya nkengi ya nzyunga ya konso mposo tasoba ve. Na Kizole, beto tasala Nzo-Nkanda ya Kisalu ya Teokrasi ti Lukutakanu ya Kisalu, na nima beto tayimba nkunga. Ebuna nkengi ya nzyunga tasala diskure ya minuta 30. Mutindu yo kesalamaka ntangu yai na mposo ya viziti ya nkengi ya nzyunga, beto tapona nkokila yankaka sambu na Kulonguka ya Biblia ya Dibundu, ebuna na nima na yo beto tayimba nkunga mpi talanda diskure ya kisalu ya nkengi ya nzyunga. Lukutakanu tasuka na nkunga mpi kisambu.

6. Inki kele kisalu ya nkengi ya kimvuka?

⁶ Balukutakanu Sambu na Kisalu ya Bilanga: Kimvuka ya bankuluntu tapona bankengi ya kimvuka sambu na kutwadisa bimvuka na kisalu ya bilanga mpi kugungula bantu ya kele na kimvuka yango. Kana beno pona nsadi ya kisalu sambu na kulungisa kisalu yai, beno tabingaka yandi “nsadi ya kimvuka.”

7. Inki beto lenda vingila na manaka ya mpa ya balukutakanu ya dibundu?

⁷ Mutindu beto metubila yo na disolo yai, beto tavanda ti dibaku ya kutadila bansangu ya kelonga mpenza mpi ya kepesa kikesa yina tasadisa beto na kuvanda ti bangwisana ya ngolo ti Yehowa. Yo tasadisa beto mpi na kuvanda bansamuni mpi balongi ya mbote, yina bo melonga sambu na kusala kisalu ya kusamuna ya kebuta bambuma mingi.​—⁠Ef. 4:​13, 14; 2 Tim. 3:⁠17.

8. Inki mutindu kana konso muntu kudibongisa na ntwala, yo tasadisa yandi mosi mpi bantu yankaka?

⁸ Kudibongisa na ntwala sambu na balukutakanu yai tasadisa beto na kutula dikebi na bangindu ya mfunu ya bo tatubila na konso lukutakanu. Beto yonso tavanda ti dibaku ya kupesa bakomantere, ebuna yo tasadisa na kupesana kikesa. (Roma 1:​11, 12; Baeb. 10:24) Lukanu na beto fwete vanda ya kusala nde ‘kuyela na beto kumonana’ na ‘kuzabisaka nsangu ya kieleka mbote-mbote.’​—⁠1 Tim. 4:​15, NW; 2 Tim. 2:⁠15.

9. Inki kele lukanu na beto, mpi sambu na inki?

⁹ Beto kesepela na bansoba yai ya mfunu na balukutakanu na beto ya dibundu. Bika beto yonso kubaka mambote na lutwadisu yina “mpika ya kwikama mpi ya mayele” kepesa mpi beto bikala penepene ya Ngungudi na beto ya Nene na ntangu yandi kebongisa beto sambu na “mpasi” ya nene yina mefinama.​—⁠Mat. 24:​21, 45; Baeb. 13:​20, 21; Kus. 7:⁠14.