Bamvutu na Bangyufula na Beno

◼ Inki mutindu mpi nani fwete lomba bantu na kutelama sambu na kuyimba nkunga ya luyantiku ya Nzo-Nkanda ya Kisalu ya Teokrasi, ya Lukutakanu ya Kisalu, ya Lukutakanu ya Bantu Yonso, mpi ya Kulonguka ya Nzozulu ya Nkengi?

Nkunga ya luyantiku ya Nzo-Nkanda ya Kisalu ya Teokrasi ya konso mposo kevandaka na Manaka ya Nzo-Nkanda ya Kisalu ya Teokrasi yina kevandaka na ngika ya Kisalu na Beto ya Kimfumu ya Oktobri. Nkunga ya luyantiku mpi ya nsuka sambu na Lukutakanu ya Kisalu ya konso mposo kevandaka na lutiti ya 2 ya Kisalu na Beto ya Kimfumu. Mutindu mosi, bankunga sambu na Kulonguka ya Nzozulu ya Nkengi ya konso mposo kevandaka na lutiti ya 2 ya konso nimero ya Nzozulu ya Nkengi. Nkunga yina bo kepesaka kevandaka kitini mosi ya lukutakanu yina, yo yina muntu fwete lomba bampangi na kutelama sambu na kuyimba bankunga yango kele mpangi yina ketwadisa lukutakanu yina, kansi ve mpangi yina mekatuka kutwadisa lukutakanu yina meluta.

Mu mbandu, nkengi na Nzo-Nkanda ya Kisalu ya Teokrasi tazodila bantu kukwisa ya mbote, yandi talomba bantu na kutelama sambu na kuyimba nkunga ya luyantiku, tatwadisa nzo-nkanda, mpi na nima, yandi tabinga mpangi yina tasala disolo ya ntete na Lukutakanu ya Kisalu. Mpangi yina kesala disolo ya ntete na Lukutakanu ya Kisalu muntu talomba bampangi na kutelama sambu na kuyimba nkunga ya ntete ya Lukutakanu ya Kisalu.

Mutindu mosi, prezida yina ketwadisa Lukutakanu ya Bantu Yonso muntu tayantikisa lukutakanu yai. Na kyese yonso, yandi tazodila bantu yonso kukwisa ya mbote, mpi yandi talomba bo na kuyimba nkunga ya luyantiku yina mutubi kuponaka. Yandi (to mpangi yankaka yina mefwana mpi yina bo ponaka na ntwala) muntu tasala kisambu ya luyantiku. Yandi tazabisa ntu-dyambu ya diskure mpi tabinga mutubi. Na nima ya diskure, prezida yina ketwadisa tavutukila ve na bunkufi bangindu ya mfunu ya mutubi metubila na diskure na yandi, kansi yandi tamonisa ntonda na bunkufi sambu na malongi ya bo mebaka. Yandi tapesa ntu-dyambu ya diskure ya mposo yina kelanda, mpi na nima yandi talomba bantu yonso na kubikala sambu na Kulonguka ya Nzozulu ya Nkengi. Mfunu kele ve nde yandi yula bawi kana bo tazola kutinda mbote na dibundu ya mutubi ya nzenza. Na nima, yandi tabinga mpangi yina tatwadisa Kulonguka ya Nzozulu ya Nkengi.

Ntwadisi ya Kulonguka ya Nzozulu ya Nkengi muntu talomba bampangi na kutelama sambu na kuyimba nkunga ya ntete ya bo yidikaka sambu na kulonguka yina. Yandi tatwadisa kulonguka na kulanda bantuma yina beto mebasisaka mpi na nima yandi tapesa nkunga ya nsuka. Ntwadisi na Kulonguka ya Nzozulu ya Nkengi tabinga mpangi yina kusalaka diskure sambu na kusala kisambu ya nsuka.

Kana beto sadila bantuma yai, yo tasadisa sambu balukutakanu kutwadisama na mutindu mosi bisika yonso.