Mutindu ya Kusadila Mukanda “Zola ya Nzambi” Sambu na Kulonguka Biblia ti Bantu
1. Inki kele lukanu ya mukanda “Zola ya Nzambi”?
1 Beto vandaka na kyese na kubaka mukanda ya mpa ‘Beno Zinga Kaka na Zola ya Nzambi’ na Lukutakanu na beto ya Distrike “Mpeve ya Nzambi Ketwadisaka Beto”! Mutindu bo tubilaka yo, lukanu ya mukanda yai kele ya kusadisa beto na kuzaba mpi na kuzola minsiku ya Yehowa ya bikalulu ya mbote kansi ve sambu na kulonga malongi ya luyantiku ya Biblia. Beto takabula ve mukanda yai nzo na nzo.
2. Inki mutindu beto tasadila mukanda yai, mpi beto talonguka yo ti banani?
2 Beto tasadila mukanda yai bonso mukanda ya zole ya kulonguka ti balongoki ya Biblia na nima ya kumanisa mukanda Biblia Kelongaka. Zaba nde bantu keyelaka ve na kimpeve mutindu mosi. Konso kulonguka fwete salama na kisika yina mefwana na longoki. Zikisa nde longoki kebakisa mbote malongi ya beno kelonguka. Na bambandu mingi, beto fwete sadila ve mukanda yai sambu na kubanda kulonguka Biblia ti bantu yina mbala yankaka melongukaka dezia mikanda mingi na bilumbu meluta kansi kekwisaka ve na balukutakanu ya dibundu mpi kemonisaka mpenza ve mpusa ya kuwakanisa luzingu na bo ti kyeleka ya Biblia yina bo melongaka bo.
3. Inki beto fwete sala kana ntangu yai beto kelonguka mukanda Sambila Nzambi ti muntu mosi?
3 Kana ntangu yai nge kelonguka ti muntu na mukanda Sambila Nzambi mpi beno mekuma na bakapu ya nsuka, nge lenda baka lukanu ya kumanisa mukanda yina mpi kusyamisa longoki na kutanga mukanda “Zola ya Nzambi” yandi mosi. Kana yo kele mpidina ve, yo tavanda mbote na kukota na mukanda ya mpa mpi kubanda na luyantiku. Kaka mutindu beto kesalaka ti mukanda Biblia Kelongaka, konso muntu fwete pona kana yandi tatadila to ve bantu-dyambu yina kele na appendice.
4. Inki beto fwete sala kana longoki mebaka mbotika na ntwala ya kumanisa mikanda Biblia Kelongaka mpi “Zola ya Nzambi”?
4 Kana longoki mebaka mbotika na ntwala ya kumanisa mikanda yonso zole, beno fwete landa na kulonguka tii kuna beno tamanisa mukanda “Zola ya Nzambi.” Ata longoki mebaka dezia mbotika, nge lenda tanga bangunga, mvutukila ya mpa, mpi kulonguka. Nsamuni yina kebasika kumosi na nge mpi kepesa bakomantere ntangu beno kelonguka lenda tanga mpi bangunga.
5. Inki mutindu beto lenda sadila mukanda “Zola ya Nzambi” sambu na kusadisa bansamuni yina kesamunaka dyaka ve na nsungi mosi buna?
5 Kana Komite ya Kisalu ya Dibundu melomba nge na kulonguka Biblia ti muntu mosi yina kesamunaka dyaka ve, bo lenda lomba nge na kutadila bakapu ya sikisiki ya mukanda “Zola ya Nzambi.” Kulonguka ya mutindu yai fwete salama ve na ntangu mosi ya nda kibeni. Mukanda yai ya mpa, yina bo salaka sambu na kusadisa beto na kuzinga kaka na ‘zola ya Nzambi’ kele ngidika mosi ya mbote mpenza!—Yude 21.