Bamvutu na Bangyufula na Beno

◼ Inki mikanda zole beto fwete longuka ti balongoki na beto ya Biblia?

Mukanda Biblia Kelongaka kele kisadilu ya ntetentete ya beto kesadilaka sambu na kuyantika kulonguka Biblia ti bantu. Ata yo kele mbi ve na kusadila mukanda yankaka, bonso trakiti mosi ya mefwana, sambu na kuyantika kulonguka Biblia ti muntu, beto fwete sala yonso kukonda kusukinina sambu na kusoba mpi kukota na mukanda Biblia Kelongaka. Bansamuni mebakaka bambuma ya mbote mpenza na kusadilaka mukanda Biblia Kelongaka sambu na kuyantika kulonguka ti bantu.

Kana beno memanisa kulonguka mukanda Biblia Kelongaka mpi nge kemona nde longoki keyela, beno fwete longuka mukanda Sambila Nzambi. (Kol. 2:⁠7) Lutiti ya 2 ketendula lukanu ya mukanda yai nde: “Biblia kelomba bantu yonso yina kezolaka Nzambi na ‘kuzaba . . . nene ti nda’ ya bakyeleka na yandi ya mfunu mingi. (Efezo 3:​18, NW) Yo yina kikuma ya beto mebasisila mukanda yai. Beto ke na kivuvu nde yo tasadisa nge na kuyela na kimpeve mpi na kukuma muntu yina mefwana mpenza na kutambula na nzila ya fyoti yina kenataka na luzingu na inza ya mpa ya lunungu ya Nzambi.”

Kana longoki mefwana sambu na kubaka mbotika na ntwala ya kumanisa mikanda yai zole, beno fwete landa na kulonguka tii kuna beno tamanisa mukanda ya zole. Ata kana longoki mebaka dezia mbotika, nsamuni ya kelongukaka ti yandi lenda landa na kubaka bangunga, kutanga bamvutukila ti kulonguka ya Biblia. Nsamuni yina kefidisa yandi na ntangu ya kutwadisa kulonguka ya Biblia lenda baka mpi bangunga kana yandi kepesa bakomantere.