Kisalu na Beto ya Ntetentete
1. Inki mutindu Yezu kumonisaka nde kisalu ya kusamuna kuvandaka mfunu sambu na yandi?
1 Kisalu ya kusamuna kuvandaka kisalu ya ntetentete sambu na Yezu. Yandi kusalaka ngolo mpenza, yandi salaka mafunda ya bakilometre na kati ya Palestine sambu na kulonga bantu mingi. Yandi vandaka na luzingu ya pete na mpila nde yandi lendaka kulutisa ntangu mingi mpi kutula dikebi mingi na kisalu ya kusamuna. (Mat. 8:20) Ntangu bibuka kumekaka na kukanga yandi sambu yandi kubelula bambefo na bo, yandi tubaka nde: “Mono fweti zabisa nsangu ya mbote ya Kimfumu ya Nzambi na babwala ya nkaka mpi, sambu yina kele kisina ya mambu ya Nzambi tindilaka mono.”—Luka 4:43.
2. Sambu na inki kisalu ya kusamuna kuvandaka mfunu mingi sambu na Yezu?
2 Sambu na inki kisalu ya kusamuna kuvandaka mfunu mingi sambu na Yezu? Susi na yandi ya ntete kuvandaka kusantisama ya zina ya Yehowa. (Mat. 6:9, NW) Yandi vandaka kuzola Tata na yandi ya zulu mpi zola yina kupusaka yandi na kusala luzolo ya Nzambi mpi na kulemfuka na bantuma na yandi yonso. (Yoa. 14:31) Dyaka, yandi vandaka kudibanza na masonga yonso sambu na bantu mpi vandaka kuzola kusadisa bo.—Mat. 9:36, 37.
3. Inki mutindu beto lenda monisa nde kisalu ya kusamuna kele na kisika ya ntete na luzingu na beto?
3 Landa Mbandu ya Yezu: Kutula kisalu ya kusamuna na kisika ya ntete bonso Yezu lenda vanda mpasi sambu nsi-ntoto kebakaka ntangu na beto mingi mpi yo kele ti mambu mingi ya kekatulaka dikebi. (Mat. 24:37-39; Luka 21:34) Yo yina, beto fwete zikisa mambu ya kuluta mfunu, mpi kubumba mbala na mbala ntangu ya kudibongisa mpi ya kuvukana na kisalu ya kusamuna. (Filp. 1:10) Beto kesalaka ngolo na kuvanda ti luzingu ya pete mpi kebuyaka kusadila nsi-ntoto na mambu yonso.—1 Kor. 7:31.
4. Sambu na nki yo kele mfunu ntangu yai na kutula mambu ya mefwana na kisika ya ntete?
4 Kana yandi kele ti ntangu fyoti, muntu ya mayele kesalaka ntete mambu ya kuluta mfunu. Mu mbandu, kana yandi zaba nde mvula ya matadi kezola kunoka, yandi tasadila ntangu mpi ngolo na yandi ntetentete na kubaka bangidika sambu na kutanina dibuta na yandi mpi sambu na kukebisa bamfinangani na yandi. Yandi tasala ve bisalu ya kukonda mfunu. Ntangu ya mebikala sambu Armagedoni kubwa kele fyoti. (Sof. 1:14-16; 1 Kor. 7:29) Sambu na kudigulusa mpi kugulusa bantu yina kewa beto, beto fwete landa na kukeba beto mosi mpi na kukeba malongi na beto, yo vanda na kati to na nganda ya dibundu. (1 Tim. 4:16) Ee, luguluku na beto ketadila mutindu beto kelanda kutula kisalu ya kusamuna na kisika ya ntete!