Beto Fwete Losila Bankeni Masa Sambu Yo Yela
1. Inki beto fwete losila masa sambu yo yela?
1 Kana muntu mekuna bankeni na bilanga, yandi fwete losila yo masa sambu yo yela. Beto fwete sala mpi mutindu mosi sambu na bankeni ya kyeleka yina beto mekunaka na bantima ya bantu ya teritware na beto. (1 Kor. 3:6) Beto fwete sala bamvutukila ya mpa mpi kulosila bankeni yai ya kifwani masa na nsadisa ya Ndinga ya Nzambi kana beto kezola nde bo tula misisa, mpi bo yela.
2. Inki mutindu beto lenda sadisa muwi na kusepela ti mambu yina beto tatubila na viziti ya kelanda?
2 Yula Ngyufula: Ntangu nge kebongisa bangogo na nge ya kukotila na masolo, sambu na nki ve kuyidika ngyufula mosi ya kebenda dikebi yina nge tapesa mvutu ntangu nge tasala mvutukila ya mpa? Yula yandi ngyufula yango na nsuka ya disolo na beno ya ntete, mpi baka bangidika ya mbote sambu na kuvutukila yandi. Bampangi mingi kemonaka nde yo kele mbote na kupona ngyufula na kati ya mukanda Biblia Kelongaka, yina tasadisa bo na kumonisa mutindu kulonguka ya Biblia kesalamaka.
3. Inki bansangu nge lenda kotisa ntangu nge kesonika mambu yina salamaka na viziti ya ntete?
3 Sonika Mambu: Ntangu nge mekabwana ti muntu, kusukinina ve na kusonika mambu yonso ya beno solulaka. Sonika zina na yandi mpi kisika yandi kevandaka. Yo kele mpi mbote na kusonika dati mpi ntangu yina beno mesolula, mambu ya beno solulaka; kana nge pesaka yandi mpi mukanda, sonika yo. Keti yandi tubaka nde yandi kele muntu ya dibundu mosi buna? Keti yandi kele na dibuta? Keti yandi tubilaka mambu yina kesepedisaka yandi to keyangisaka yandi? Bansangu ya mutindu yai tasadisa nge na kutubila mambu yina kele mfunu sambu na yandi ntangu nge tavutukila yandi. Sonika mpi ntangu ti kilumbu yina beno mewakana sambu na kukutana dyaka mpi ngyufula yina nge tapesa mvutu.
4. Sambu na nki beto fwete kwamina ntangu beto kesosa kukutana ti muntu yina monisaka mpusa?
4 Kwamina: Satana talemba ve kusala bikesa sambu na ‘kukatula nsangu’ yina nge mekuna na ntima ya muntu. (Mar. 4:14, 15) Yo yina, kulemba ve kana nge kemona mpasi na kukutana dyaka ti muntu yina sepelaka na nsangu na nzo na yandi. Keti nge lenda sonikila yandi mukanda to kusonika mwa dyambu na papie mpi kubikila yandi na nsi ya kyelo? Mupasudi-nzila mosi yantikaka kulonguka Biblia ti nkento mosi na ntwala ya kyelo, kansi yandi vandaka kumona dyaka ve nkento yango na nzo; ebuna, yandi sonikilaka yandi mukanda. Nsuka-nsuka, ntangu mpangi nkento kutaka yandi na nzo, nkento yango tubaka nde, dikebi yina mpangi nkento tudilaka yandi simbaka ntima na yandi mpenza. Kana beto kelosila bankeni ya kyeleka masa, beto lenda wa kyese ntangu beto kemona nde yo keyela, mpi kebuta ‘bambuma makumi tatu, makumi sambanu, mpi nkama.’—Mar. 4:20.