Beto Yedisa Mayele na Beto na Kisalu ya Kusamuna—Baka Banoti ya Bantu Yina Ke Monisa Mpusa

Biblia ke tuba nde: “Keba ntangu yonso na nge mosi mpi na malongi na nge.” (1 Tim. 4:16) Ndongisila yai ya kupemama ya ntumwa Polo pesaka Timoteo ke monisa nde, yo vanda beto kele bansamuni ya mpa to ya ntama beto fwete sala ngolo sambu na kuyela. Sambu na kusadisa beto, masolo ya mpa ya me landana ta basikaka na Kisalu na Beto ya Kimfumu; yo ta vanda ti ntu-diambu “Beto Yedisa Mayele na Beto na Kisalu ya Kusamuna.” Konso disolo ta tubilaka ngindu mosi ya mfunu mpi mitindu ya kusadila yo. Na ngonda ya mvimba, bo ke siamisa beto yonso na kutula dikebi ya sipesiali na ngindu yango. Kana ngonda me mana, disolo mosi ya Lukutakanu ya Kisalu ta pesa beto dibaku ya kutubila mambote yina beto bakaka ntangu beto sadilaka ngindu yango. Na ngonda yai, bo ke siamisa beto na kubaka banoti ya bantu yina ke monisa mpusa.

Mfunu na Yo: Sambu na kulungisa mukumba na beto, beto fwete suka kaka ve na kulonga. Beto fwete vutukila bantu yina monisaka mpusa mpi kulonga bo, kulosa masa na bankeni ya kieleka yina beto kunaka. (Mat. 28:19, 20; 1 Bak. 3:6-9) Yo ke lombaka kumona diaka muntu yango, kutubila mambu yina ke yangisa yandi mpi kulanda disolo yina beto tubilaka na mbala ya me luta. Yo yina, kana beto me kutana ti muntu ya me monisa mpusa, yo kele mfunu na kubaka banoti.

Mutindu ya Kusala Yo:

• Zikisa nde nge me tula bisadilu ya kubaka banoti na sakosi. Bumba banoti na nge mbote-mbote, yidika yo na ndonga mpi baka banoti ya nkaka. Ntangu nge me manisa kusolula, baka mbala mosi banoti.

• Sonika bansangu ya ke tadila muwi. Zina na yandi mpi bansangu yina lenda sadisa nge na kukutana ti yandi, mu mbandu adresi, nimero ya telefone, to adresi ya Internet. Inki mambu ya mfunu ya nge me mona yina me tala yandi to dibuta na yandi?

• Sonika mambu ya beno me solula. Inki baverse beno tangaka? Inki mambu yandi tubaka sambu na balukwikilu na yandi? Inki mukanda nge pesaka yandi? Sonika ntangu, kilumbu mpi dati ya viziti.

• Sonika mambu yina nge ta sadila na mbala ya nima. Inki mambu beno wakanaka na kutubila? Inki kilumbu nge tulaka sambu na kuvutukila yandi?

• Baka banoti ya nkaka konso ntangu ya nge ke vutukila yandi. Yo kele mbi ve na kusonika bansangu ya nkaka.

Sadila Yo Ngonda ya Mvimba:

• Ntangu nge ke baka banoti, zabisa mpangi yina nge ke samuna ti yandi mambu ya nge ke sonika.