Beto Yedisa Mayele na Beto na Kisalu ya Kusamuna—Beto Tudila Bantu Dikebi
Mfunu na Yo: Yezu vandaka kudibanza sambu na bantu mpi kutudila konso muntu dikebi ya zola. Mu mbandu, Yezu bakisaka ziku nde kifwa-makutu mosi vandaka makasi-makasi, yo yina, Yezu nataka yandi na kingenga ntama ti kibuka ya bantu sambu na kubelula yandi. (Mar. 7:31-35) Yandi vandaka kutudila balongoki na yandi dikebi sambu yandi bakisaka bandilu na bo mpi vandaka ve kulonga bo mambu mingi. (Yoa. 16:12) Ata Yezu kele na zulu, yandi ke tudilaka konso muntu dikebi. (2 Tim. 4:17) Sambu beto kele balongoki ya Kristu, beto fwete landa mbandu na yandi. (1 Pie. 2:21; 1 Yoa. 3:16, 18) Diaka, beto ta vanda bansamuni ya mbote kana beto ke zitisa muwi, ke tula dikebi na mambu na yandi ya luzingu, na bampusa na yandi mpi na mambu yina ke yangisa yandi. Yandi ta widikila beto kana yandi ke bakisa nde beto me kwenda kutala yandi kaka ve sambu na kuzabisa yandi nsangu to kubikula yandi mikanda kansi sambu beto ke tudilaka yandi dikebi.
Sadila Yo Ngonda ya Mvimba:
Beno sala bansonga ntangu beno ke sala lusambu ya dibuta to ntangu beno kele na kisalu ya kusamuna. Na bansonga yango, nsamuni mosi ke soba bangogo na yandi ya kukotila na masolo sambu na kuwakanisa yo ti mambu yina muwi ke tuba.
Na balukutakanu ya nkaka ya kisalu ya bilanga, mpangi yina ke twadisa yo lenda tubila to kusadisa nsonga ya ke monisa mitindu ya kutudila bantu dikebi