Vanda ya Kuyilama “na Kusala Konso Mambu ya Mbote”
1 Ntangu Yezu yantikaka kampanye mosi ya mpa ya kusamuna, yandi bakaka ntangu ya kubongisa balongoki na yandi. (Mat. 10:5-14) Ata beto yonso kevandaka ti mambu mingi ya kusala, kubaka ata mwa minuta fioti sambu na kudibongisa na ntwala ya kubasika na kisalu ya kusamuna nzo na nzo tasadisa beto na kukatula bambuma ya mbote.—2 Kor. 9:6.
2 Mutindu ya Kudibongisa: Sambu na kudibongisa mbote, yo kelombaka ntetentete kuzaba mbote mukanda yina beto kekana kukabula. Beto fweti yindula mpi bantu yina kele na teritware na beto. Inki mambu keyangisaka bo? Balukwikilu ya inki mutindu beto lenda kutana na yo? Beto lenda losa disu na bangogo ya kukotila na masolo yina kele na Kisalu na Beto ya Kimfumu mpi na mukanda Comment raisonner à partir des Écritures sambu na kubaka bangindu.
3 Kuwidikila na dikebi yonso bansonga yina kesalamaka na Lukutakanu ya Kisalu tasadisa beto mpi. Kana beto meyikana mbote ti bangogo na beto ya kukotila na masolo, beto tavanda ve na mfunu ya ntangu mingi sambu na kudibongisa. Kansi, konso ntangu na ntwala ya kukwenda na kisalu ya kusamuna, kana beto yindula na ntwala mambu yina beto tatuba mpi kulanda na kutomisa bangogo na beto ya kukotila na masolo, beto tabuka bambuma ya mbote. Beto fweti baka mpi ntangu ya kuzikisa nde saki na beto ya kisalu ya kusamuna kele ti bisadilu yina beto tavanda na yo mfunu.
4 Inki tasadisa beto na kuyibuka bangogo na beto ya kukotila na masolo? Mwaye mosi ya kukotisa na mabanza na beto mambu ya beto tatuba kele kumeka na kuvutukila yo mbala na mbala na ndinga ya ngolo. Bantu mingi kesepelaka kusala yo na ntangu ya kulonguka na bo ya dibuta. Bankaka kemonaka mbote kusonika na bunkufi bangogo na bo ya kukotila na masolo na kitini mosi ya papie mpi kulosa disu na ntwala ya kukuma penepene ya kyelo.
5 Mfunu na Yo: Kudibongisa ya mbote kekumisaka beto bansamuni ya mbote mpi kematisaka kyese na beto ya kisalu ya kusamuna. Yo kesadisaka beto na kuvanda pima mpi kuwa ve boma na ntwala ya kyelo. Beto takuka kutudila muwi dikebi ya mingi, olie ya kudiyangisa sambu na mambu yina beto tatuba. Dyaka, kuzaba mbote mukanda yina beto kekana kukabula tasadisa beto na kuvanda ti kyese ya mingi ntangu beto kekabula yo.
6 Masonuku kesyamisa beto na kuvanda ya kuyilama “na kusala konso mambu ya mbote.” (Tito 3:1) Keti kele ti kisalu ya mbote ya meluta kisalu ya kusamuna nsangu ya mbote? Ntangu beto kekudibongisaka mbote, beto kemonisaka luzitu na muwi yina kesepela kuwa beto, mpi na Yehowa, Nzambi yina beto kemonisaka.—Yez. 43:10.