Bamvutu Na Bangyufula Na Beno

◼ Nani fwete fulusa coupon mpi formilere yina kevandaka na Internet?

Mbala mingi mikanda na beto kevandaka ti kisika yina muntu lenda fulusa sambu na kulomba mikanda na biro ya filiale to kulomba nde Mbangi ya Yehowa kwisa tala yandi. Dyaka, muntu lenda sadila site ya Internet na beto (www.watchtower.org) sambu na kulomba nde Mpangi mosi kulonguka Biblia ti yandi. Ngidika yai kesadisaka bantu mingi na kulonguka kyeleka. Kansi, makambu mebasikaka ntangu bansamuni sadilaka bangidika yai sambu na kusadisa bampangi na bo ya kinsuni na kuzwa mikanda to muntu ya kulonguka ti bo.

Bantu yankaka mebokutaka sambu biro ya filiale tindilaka bo mikanda yina ya bo lombaka ve, mpi bo yindulaka nde organizasio na beto keyangisaka bo mpi kevandaka ti bazina na bo na listi mosi buna sambu na kutindilaka bo mikanda. Bansamuni yina biro ya filiale metindika na kwenda kutala muntu mosi, kansi muntu yango lombaka ve nde bo kwenda kutala yandi, mekutanaka ti mambu ya mpasi ntangu muntu yina waka makasi. Yo yina, bantu ya kesepelaka na kyeleka fwete lomba bo mosi mikanda to muntu ya kulonguka ti bo, na nzila ya site ya Internet na beto to ya coupon; kansi bansamuni ve bantu fwete sala yo sambu na bo. Mbala mingi, kana biro ya filiale mebakisa nde muntu yandi mosi mesonika ve mambu yai, kansi muntu yankaka, bo kendimaka yo ve.

Kansi, nki mutindu beto lenda sadisa na kimpeve, mpangi na beto mosi ya kinsuni to nduku? Kana nge kezola nde yandi baka mikanda, sambu na nki ve kutindila yandi yo mbala mosi bonso dikabu? Kana yandi memonisa mpusa mpi kezola nde Bambangi ya Yehowa kwenda kutala yandi, kansi nge kezaba ve mutindu ya kukutana ti bankuluntu ya dibundu ya teritware yina yandi kele, nge fwete fulusa formilere Veuillez suivre l’intérêt (S-43) mpi kupesa yo na sekretere ya dibundu na beno; yandi tatadila yo mpi tatinda yo na biro ya filiale. Kansi, kana muntu yango ya memonisa mpusa kele na boloko, to yandi kele na kisika mosi yina mpila ya kubasika kele ve to na lupitalu, nge fwete sonikila ve biro ya filiale sambu na yandi. Nge lenda syamisa yandi na kusolula ti bampangi yina kesamunaka na kisika yina to na kusonikila biro ya filiale yandi mosi.