Beto Tala Bantu Yina Ke Monisa Mpusa Kukonda Kusukinina

Banda bo tomisaka site Internet na beto, bantu mingi ke lomba nde bo longuka ti bo Biblia. Diaka, bangidika ya mpa ya kuta kimbangi na bisika ya bantu mingi ke sala nde bantu ya nkaka kulomba nde bo longuka ti bo Biblia. Biro ya filiale ke salaka mambu kukonda kusukinina. Mu mbandu, kana muntu me lomba nde bo longuka ti yandi Biblia na nzila ya jw.org, mbala mingi, biro ya filiale ke sonikilaka bankuluntu ya teritware ya muntu yina me monisa mpusa bilumbu zole na nima. Barapore ya ke katuka na teritware ke monisa nde bamposo mingi ke lutaka na ntwala nde bansamuni kukwenda kutala bantu yina lombaka nde bo longuka ti bo Biblia. Inki beto lenda sala sambu na kusadisa muntu na ntwala nde mpusa na yandi kumana?​—Mar. 4:14, 15.

Kana muntu yina me monisa mpusa ke zingaka ve na teritware na beno, beno fwete fulusa formilere Veuillez suivre l’intérêt (S-43) kukonda kusukinina mpi kupesa yo na sekretere na ntwala nde beno sala balukutakanu yina ta landa. Kilumbu mosi to bilumbu zole na nima, sekretere fwete tinda bansangu na dibundu ya me fwana to kusadila kisika ya bo me sonika Dibundu na jw.org sambu na kutinda yo na biro ya filiale. Bankuluntu fwete kota mbala na mbala na site Internet. Kana biro ya filiale me sonikila bankuluntu nde muntu mosi me monisa mpusa, bo fwete tala muntu yina kukonda kusukinina. Kana bo me lomba nsamuni mosi na kukwenda kutala muntu yina me monisa mpusa, yandi fwete lungisa mukumba yina kukonda kusukinina. Kana muntu yango kele ve na nzo, nsamuni yango lenda bikila yandi adresi to nimero na yandi ya telefone.