Bamvutu Na Bangyufula Na Beno

◼ Inki tasadisa beto na kuzaba kana beto fwete pesa muntu mukanda to ve?

Dyambu ya kuluta mfunu ya beto fwete tadila kele mpusa yina muntu kemonisa. Kana yandi kemonisa dikebi ya masonga, beto lenda pesa yandi bazulunalu zole, kamukanda mosi, mukanda mosi, to mikanda yankaka yina beto kekabulaka. Beto fwete pesa yandi ata kana beto mebakisa nde yandi kele ti mbongo fyoti to ve ya kupesa makabu sambu na kupesa maboko na kisalu yina kesalama na nsi-ntoto ya mvimba. (Yobi 34:19; Kus. 22:17) Kansi, beto tapesa ve mikanda na beto ya mbalu na bantu yina kesepelaka na yo ve.—Mat. 7:6.

Inki mutindu muwi lenda monisa mpusa? Luzolo ya kusolula ti beto kele nzikisa mosi ya mbote. Kana yandi ketula dikebi na mambu ya beto ketuba, kevutula bamvutu na bangyufula, mpi kepesa bangindu na yandi, yo kemonisa nde yandi kesepela na disolo. Kana yandi kelanda na Biblia ntangu beto ketanga, yo kemonisa nde yandi kezitisa Ndinga ya Nzambi. Mbala mingi, yo kevandaka mbote na kuyula muntu kana yandi tatanga mukanda yina beto kepesa yandi. Bansamuni fwete sadila luswasukusu sambu na kuzaba kana muwi kemonisa mpusa. Mu mbandu, ntangu beto keta kimbangi na babalabala, yo tavanda ve mbote na kupesa bazulunalu, tumikanda, to mikanda na kisakasaka na konso muntu yina keluta na lueka na beto. Kana beto kekuka ve kuzaba kana muntu kemonisa mpusa, yo tavanda mbote mpenza na kupesa yandi trakiti.

Mutindu mosi, ntalu ya mikanda yina nsamuni kebakaka na kisika yina bo ketulaka mikanda, fwete wakana ti ntalu yina yandi kele na yo mfunu sambu na kusala kisalu na yandi, kansi ve na kuwakana ti makuki na yandi ya kupesa makabu. Beto kepesaka ve makabu sambu na mikanda kansi sambu na kupesa maboko na mitindu yonso ya kisalu na beto ya kusamuna ya kesalama na nsi-ntoto ya mvimba. Beto vanda ti mbongo to ve, ntonda na beto tapusa beto na kupesa makabu na luzolo yonso sambu na kupesa maboko na mambote ya Kimfumu, kansi ve kupesa kaka mwa ndambu ya mbongo yina mebikala na mbongo yina beto kele na yo. (Mar. 12:41-44; 2 Kor. 9:7) Ntonda tapusa beto mpi na kubaka kaka mikanda yina beto kele na yo mfunu, mpidina beto tabebisa ve makabu ya mbongo yina bo kepesaka sambu na mikanda.

[Bangogo sambu na kubenda dikebi ya kele na lutiti 2]

Bansamuni fwete sadila luswasukusu sambu na kuzaba kana muwi kemonisa mpusa